രണ്ടാം തരംഗത്തിൽ പകച്ചുനിൽക്കുന്ന ഇന്ത്യയെ കൂടെ ചേർത്ത് നിർത്തി മറ്റൊരു നിർണായകമായ നീക്കത്തിനു ഒരുങ്ങുകയാണ് അമേരിക്ക. ആഗോളതലത്തിൽ വാക്‌സിൻ ഉൽപ്പാദിപ്പിച്ച് വിതരണം നടത്താനൊരുങ്ങുകയാണ് അമേരിക്ക. ഇക്കാര്യത്തിൽ ഇന്ത്യ സുപ്രധാന പങ്കാളിയെന്ന് അമേരിക്ക വെളിപ്പെടുത്തി.

കൊറോണ പ്രതിരോധത്തിൽ ഇന്ത്യയെ സഹായിക്കുക മാത്രമല്ല മറിച്ച് വാക്‌സിൻ നിർമ്മാണത്തിലും കൈകോർക്കുമെന്ന് അമേരിക്ക അറിയിച്ചു. അമേരിക്കയുടെ കോൺഗ്രസ്സ് പ്രതിനിധി ബ്രാഡ് ഷെർമാനാണ് വിദേശകാര്യമന്ത്രി എസ്. ജയശങ്കറുമായി എല്ലാ സാദ്ധ്യതകളും ചർച്ച ചെയ്തത്. ഒപ്പം ഇന്ത്യാ-പെസഫിക് മേഖലയിലെ സുരക്ഷാ വിഷയങ്ങളും ഇവർ ചർച്ച ചെയ്യുകയുണ്ടായി.

ഷെർമാൻ ഇന്ത്യയ്ക്ക് വേണ്ട സഹായങ്ങളെ സംബന്ധിച്ചും വാക്‌സിൻ നിർമ്മാണത്തെ സംബന്ധിച്ചും ഇന്ത്യൻ അംബാസഡർ തരൺജീത് സിംഗ് സന്ധുവുമായി തുടർ ചർച്ചകൾ നടത്താമെന്ന ധാരണയിൽ ഒടുവിൽ എത്തുകയും ചെയ്തു. എസ്.ജയശങ്കർ നാളെ വരെ അമേരിക്കയിൽ ഉണ്ടാകും. കൊറോണ പ്രതിരോധത്തിനുള്ള അവശ്യവസ്തുക്കളുടെ നീക്കം, അമേരിക്കയിൽ നിന്നുള്ള വാക്‌സിൻ ഇന്ത്യയിലെത്തിക്കാനുള്ള സംവിധാനം., വാക്‌സിന്റെ ഗുണനിലവാരം സംബന്ധിച്ച ആരോഗ്യവകുപ്പുകളുടെ റിപ്പോർട്ടുകൾ എന്നിവ ചർച്ചചെയ്യാനാണ് ജയശങ്കർ പ്രധാനമായും അമേരിക്കയിലെത്തിയത്.

ഏഷ്യൻ മേഖലയിലെ സുരക്ഷാ പ്രശ്‌നവും ഇന്ത്യൻ പൗരന്മാരുടെ വിസ വിഷയവും ഇന്നും നാളെയുമായി ചർച്ച ചെയ്യും. അമേരിക്കയുടെ പ്രതിരോധ വകുപ്പുമായും സ്റ്റേറ്റ് ഡിപ്പാർട്ടുമെന്റുമായും ചർച്ചകൾ നടക്കുമെന്നാണ് ഇന്ത്യൻ വിദേശകാര്യവകുപ്പ് അറിയിച്ചത്.

അമേരിക്കയുമായി കൈകോർത്ത് ഇന്ത്യയെ പ്രതിസന്ധികളിൽ നിന്നും രക്ഷിക്കാനുള്ള മാർഗങ്ങൾ ആരായുകയാണ് ഇന്ത്യ.