വീണ്ടും ബീഫ് വിഷയത്തില് മന്ത്രിമാര് കൊമ്പുകോര്ക്കുന്നു: മുക്താര് അബ്ബാസ് നഖ്വിയെ വെല്ലുവിളിച്ച് ആഭ്യന്തര സഹമന്ത്രി കിരണ് റിജിജു
മോഡി സര്ക്കാര് ഒന്നാം വാര്ഷികം ആഘോഷിക്കുന്ന വേളയില് ബീഫ് വിഷയത്തില് കൊമ്പുകോര്ക്കലുമായി കേന്ദ്രമന്ത്രിമാര്. രാജ്യവ്യാപകമായി ബീഫ് നിരോധിക്കണം എന്നും അത് കഴിക്കണം എന്ന് വാശിയുള്ളവര് ഇന്ത്യവിട്ട് പാക്കിസ്ഥാനിലേക്ക് പോയ്ക്കൊള്ളൂ എന്ന് കഴിഞ്ഞയാഴിച്ച കേന്ദ്രമന്ത്രി മുക്താര് അബ്ബാസ് നഖ്വി പറഞ്ഞിരുന്നു. അതിനെ വെല്ലുവിളിച്ചാണ് കേന്ദ്ര ആഭ്യന്തര സഹമന്ത്രി കിരണ് റിജിജു ഇപ്പോള് രംഗത്ത് എത്തിയിരിക്കുന്നത്. താന് ധാരാളമായി ബീഫ് കഴിക്കുമെന്നും എപ്പോള് എവിടെവെച്ച് കഴിച്ചാലും തന്നെ ആരും തടയില്ലെന്നും അദ്ദേഹം വ്യക്തമാക്കി.
മഹാരാഷ്ട്രയില് ഹൈന്ദവരാണ് കൂടുതലുള്ളതെങ്കില് അവരുടെ വിശ്വാസത്തിന് അനുസൃതമായ നിയമങ്ങള് അനുസരിക്കാന് അവരെ അനുവദിക്കാം. എന്നാല് താന് കഴിയുന്ന വടക്ക് കിഴക്കന് സംസ്ഥാനങ്ങളില് ഭൂരിഭാഗം പേരും ബീഫ് കഴിക്കുന്നവരാണ്. അവരുടെ ജീവിത രീതിയില് അവര്ക്ക് പ്രശ്നങ്ങളില്ല. എല്ലാ സ്ഥലങ്ങളില് താമസിക്കുന്നവരുടെ വികാരത്തേയും നമ്മള് മാനിക്കണം. അനേകം മതങ്ങളും ജാതികളും ഉള്ള ഈ രാജ്യത്ത് നമ്മള് എല്ലാവരുടേയും പ്രവര്ത്തികള്ക്ക് ബഹുമാനം നല്കണം. നമ്മളുടെ വിശ്വാസവും പ്രവര്ത്തികളും മറ്റാരിലും ബലം പ്രയോഗിച്ച് അടിച്ചേല്പ്പിക്കരുതെന്നും അത് ശരിയല്ലെന്നും റിജിജു കൂട്ടിച്ചേര്ത്തു.
മഹാരാഷ്ട്രയിലും ഹരിയാനയിലും ബീഫ് നിരോധിച്ചതിനെ തുടര്ന്നാണ് നഖ്വി ബീഫ് കഴിക്കാതെ പറ്റില്ല എന്നുള്ളവര്ക്ക് പാക്കിസ്ഥാനിലേക്കോ, അറബ് രാജ്യങ്ങളിലേക്കോ അല്ലെങ്കില് അവ ലഭ്യമായ ലോകത്തിലെ മറ്റെവിടങ്ങളിലേക്കുമോ പോകാമെന്ന് പറഞ്ഞത്. മുക്താര് അബ്ബാസ് നഖ്വിയുടെ പ്രസ്താവനയെ തള്ളി നേരത്തെ അരുണ് ജെയ്റ്റി അടക്കമുള്ളവര് രംഗത്തുവന്നിരുന്നു. ഇന്ത്യ ഒട്ടാകെ ഗോവധ നിരോധനം നടപ്പിലക്കാന് പോകുമെന്നായിരുന്നു കേന്ദ്ര ആഭ്യന്തര മന്ത്രിയായ രാജ്നാഥ് സിങ് വ്യക്തമാക്കിയത്.
അരുണാചല് പ്രദേശ് സ്വദേശിയായ താന് ബീഫ് കഴിക്കുമെന്നും തന്നെ ആര്ക്കെങ്കിലും തടയാനാവുമോ എന്നുമാണ് അദ്ദേഹം ചോദിച്ചത്. മറ്റൊരാളുടെ കാര്യങ്ങളില് നമുക്ക് ഇടപെടാതിരിക്കാം എന്നും റിജിജു വ്യക്തമാക്കി. മിസോറാമിന്റെ തലസ്ഥാനമായ ഐസ്വാളില് സന്ദര്ശനത്തിനെത്തിയപ്പോഴാണ് അദ്ദേഹം ഇക്കാര്യങ്ങള് പറഞ്ഞത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
