പശ്ചിമബംഗാളിലെത്തിയ പ്രധാനമന്ത്രി നരേന്ദ്ര മോഡിയെ മുഖ്യമന്ത്രി മമതാ ബാനര്‍ജി കാത്തിരിപ്പിച്ചെന്ന വിവാദത്തില്‍ പ്രതികരണവുമായി തൃണമൂല്‍ കോണ്‍ഗ്രസ് എം.പി മഹുവ മോയിത്ര. യാസ് ചുഴലിക്കാറ്റ് നാശനഷ്ടം അവലോകനത്തിനായിട്ടായിരുന്നു മോഡി എത്തിയത്.

'15 ലക്ഷത്തിനു വേണ്ടി ഇന്ത്യക്കാര്‍ ഏഴു വര്‍ഷമായി കാത്തിരിക്കുന്നു, എ.ടി.എമ്മിന് മുന്നിലും വാക്‌സിന് വേണ്ടിയും കാത്തിരുന്നു; എന്നിട്ടാണോ 30 മിനിറ്റിന്റെ പേരില്‍ വലിയ ഒച്ചപ്പാടുണ്ടാകുന്നത്?. നിങ്ങള്‍ക്കും കുറച്ച് കാത്തിരിക്കാം' മഹുവ മോയിത്ര പറഞ്ഞു.
ഒഡിഷയിലെ യോഗം കഴിഞ്ഞ് പശ്ചിമബംഗാളിലെത്തിയ മോഡിയെ പ്രോട്ടോക്കോള്‍ പ്രകാരം മമത സ്വീകരിച്ചില്ലെന്നും മോഡി യോഗത്തിനെത്തി അരമണിക്കൂര്‍ നേരം കാത്തിരുന്നിട്ടും മമത എത്തിയില്ലെന്നുമായിരുന്നു ആരോപണം. മോഡി മമതയെ അരമണിക്കൂര്‍ നേരം കാത്തിരുന്നു വെന്നു പറഞ്ഞ് മമതയുടെ ഒഴിച്ചിട്ട കസേരയുടെ ചിത്രം ബി.ജെ.പി നേതാക്കള്‍ പ്രചരിപ്പിച്ചിരുന്നു.