ആര്‍മി റഫറല്‍ ആശുപത്രിയില്‍ ചികിത്സയിലായിരുന്ന മുന്‍ കേന്ദ്രമന്ത്രി ജസ്വന്ത് സിങ് (82) അന്തരിച്ചു. അന്ത്യം ഇന്നലെ രാവിലെയായിരുന്നു. വാജ്‌പേയി മന്ത്രിസഭകളില്‍ ധനം, പ്രതിരോധം, വിദേശകാര്യം എന്നീ വകുപ്പുകള്‍ കൈകാര്യം ചെയ്തു. കുളിമുറിയില്‍ തലയിടിച്ചു വീണതിനെത്തുടര്‍ന്നു വര്‍ഷങ്ങളായി അബോധാവസ്ഥയിലായിരുന്നു. ഏറ്റവുമൊടുവില്‍ കഴിഞ്ഞ ജൂണിലാണ് ആര്‍മി ആശുപത്രിയില്‍ പ്രവേശിപ്പിച്ചത്. ഭാര്യ: ശീതള്‍കുമാരി. മുന്‍ ബിജെപി എംപി മാനവേന്ദ്രസിങ് അടക്കം 2 മക്കളുണ്ട്.

1938-ല്‍ രാജസ്ഥാനില്‍ ജനിച്ച ജസ്വന്ത് സിങ് 19-ാം വയസ്സില്‍ കരസേനയില്‍ ചേര്‍ന്നു. മേജറായിരിക്കെ 1965-ല്‍ രാജിവച്ചു ജനസംഘത്തില്‍ ചേര്‍ന്നു. 5 തവണ രാജ്യസഭാംഗവും 4 തവണ ലോക്‌സഭാംഗവുമായിരുന്നു. 2014-ല്‍ ബിജെപിയില്‍നിന്നു പുറത്താക്കിയിരുന്നു.

മുഹമ്മദലി ജിന്നയെക്കുറിച്ച്് 2009-ല്‍ എഴുതിയ പുസ്തകത്തില്‍ ജിന്നയെ പ്രശംസിച്ചുവെന്ന വിവാദത്തെത്തുടര്‍ന്ന് ബിജെപിയില്‍നിന്ന് ആദ്യം പുറത്താക്കി. 2010-ല്‍ തിരിച്ചെത്തിയെങ്കിലും 2014-ല്‍ പാര്‍ട്ടി സീറ്റ് നിഷേധിച്ചതിനെത്തുടര്‍ന്നു ലോക്‌സഭാ തിരഞ്ഞെടുപ്പില്‍ രാജസ്ഥാനിലെ ബാര്‍മര്‍ മണ്ഡലത്തില്‍ വിമതനായി മത്സരിച്ചു. തുടര്‍ന്നു വീണ്ടും പുറത്താക്കി. ജസ്വന്ത് സിങ്ങിന്റെ നിര്യാണത്തില്‍ പ്രധാനമന്ത്രി നരേന്ദ്രമോദിയടക്കമുള്ള നേതാക്കള്‍ അനുശോചിച്ചു.