ഗാസിപ്പുരിലെ സമരവേദിക്കു സമീപത്തുനിന്ന് പോലീസും കേന്ദ്രസേനയും മടങ്ങി.....ഇന്ന് കര്ഷകരെ സമരഭൂമിയില് നിന്ന് ഒഴിപ്പിച്ചേക്കില്ല, കൊടുംതണുപ്പിനെയും അതിജീവിച്ച് കാര്ഷിക നിയമങ്ങള്ക്കെതിരെ പ്രതിഷേധം കടുപ്പിക്കുകയാണ് കര്ഷകര്
ഗാസിപ്പുരിലെ സമരവേദിക്കു സമീപത്തുനിന്ന് പോലീസും കേന്ദ്രസേനയും മടങ്ങി. ഇന്ന് കര്ഷകരെ സമരഭൂമിയില്നിന്ന് ഒഴിപ്പിച്ചേക്കില്ല.
ഇന്നലെ രാത്രി 11 മണിയോടെ ഡല്ഹി-ഉത്തര്പ്രദേശ് അതിര്ത്തിയിലെ ഗാസിപ്പുരിലെ സമരഭൂമിയില് നിന്ന് ഒഴിഞ്ഞുപോകണമെന്നായിരുന്നു കര്ഷകര്ക്ക് പോലീസ് നിര്ദേശം നല്കിയിരുന്നത്. എന്നാല് സമരഭൂമിയില് നിന്ന് മടങ്ങില്ലെന്ന നിലപാടില് കര്ഷകര് ഉറച്ചുനില്ക്കുകയായിരുന്നു.
വന്പോലീസ് സന്നാഹമായിരുന്നു ഗാസിപ്പുരിലെ സമരവേദിക്കു സമീപത്തുണ്ടായിരുന്നത്. ജില്ല മജിസ്ട്രേട്ട് അടക്കമുള്ള ഉന്നതോദ്യോഗസ്ഥരും പ്രദേശത്ത് എത്തിയിരുന്നു.
അതേസമയം പോലീസ് അനുവദിച്ച സമയപരിധി അവസാനിച്ചതിനു പിന്നാലെ പടിഞ്ഞാറന് ഉത്തര് പ്രദേശില്നിന്നും മറ്റും നൂറുകണക്കിന് കര്ഷകര് സമരവേദിയിലേക്ക് എത്തിച്ചേര്ന്നിരുന്നു. സ്ത്രീകളും പ്രായമായവരും സമരവേദിയില് എത്തിയവരില് ഉള്പ്പെടുന്നുണ്ട്.
വെള്ളിയാഴ്ച പുലര്ച്ചെ കൂടുതല് കര്ഷകര് പടിഞ്ഞാറന് ഉത്തര്പ്രദേശില്നിന്നും എത്തിച്ചേരുമെന്നാണ് സൂചന. കൊടുംതണുപ്പിനെയും അതിജീവിച്ച് കാര്ഷിക നിയമങ്ങള്ക്കെതിരെ പ്രതിഷേധം കടുപ്പിക്കുകയാണ് കര്ഷകര്.
വ്യാഴാഴ്ച രാത്രി പതിനൊന്ന് മണിക്കുള്ളില് ഒഴിഞ്ഞില്ലെങ്കില് നടപടി സ്വീകരിക്കുമെന്നായിരുന്നു പോലീസിന്റെ മുന്നറിയിപ്പ്. എന്നാല് പോലീസ് നടപടിയുണ്ടായാല് അതിനെ നേരിടുമെന്നും വെടിവെച്ചാലും സമരവേദിയില് നിന്ന് മാറില്ലെന്നും രാകേഷ് ടിക്കായത്ത് പറഞ്ഞു. യു.പി. പോലീസിന് പുറമേ കേന്ദ്രസേനയേയും സമരഭൂമിക്ക് ചുറ്റും വിന്യസിച്ചിരുന്നു.
"
https://www.facebook.com/Malayalivartha