വോട്ടെടുപ്പ് ഓരോ ഘട്ടം പിന്നിടുമ്പോഴും തൃണമൂലിന് കടുത്ത ആശങ്കയാണ് ഉള്ളത് .മുന്‍പെങ്ങും കണ്ടിട്ടില്ലാത്ത തരത്തിലുള്ള അതിശക്തമായ പോരാട്ടമാണ് തൃണമൂലും ബി ജെ പിയും തമ്മില്‍ നടന്നുവരുന്നത് .

ഒരു ജീവന്‍ മരണ പോരാട്ടമായി മമത ഇതിനെ വിലയിരുത്തുന്നുമുണ്ട് .ഇക്കുറി ബി ജെ പിയോട് അടിയറവു പറഞ്ഞാല്‍ പിന്നെ തിരിച്ചു വരാന്‍ കഴിയാത്ത വിധത്തില്‍ തൃണമൂല്‍ നിലംപരിശാകും എന്ന ഭീതിയാണ് മമതയ്ക്ക് കൂടുതല്‍ വെല്ലുവിളി ഉയര്‍ത്തുന്നത് .



പ്രീ പോള്‍ സര്‍വേകളില്‍ പലതിലും ബി ജെ പിക്ക് നേരിയ മുന്‍തൂക്കം പ്രവചിക്കുന്നതും മമതയുടെ ഉറക്കം കെടുത്തുന്നു .ഇതിനിടയിലാണ് കൂനിന്മേല്‍ കുരു എന്ന തരത്തില്‍ ഇപ്പോള്‍ തിരഞ്ഞെടുപ്പ് കമ്മീഷന്റെ വക പ്രഹരം കൂടി ഉണ്ടായിരിക്കുന്നത് .

മമതാ ബാനര്‍ജിക്കെതിരെ നടപടി സ്വീകരിച്ച് ഇലക്ഷന്‍ കമ്മീഷന്‍ രംഗത്തെത്തിയത് ഒരു രാഷ്ട്രീയ കോളിളക്കം തന്നെയാണ് . തെരഞ്ഞെടുപ്പ് പ്രചാരണഘട്ടത്തില്‍ അക്രമങ്ങള്‍ക്ക് ആഹ്വാനം ചെയ്തുവെന്ന പേരിലാണ് കേസെടുത്തിരിക്കുന്നത്.

നാലാം ഘട്ട പോളിംഗ് നടക്കുന്നതിനിടെ നാലുപേരുടെ മരണത്തിനിടയായ സംഭവത്തിലാണ് നടപടി.സീതാല്‍കുച്ചിയില്‍ മമത നടത്തിയ പ്രകോപനമാണ് വ്യാപക അക്രമത്തിലേക്ക് നീങ്ങിയതെന്നാണ് എഫ്.ഐ.ആറില്‍ പറയുന്നത്.സിദ്ദിഖ് അലി മിയ എന്ന വ്യക്തിയാണ് മമതയ്ക്കെതിരെ കമ്മീഷനോട് പരാതി നല്‍കിയത്.

തെരഞ്ഞെടുപ്പില്‍ തനിക്കിഷ്ടമില്ലാത്തവരെ ഇല്ലാതാക്കാനുള്ള കുതന്ത്രങ്ങളാണ് മമത നടപ്പാക്കുന്നതെന്നും പരാതിയില്‍ പറയുന്നു. മമതയുടെ പ്രകോപനപരമായ പ്രസംഗം തൃണമൂല്‍ അണികളെ ഇളക്കിവിട്ടുവെന്നും പരാതിക്കാരന്‍ ഉന്നയിച്ചു.

മാത്രമല്ല വോട്ടു നേടാനായി ഗുരുതരവും കുറ്റകരവുമായ ഗൂഢാലോചനയാണ് മുഖ്യമന്ത്രി കൂടിയായ മമതാ ബാനര്‍ജി നടത്തിയത്. പൊതുപ്രസംഗങ്ങള്‍ അതിതീവ്രവും പ്രകോപനപരവുമാണ്.

കേന്ദ്രസേന കള്‍ക്കും അര്‍ദ്ധസൈനിക വിഭാഗങ്ങള്‍ക്കും നേരെ അക്രമം നടത്താന്‍ മമത ആഹ്വാനം ചെയ്തു. ഇസ്ലാമിക സമൂഹം താമസിക്കുന്ന മേഖലയില്‍ ഭീതി വിതച്ചതാണ് വ്യാപക അക്രമത്തിലേക്ക് നയിച്ചതെന്നും പരാതിയില്‍ വിശദമാക്കുന്നു.പോളിങ്ങിനോട് അനുബന്ധിച്ച് സ്ത്രീകളോട് പ്രത്യേക ആഹ്വാനവുമായി മമത രംഗത്തെത്തി.

നിങ്ങളെല്ലാ സ്ത്രീകളും പോളിംഗ് ബൂത്തിന് സമീപം നിലയുറപ്പിക്കണം. കയ്യില്‍ വടികളും ചൂലും, തവികളും, ചട്ടുകവുമൊക്കെ എടുക്കണം. എല്ലാവരും ഒരുമിച്ച് സുരക്ഷാ സൈനികരെ വളയണം.

സ്ത്രീകളായതിനാല്‍ നിങ്ങളെ അവര്‍ക്ക് ഒന്നും ചെയ്യാനാകില്ല. ഈ ബഹളങ്ങള്‍ക്കിടയില്‍ മറ്റുള്ളവര്‍ വോട്ട് ചെയ്യണം എന്ന മമതയുടെ പ്രസംഗവും ലഘുലേഖയും പരാതിക്കാരന്‍ തെളിവായി സമര്‍പ്പിച്ചു.