കേന്ദ്ര വിജ്ഞാപനം ഭരണഘടനാവിരുദ്ധം, റദ്ദാക്കണമെന്ന് ഡല്ഹിസഭയുടെ പ്രമേയം
ജനാധിപത്യ രീതിയില് തിരഞ്ഞെടുക്കപ്പെട്ട ഗവ.മെന്റിനെ ഇല്ലായിമ ചെയ്യാനുള്ള കളികളാണ് കേന്ദ്രസര്ക്കാര് നടത്തുന്നതെന്ന് എഎപി. ഡല്ഹിയില് പരമാധികാരം ലഫ്. ഗവര്ണര്ക്കാണെന്ന കേന്ദ്രസര്ക്കാര് വിജ്ഞാപനം ഭരണഘടനാ വിരുദ്ധമെന്ന് പ്രഖ്യാപിച്ച് റദ്ദാക്കണമെന്നുള്ള പ്രമേയം ആം ആദ്മി പാര്ട്ടി ഇന്നലെ ഡല്ഹി നിയമസഭയില് അവതരിപ്പിച്ചു. കേന്ദ്ര വിജ്ഞാപനം തള്ളിക്കളയുന്നതിന് രാഷ്ട്രപതി അദ്ദേഹത്തിന്റെ കീഴിലുള്ള പ്രത്യേക അധികാരം ഉപയോഗിക്കണമെന്നും പ്രമേയം അഭ്യര്ത്ഥിക്കുന്നു. പ്രമേയത്തിന്മേലുള്ള വോട്ടെടുപ്പ് ഇന്ന് നടക്കും.
കേന്ദ്ര വിജ്ഞാപനം ചര്ച്ച ചെയ്യാന് ചേര്ന്ന അടിയന്തര നിയമസഭാ സമ്മേളനത്തില് ആം ആദ്മി പാര്ട്ടി അംഗം സോമനാഥ് ഭാരതി അവതരിപ്പിച്ച സ്വകാര്യ പ്രമേയം സഭയുടെ പ്രമേയമായി അംഗീകരിക്കുകയായിരുന്നു.
ആഭ്യന്തര മന്ത്രാലയത്തിന്റെ ഭരണഘടനാവിരുദ്ധമായ വിജ്ഞാപനം ചൂണ്ടിക്കാട്ടി ലോക്സഭയിലെയും രാജ്യസഭയിലെയും എല്ലാ എം.പിമാര്ക്കും കത്തെഴുതണമെന്നും പ്രമേയത്തില് പറയുന്നു. പ്രമേയം പാസായ ശേഷം രാഷ്ട്രപതിയുടെ ഇടപെടലിനായി അയയ്ക്കും.
ഗവര്ണര്മാരെയും ലഫ്. ഗവര്ണര്മാരെയും ഇംപീച്ച് ചെയ്യുന്നതിന് സംസ്ഥാന സര്ക്കാരുകള്ക്ക് അധികാരം നല്കുന്നതിന് ഭരണഘടനയുടെ 155-ാം വകുപ്പില് ഭേദഗതി കൊണ്ടുവരണമെന്ന പ്രമേയവും അവതരിപ്പിക്കപ്പെട്ടു. ആം ആദ്മി എം.എല്.എയായ ആദര്ശ് ശാസ്ത്രിയാണ് ഇക്കാര്യം ആവശ്യപ്പെട്ടത്. എന്നാല്, ഇത് പാര്ട്ടി അഭിപ്രായമല്ലെന്ന് ആം ആദ്മി പാര്ട്ടി വ്യക്തമാക്കി.
അതിനിടെ, സ്പീക്കര് പക്ഷപാതപരമായാണ് സംസാരിക്കുന്നതെന്ന് ചൂണ്ടിക്കാട്ടി ബി.ജെ.പി അംഗങ്ങള് ബഹളം വച്ചതോടെ സഭാനടപടികള് തടസ്സപ്പെട്ടു. ലഫ്. ഗവര്ണറെ വിമര്ശിച്ച് സ്പീക്കര് സംസാരിച്ചത് ഭരണഘടനാ വിരുദ്ധമാണെന്ന് ചൂണ്ടിക്കാട്ടിയാണ് ആകെയുള്ള മൂന്ന് ബി.ജെ.പി അംഗങ്ങള് ബഹളം വച്ചത്. ഒടുവില് ബി.ജെ.പി അംഗമായ ഓം പ്രകാശ് ശര്മ്മയെ സഭയില് നിന്ന് പുറത്താക്കാന് മാര്ഷല്മാരോട് സ്പീക്കര് നിര്ദ്ദേശിച്ചു.
അധികാരങ്ങള് ലഫ്. ഗവര്ണറില് മാത്രം കേന്ദ്രീകരിക്കുന്ന ആഭ്യന്തര മന്ത്രാലയത്തിന്റെ വിജ്ഞാപനം സംശയം ജനിപ്പിക്കുന്നതാണെന്ന് ചര്ച്ചയ്ക്ക് തുടക്കമിട്ട ഉപമുഖ്യമന്ത്രി മനീഷ് സിസോഡിയ പറഞ്ഞു. ജനങ്ങള് തിരഞ്ഞെടുത്ത സര്ക്കാരിന്റെ അധികാരങ്ങള് കവര്ന്നെടുക്കാനുള്ള ശ്രമമാണ് വിജ്ഞാപനത്തിലൂടെ നടത്തുന്നത്. അഴിമതിക്കാര്ക്കെതിരായ സംസ്ഥാന സര്ക്കാരിന്റെ നടപടികളില് കേന്ദ്രം ഭയപ്പെടുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
