അരിയിലെ മായം പിടിക്കാന് കേന്ദ്രം
കേരളത്തില് റേഷന് കടകള് വഴി വിതരണം ചെയ്യേണ്ട അരിയില് നിറം ചേര്ത്ത് നല്ലയിനം കുത്തരിയെന്ന വ്യാജേന വില്ക്കുന്ന മില്ലുകളുടെ വിവരം ശേഖരിക്കാന് കേന്ദ്ര ഭക്ഷ്യ പൊതുവിതരണ വകുപ്പ് നിര്ദേശം നല്കി. കേന്ദ്രമന്ത്രി രാംവിലാസ് പസ്വാന് ഇതുസംബന്ധിച്ച് വിവിധ സംസ്ഥാനങ്ങള്ക്കു നല്കിയ നിര്ദേശങ്ങളുടെ അടിസ്ഥാനത്തില്, നിയമവിരുദ്ധമായി പ്രവര്ത്തിക്കുന്ന മില്ലുകളെ പിടികൂടാന് ഭക്ഷ്യസുരക്ഷാ വകുപ്പ് നീക്കം തുടങ്ങി.
കോട്ടയം ജില്ലയില് ഭക്ഷ്യസുരക്ഷാ വിഭാഗം കഴിഞ്ഞ ദിവസം നടത്തിയ റെയ്ഡില് പിടിച്ചെടുത്ത അരിയുടെ സാമ്പിള് പരിശോധനയ്ക്കായി ലാബറട്ടറിയിലേക്ക് അയച്ചിരിക്കുകയാണ്. സംസ്ഥാനത്ത് ഏറ്റവും കൂടുതല് അരിമില്ലുകളുള്ള എറണാകുളം ജില്ലയിലും പരിശോധന ശക്തമാക്കും. കേരളത്തിലെ ഭക്ഷ്യസുരക്ഷ സംബന്ധിച്ച് നിരവധി പരാതികളാണ് കേന്ദ്രത്തിന് ലഭിച്ചുകൊണ്ടിരിക്കുന്നത്.
റെഡ് ഓക്സൈഡില് തവിടെണ്ണ ചേര്ത്ത് അരിയില് കലര്ത്തി നിറം മാറ്റിയുള്ള വില്പന നിരന്തരം നടക്കുന്നത് കേന്ദ്രശ്രദ്ധയില്പെടുത്തിയതായി ലോക് ജനശക്തി പാര്ലമെന്ററി പാര്ട്ടി ചെയര്പേഴ്സണ് രമ ജോര്ജ് അറിയിച്ചു. വിവിധ ജില്ലകളില് നിന്നു ലഭിച്ച പരാതികള് പാര്ട്ടി അധ്യക്ഷന് കൂടിയായ കേന്ദ്രമന്ത്രി പസ്വാനു കൈമാറിയെന്നും അവര് പറഞ്ഞു.
രണ്ട് രൂപയ്ക്ക് റേഷന് കാര്ഡ് ഉടമകള്ക്കു നല്കേണ്ട അരിയാണ് കിലോയ്ക്ക് 30 രൂപയിലധികം വിലയ്ക്ക് പൊതുവിപണിയില് മറിച്ചുവില്ക്കുന്നത്. സംസ്ഥാനത്ത് പ്രതിമാസം എത്തുന്ന 1,15,000 ടണ് അരിയില് 50,000 ടണ് അരിയും കരിഞ്ചന്തയിലേക്കു പോകുന്നുവെന്ന കണക്ക് കേന്ദ്രത്തെ ഞെട്ടിച്ചിട്ടുണ്ട്. എഫ്.സി.ഐ. ഗോഡൗണിനും റേഷന് കടയ്ക്കും ഇടയ്ക്കുവച്ച് വഴിതിരിച്ചുവിടുന്ന അരി കൊണ്ട് അമിതലാഭം നേടുന്ന സംഘങ്ങള് രാഷ്ട്രീയസ്വാധീനം ഉപയോഗിച്ചാണു തടിതപ്പുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha