തമിഴ്​നാട്ടില്‍ കോവിഡ്​ 19 പ്രതിരോധ നടപടികളുടെ ഭാഗമായി അടച്ചുപൂട്ടിയ മദ്യശാലകള്‍ ഒരു മാസത്തിന്​ ശേഷം ഇന്ന്​ മുതല്‍ വീണ്ടും തുറന്നു. തമിഴ്നാട് സര്‍ക്കാറിന്റെ ബിവറേജസ്​ ഔട്ട്‌ലെറ്റുകള്‍ മാത്രമാണ് തുറന്നത്. സ്വകാര്യ ബാറുകളും മറ്റും ഇപ്പോഴും അടഞ്ഞു തന്നെയാണ്​ കിടക്കുന്നത്​. രാവിലെ 10 മുതല്‍ വൈകുന്നേരം 5 മണി വരെയാണ് പ്രവര്‍ത്തന സമയം അനുവദിച്ചിട്ടുള്ളത്​.

മാസ്​ക്​ ധരിക്കാത്തവര്‍ക്ക്​ മദ്യം നല്‍കേണ്ടതില്ല എന്നാണ്​ അധികൃതര്‍ തീരുമാനിച്ചിട്ടുള്ളത്​. ഒരാള്‍ക്ക്​ ഒരു ഫുള്‍ ബോട്ടില്‍ മദ്യം മാത്രമാണ്​ നല്‍കുന്നത്​. മദ്യം വാങ്ങാനെത്തുന്നവര്‍ക്ക്​ സാനിറ്റൈസര്‍ നല്‍കുകയും അവരോട്​ സാമൂഹിക അകലം പാലിക്കാന്‍ ​ആവശ്യപ്പെടുകയും ചെയ്​തു. തിരക്ക്​ നിയന്ത്രിക്കാനായി പൊലീസിനെയും വിന്യസിച്ചിരുന്നു. കേരളത്തില്‍ നിന്ന്​ അതിര്‍ത്തി കടന്ന്​ മദ്യം വാങ്ങാനെത്തുന്നത്​ തടയാനായി അതിര്‍ത്തിപ്രദേശമായ കന്യാകുമാരി ജില്ലയിലെ കൊല്ലങ്കോട്, ഊരമ്ബ്, കളിയിക്കാവിള, കന്നുമ്മാമൂട് എന്നീ പ്രദേശങ്ങളിലെ മദ്യശാലകള്‍ തുറന്നിട്ടില്ല.

ഒരുമാസത്തിന്​ ശേഷം സംസ്ഥാനത്ത് മദ്യവില്‍പ്പന ശാലകള്‍ വീണ്ടും തുറക്കാന്‍ തമിഴ്‌നാട് സര്‍ക്കാര്‍ അനുമതി നല്‍കിയതിനെത്തുടര്‍ന്ന് മധുര സ്വദേശിയായ ഒരാള്‍ മദ്യക്കുപ്പികള്‍ ആരാധിക്കുന്ന വിഡിയോയും ഇന്ന്​ സമൂഹ മാധ്യമങ്ങളില്‍ വൈറലായിരുന്നു.