ജമ്മുകശ്മീരിൽ വീണ്ടും ഒരു അപകടം സംഭവിച്ചിരിക്കുന്നുവെന്ന വിവരമാണ് പുറത്ത് വരുന്നത്. സൈനിക ഹെലികോപ്റ്റർ തകർന്ന് വീണിരിക്കുകയാണ് കശ്മീരിൽ. എഎൽഎച്ച് ധ്രുവ് ഹെലികോപ്റ്റർ ഇന്ന് രാവിലെയോടെ കിഷ്ത്വാറിൽ തകർന്ന് വീഴുകയായിരുന്നു. പൈലറ്റടക്കം മൂന്ന് പേർ ഹെലികോപ്ടറിലുണ്ടായിരുന്നു. മൂവരും പരിക്കുകളോടെ രക്ഷപ്പെട്ടുവെന്നും സൈന്യം വ്യക്തമാക്കി. എല്ലാവരെയും ആശുപത്രിയിലേക്ക് മാറ്റിയിരിക്കുകയാണ് .

ഒരു നദിക്ക് സമീപത്തായിരുന്നു ഹെലികോപ്ടർ തകർന്നുവീണത്. പ്രദേശവാസികളുടെ കൂടി സഹായത്തോടെ രക്ഷാ പ്രവർത്തനം ശക്തമാക്കിയിട്ടുണ്ട്. കൂടുതൽ വിവരങ്ങൾ വരും മണിക്കൂറുകളിൽ പുറത്ത് വരും. അതേസമയം രാജ്യത്തെ നടുക്കിയ തീവ്രവാദ ആക്രമണമായിരുന്നു പൂഞ്ചിൽ അരങ്ങേറിയത്.അതിന്റെ ഷോക്ക് മാറുന്നതിനു മുന്നെയാണ് ഇപ്പോൾ ഈ സംഭവം ഉണ്ടായിരിക്കുന്നത്.

പൂഞ്ചിലെ ഭിംബർ ഗലിയിൽ കഴിഞ്ഞ മാസം 21നായിരുന്നു സൈനിക വാഹനത്തിനു നേരെ ആക്രമണം ഉണ്ടായത്. അഞ്ച്‌ സൈനികർ കൊല്ലപ്പെട്ടിരുന്നു. പാക്കിസ്ഥാനിൽ നിന്ന് ഡ്രോൺ വഴി കിട്ടിയ ആയുധങ്ങളാണ് ആക്രമണത്തിന് ഉപയോഗിച്ചതെന്നും പൊലീസ് വ്യക്തമാക്കി. ബുള്ളറ്റ് പ്രൂഫ് കവചം തുളച്ചു കയറാൻ കെൽപുള്ള സ്റ്റീൽ കോർ ബുള്ളറ്റുകളാണു തീവ്രവാദികൾ ആക്രമണത്തിനായി ഉപയോഗിച്ചത് എന്നും കണ്ടെത്തിയിരുന്നു മോശം കാലാവസ്ഥ കാരണം സൈനിക വാഹനം വേഗം കുറച്ചപ്പോഴായിരുന്നു ഇത്തരത്തിലൊരു ആക്രമണം ഉണ്ടായത് .