ഹാഥ്രസ് കേസില്‍ സി.ബി.ഐയുടെ പുതിയ കണ്ടെത്തല്‍. ഹാഥ്രസില്‍ ദലിത് പെണ്‍കുട്ടി കൊല ചെയ്യപ്പെട്ട കേസില്‍ കുറ്റാരോപിതരായ നാലു പേരില്‍ ഒരാള്‍ക്ക് പ്രായപൂര്‍ത്തിയായിട്ടില്ലെന്ന് എന്നാണ് സിബിഐ അന്വേഷണത്തില്‍ കണ്ടെത്തിരിക്കുന്നത്. സ്‌കൂള്‍ റെക്കോര്‍ഡുകള്‍ പ്രകാരം പ്രതികളില്‍ ഒരാള്‍ പ്രായപൂര്‍ത്തിയാവാത്ത ആളാണെന്ന് സിബിഐ വൃത്തങ്ങളെ ഉദ്ധരിച്ച് ഒരു ദേശീയ മാധ്യമം റിപ്പോര്‍ട്ട് ചെയ്തു.

കേസ് അന്വേഷിക്കുന്ന സിബിഐ സംഘം ഇന്നലെ പ്രതിയുടെ വീട്ടില്‍ സന്ദര്‍ശനം നടത്തിയിരുന്നു. കുടുംബാംഗങ്ങളെ ചോദ്യം ചെയ്ത ഉദ്യോഗസ്ഥര്‍ പ്രതിയുടെ സ്‌കൂള്‍ റെക്കോര്‍ഡുകള്‍ പരിശോധിച്ചു. ഉത്തര്‍പ്രദേശിലെ ബോര്‍ഡ് ഓഫ് ഹൈസ്‌കൂള്‍ ആന്‍ഡ് ഇന്റര്‍മീഡിയറ്റ് എജുക്കേഷന്‍ നടത്തിയ 2018ലെ ഹൈസ്‌കൂള്‍ പരീക്ഷയുടെ മാര്‍ക്ക്‌ലിസ്റ്റാണ് ഇത്. ഇതില്‍ പ്രതിയുടെ ജനനതീയതി രേഖപ്പെടുത്തിയിരിക്കുന്നത് 2/ 12/ 2002 എന്നാണ്.

മകന് പതിനെട്ട് തികയുന്നതേയുളളൂവെന്ന് പ്രതിയുടെ അമ്മയും സ്ഥിരീകരിച്ചതായി റിപ്പോര്‍ട്ടില്‍ പറയുന്നു. ഹാഥ്രസ് കേസിലെ നാലുപ്രതികളും നിലവില്‍ അലിഗഡ് ജയിലിലാണ്. സെപ്റ്റംബര്‍ 14നാണ് പത്തൊമ്പതുകാരിയായ പെണ്‍കുട്ടിയെ മേല്‍ജാതിക്കാരായ നാലു പേര്‍ ചേര്‍ന്ന് കൊലപ്പെടുത്തിയത്. ബലാത്സംഗം ചെയ്‌തെന്നാണ് പെണ്‍കുട്ടിയുടെ മരണമൊഴിയില്‍ പറയുന്നത്. എന്നാല്‍ മെഡിക്കല്‍ റിപ്പോര്‍ട്ട് ഇത് നിഷേധിച്ചിട്ടുണ്ട്.

പത്തു ദിവസം മുമ്പാണ് കേസിന്റെ അന്വേഷണം ഉത്തര്‍പ്രദേശ് പോലീസില്‍ നിന്ന് സി.ബി.ഐ ഏറ്റെടുക്കുന്നത്. യു.പി സര്‍ക്കാര്‍ നിയോഗിച്ച പ്രത്യേക സംഘമായിരുന്നു ഇതുവരെ അന്വേഷണം നടത്തിയിരുന്നത്. എന്നാല്‍ പെണ്‍കുട്ടിയുടെ മൃതദേഹം ധൃതി പിടിച്ച്, വിട്ടുകാരെ കാണിക്കാതെ സംസ്‌കരിച്ചതില്‍ ഉള്‍പ്പെടെ രാജ്യവ്യാപക പ്രതിഷേധമുയര്‍ന്നതോടെ ഒക്ടോബര്‍ മൂന്നിനാണ് സര്‍ക്കാര്‍ അന്വേഷണം സി.ബി.ഐക്ക് വിട്ടത്. സുപ്രീംകോടതി മേല്‍നോട്ടത്തിലുള്ള അന്വേഷമാണ് പെണ്‍കുട്ടിയുടെ കുടുംബം ആവശ്യപ്പെടുന്നത്. ഈ സി.ബി.ഐ അന്വേഷണത്തിലാണ് പ്രതികള്‍ക്ക് സഹായമാകുന്ന പുതിയ കണ്ടെത്തല്‍.