മോഡിക്കെതിരെ അദ്വാനി രാജ്യത്ത് അടിയന്തരാവസ്ഥ ആവര്ത്തിക്കില്ലെന്ന് ഉറപ്പു പറയാനാകില്ലെന്ന് അദ്വാനി
രാജ്യത്ത് അടിയന്തരാവസ്ഥ ആവര്ത്തിക്കില്ലെന്ന് ഉറപ്പു പറയാനാകില്ലെന്ന മുതിര്ന്ന ബിജെപി നേതാവ് എല്.കെ.അദ്വാനിയുടെ പരാമര്ശം കോണ്ഗ്രസ് ആയുധമാക്കുന്നു. അദ്വാനിയുടെ പരാമര്ശം പ്രതിപക്ഷം പാര്ലമെന്റ് സമ്മേളനത്തില് ആയുധമായി ഉപയോഗിക്കുമെന്നും ജിജെപി ഭയക്കുന്നുണ്ട്. നരേന്ദ്ര മോഡിയെ ലക്ഷ്യമിട്ടാണു പരാമര്ശമെന്നു പ്രതിപക്ഷം ആരോപിച്ചതോടെ ബിജെപി കൂടുതല് പ്രതിരോധത്തിലായി. ഡല്ഹി മുഖ്യമന്ത്രി അരവിന്ദ് കേജ്രിവാളും ബിഹാര് മുഖ്യമന്ത്രി നിതീഷ് കുമാറും അദ്വാനിയുടെ പരാമര്ശം ഏറ്റെടുത്തു മോഡിക്കെതിരെ രംഗത്തിറങ്ങി.
ഡല്ഹിയില് അടിയന്തരാവസ്ഥ പരീക്ഷിച്ചു കൊണ്ടിരിക്കയാണെന്നാണു കേജ്രിവാള് ആരോപിച്ചത്. അടിയന്തരാവസ്ഥ സാഹചര്യം എഴുതിത്തള്ളാനാകില്ലെന്ന അദ്വാനിയുടെ വിലയിരുത്തല് ശരിയാണെന്നും കേജ്രിവാള് പറഞ്ഞു. നിയമനസ്ഥലംമാറ്റ കാര്യങ്ങളില് സംസ്ഥാന സര്ക്കാരും ലഫ്.ഗവര്ണര് നജീബ് ജങും നിരന്തരം ഏറ്റുമുട്ടുന്ന പശ്ചാത്തലത്തിലാണു ഡല്ഹിമുഖ്യമന്ത്രിയുടെ വിമര്ശനമെന്നതും ശ്രദ്ധേയമാണ്.
ബിഹാര് സര്ക്കാര് ദിവസവും അടിയന്തരാവസ്ഥയ്ക്കു സമാനമായ സാഹചര്യങ്ങള് അഭിമുഖീകരിക്കുകയാണെന്നു മുഖ്യമന്ത്രി നിതീഷ് കുമാര് പറഞ്ഞു. അദ്വാനിയുടെ അഭിമുഖം മോഡിയുടെ രാഷ്ട്രീയത്തോടുള്ള പ്രതിഷേധമാണെന്ന് ആം ആദ്മി പാര്ട്ടി വക്താവ് അഷുതോഷ് പറഞ്ഞു. അദ്വാനിയുടെ പരാമര്ശം വ്യക്തികള്ക്കെതിരെയല്ലെന്നും സ്ഥാപനങ്ങളെ ഉദ്ദേശിച്ചാണെന്നും ബിജെപി വക്താവ് എം.ജെ.അക്ബര് ന്യായീകരിച്ചു. അദ്വാനിയുടെ കാഴ്ചപ്പാടിനോടു ബഹുമാനമുണ്ടെങ്കിലും രാജ്യത്ത് അടിയന്തരാവസ്ഥാസാധ്യതകളൊന്നും കാണുന്നില്ലന്നും അദ്ദേഹം പറഞ്ഞു.
അദ്വാനിയുടെ പരാമര്ശം മോഡദിക്കുള്ള സന്ദേശമായി കരുതുന്നില്ലെന്ന് ആര്എസ്എസ് നേതാവ് എം.ജി.വൈദ്യയും പ്രതികരിച്ചു. ജനാധിപത്യത്തെ അമര്ച്ച ചെയ്യാന് തല്പരരായവര് ശക്തരാണെന്നും പ്രമുഖ ഇംഗ്ലിഷ് പത്രത്തിനു നല്കിയ അഭിമുഖത്തില് അദ്വാനി മുന്നറിയിപ്പു നല്കിയിരുന്നു. പൗരസ്വാതന്ത്ര്യം നിഷേധിക്കപ്പെടില്ലെന്ന് ഉറപ്പാക്കാന് അടിയന്തരാവസ്ഥയ്ക്കുശേഷം എന്തെങ്കിലും ചെയ്തിട്ടുണ്ടെന്നു കരുതുന്നില്ലെന്നും അദ്വാനി പറഞ്ഞു.
അദ്വാനി പക്ഷക്കാരായ വിദേശകാര്യ മന്ത്രി സുഷമ സ്വരാജും രാജസ്ഥാന് മുഖ്യമന്ത്രി വസുന്ധര രാജെയും ലളിത് മോദി ബന്ധ വിവാദത്തില് കുടുങ്ങിയിരിക്കെയാണ് അദ്വാനിയുടെ ഇടപെടല്. സുഷമ വിവാദത്തില് നിന്നു ശ്രദ്ധ തിരിച്ചുവിടാനുള്ള അദ്വാനിയുടെ മാധ്യമതന്ത്രമാണ് അടിയന്തരാവസ്ഥാ പരാമര്ശമെന്ന വിലയിരുത്തലുമുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
