പ്രധാനമന്ത്രി നരേന്ദ്ര മോദിയെ പുകഴ്ത്തി ശിവസേന നേതാവ് സഞ്ജയ് റാവത്ത്. നരേന്ദ്ര മോദി രാജ്യത്തെ പ്രമുഖ നേതാവാണെന്നും ബി.ജെ.പിയുടെ വിജയത്തിന് പിന്നില്‍ അദ്ദേഹമാണെന്നും റാവത്ത് പറഞ്ഞു. മഹാരാഷ്ട്ര മുഖ്യമന്ത്രി ഉദ്ധവ് താക്കറെ പ്രധാനമന്ത്രിയുമായി കൂടിക്കാഴ്ച നടത്തിയതിന് പിന്നാലെയാണ് മോദിയെ പുകഴ്ത്തി റാവത്ത് രംഗത്ത് വന്നിരിക്കുന്നത്.

കടുവയുമായി (ശിവസേനയുടെ ചിഹ്നം) ആര്‍ക്കും ചങ്ങാത്തം കൂടാനാവില്ല. ആരുമായി ചങ്ങാത്തം കൂടണമെന്ന് കടുവ തീരുമാനിക്കും-ബി.ജെ.പിയും ശിവസേനയും തമ്മില്‍ സഖ്യമുണ്ടാവുമോ എന്ന ചോദ്യത്തിന് മറുപടിയായി അദ്ദേഹം പറഞ്ഞു.

മഹാരാഷ്ട്രയില്‍ രാഷ്ട്രീയ മാറ്റങ്ങളുണ്ടാവുമോ എന്ന ചോദ്യത്തിനോട് പ്രതികരിക്കാന്‍ അദ്ദേഹം തയ്യാറായില്ല. മാധ്യമ റിപ്പോര്‍ട്ടുകളെക്കുറിച്ച്‌ പ്രതികരിക്കാനില്ലെന്ന് അദ്ദേഹം പറഞ്ഞു. അതിനെക്കുറിച്ച്‌ ഔദ്യോഗിക പ്രഖ്യാപനങ്ങള്‍ വരുമെന്നും അദ്ദേഹം പറഞ്ഞു.