പ്രത്യേക സംവരണത്തിനായി രാജസ്ഥാനില്‍ ട്രെയിന്‍, റോഡ് ഗതാഗതം സ്തംഭിപ്പിച്ച് കഴിഞ്ഞ എട്ടുദിവസമായി ഗുജ്ജാര്‍ സമുദായാംഗങ്ങള്‍ നടത്തി വന്ന സമരം ഒത്തുതീര്‍പ്പായി. സമരസമിതി നേതാക്കളും സംസ്ഥാന മന്ത്രിമാരുമായി നടത്തിയ ചര്‍ച്ചയ്‌ക്കൊടുവിലാണ് സമരം ഒത്തുതീര്‍പ്പായത്. ഒ.ബി.സി വിഭാഗങ്ങള്‍ക്ക് അനുവദിച്ചിട്ടുള്ള 21 ശതമാനത്തില്‍ അഞ്ച് ശതമാനം പ്രത്യേക സംവരണം വേണമെന്ന ഗുജ്ജാര്‍ സമുദായത്തിന്റെ ആവശ്യം സര്‍ക്കാര്‍ അംഗീകരിച്ചതായി സമുദായ നേതാക്കള്‍ അറിയിച്ചു.
ഇക്കഴിഞ്ഞ 21നാണ് പ്രത്യേക സംവരണം നല്‍കണമെന്ന് ആവശ്യപ്പെട്ട് ഗുജ്ജാര്‍ സമുദായം ഡല്‍ഹി മുംബയ് റെയില്‍ പാതയും ആഗ്രജെയ്പൂര്‍ ദേശീയപാതയും ഉപരോധിക്കാന്‍ തുടങ്ങിയത്. ഉപരോധത്തെ തുടര്‍ന്ന് 100 ട്രെയിനുകളാണ് റദ്ദാക്കപ്പെട്ടത്. സമരം അവസാനിപ്പിക്കാന്‍ സംസ്ഥാന സര്‍ക്കാര്‍ നടപടിയെടുക്കണമെന്ന് രാജസ്ഥാന്‍ ഹൈക്കോടതി ഇന്നലെ കര്‍ശന നിര്‍ദ്ദേശം നല്‍കിയിരുന്നു. ഇതിന് പിന്നാലെ 4500 അര്‍ദ്ധസൈനികരെ കേന്ദ്രം നിയോഗിച്ചു.

ആയിരത്തോളം സേനാംഗങ്ങള്‍ ഇതിനകം തന്നെ രാജസ്ഥാനില്‍ എത്തിയിരുന്നു. കോടതി ഉത്തരവിന്റെ അടിസ്ഥാനത്തില്‍ സമരത്തെ നേരിടാന്‍ ശക്തമായ മാര്‍ഗങ്ങള്‍ ഉപയോഗിക്കാന്‍ സര്‍ക്കാര്‍ തീരുമാനിച്ചതിന് പിന്നാലെയാണ് വീണ്ടും ഒത്തുതീര്‍പ്പ് ചര്‍ച്ചകള്‍ നടന്നത്. കഴിഞ്ഞ ദിവസങ്ങളില്‍ ഒത്തുതീര്‍പ്പ് ചര്‍ച്ചകള്‍ പരാജയമായിരുന്നു.
സമരക്കാരെ അറസ്റ്റു ചെയ്ത് നീക്കാതിരുന്നതിന് ചീഫ് സെക്രട്ടറിക്കും ഡി.ജി.പിക്കുമെതിരെയാണ് കോടതി രൂക്ഷവിമര്‍ശനം നടത്തിയത്. സമരക്കാര്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്യാത്തതിന് ഇന്ന് സത്യവാങ്മൂലം സമര്‍പ്പിക്കണമെന്നും കോടതി നിര്‍ദ്ദേശിച്ചു. സമരത്തെ തുടര്‍ന്ന് പൊതുസ്വകാര്യ സ്വത്തുക്കള്‍ക്കുണ്ടായ നഷ്ടത്തിന്റെ കണക്കുകളും ഹാജരാക്കണമെന്ന് കോടതി ആവശ്യപ്പെട്ടിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha