മുംബയ് ഭീകരാക്രമണത്തില്‍ പ്രകോപനപരമായ വെല്ലുവിളിയുമായി ഭീകരസംഘടനയായ ജമാ അത് ഉദവ തലവന്‍ ഹാഫിസ് സെയ്ദ്. തന്റ പങ്ക് തെളിയിയ്ക്കാന്‍ ഇന്ത്യയ്ക്ക് ധൈര്യമുണ്ടോ എന്നായിരുന്നു സെയ്ദിന്റെ വെല്ലുവിളി. അള്ളാഹുവിന്റെ കൃപയാല്‍ തന്റെ പങ്ക് ഒരു തരത്തിലും തെളിയിയ്ക്കാന്‍ ഇന്ത്യയെക്കൊണ്ട് കഴിയില്ലെന്നും ഹാഫിസ് സെയ്ദ് പറഞ്ഞു. പാക്കിസ്താനുമായുള്ളസമാധാന ചര്‍ച്ചകള്‍ നടന്ന് കൊണ്ടിരിക്കെയാണ് ഇത്തരത്തിലുള്ള പ്രകോപനം. ട്വിറ്ററില്‍ പോസ്റ്റ് ചെയ്ത വീഡിയോ സന്ദേശത്തിലാണ് ഹാഫിസ് ഇക്കാര്യം പറഞ്ഞത്. പാരീസില്‍ ഇന്ത്യന്‍ പ്രധാനമന്ത്രി നരേന്ദ്ര മോദിയുമായി ചര്‍ച്ച നടത്തിയ പാകിസ്ഥാന്‍ പ്രധാനമന്ത്രി നവാസ് ഷെരീഫിന്റെ നടപടിയെ ഹാഫിസ് സെയ്ദ് രൂക്ഷമായി വിമര്‍ശിച്ചു.

പാകിസ്ഥാന്‍ സന്ദര്‍ശിച്ച വിദേശകാര്യമന്ത്രി സുഷമ സ്വരാജിന് മുംബയ് ഭീകരാക്രമണ കേസിലെ നടപടികള്‍ വേഗത്തിലാക്കുമെന്ന് പാക് അധികൃതര്‍ ഉറപ്പ് നല്‍കിയിരുന്നു. ഈ പശ്ചാത്തലത്തിലാണ് ഹാഫിസ് സെയ്ദിന്റെ പരാമര്‍ശം. ഞങ്ങളുടെ സര്‍ക്കാര്‍ മിണ്ടാതിരിയ്ക്കുന്നു. അത് കൊണ്ട് ഞാന്‍ തന്നെ സുഷമയ്ക്ക് മറുപടി തരാം എന്ന് ഹാഫിസ് പറയുന്നു. മുംബയ് ആക്രമണവുമായി ബന്ധപ്പെട്ട് എന്തെങ്കിലും തെളിവ് കണ്ടെത്താന്‍ ഇന്ത്യയ്ക്ക് ഇതുവരെ കഴിഞ്ഞിട്ടില്ലെന്നും ഹാഫിസ് സെയ്ദ് വീഡിയോയില്‍ പറഞ്ഞു.

അതേ സമയം ഹാഫിസിന്റെ വെല്ലുവിളിയെ ഇന്ത്യ തള്ളി. ഇന്ത്യയുടെ പരമാധികാരത്തിന് വെല്ലുവിളിയാകുന്ന ഏത് തരത്തിലുള്ള ഭീഷണികളേയും നേരിടാന്‍ സര്‍വസജ്ജമാണ് രാജ്യമെന്നും ഹാഫിസ് സെയ്ദിന്റെ പ്രസ്താവനയെ ഗൗരവമായി കാണുന്നേയില്ലെന്നും പ്രധാനമന്ത്രിയുടെ ഓഫീസിന്റെ ചുമതലയുള്ള കേന്ദ്ര സഹമന്ത്രി ജിതേന്ദ്ര സിംഗ് പറഞ്ഞു. അതേ സമയം പാകിസ്ഥാനുമായുള്ള ബന്ധത്തില്‍ കേന്ദ്രസര്‍ക്കാര്‍ സ്വീകരിയ്ക്കുന്നത് ദുര്‍ബലമായ നിയവും നിലപാടുമാണെന്ന് കോണ്‍ഗ്രസ് കുറ്റപ്പെടുത്തി. ഇത്തരം സാഹചര്യങ്ങളില്‍ ഉഭയകക്ഷി ചര്‍ച്ചകള്‍ നടത്തുന്നത് ഇതിന്റെ ലക്ഷണമാണ്. 2008 ല്‍ മുംബൈയില്‍ 197 പേരുടെ മരണത്തിന് ഉത്തരവാദിയായ ഹാഫിസ് സെയ്ദ് ഇപ്പോള്‍ ഇത്തരം പ്രകോപനപരമായി പ്രസ്താവനകള്‍ നടത്തുകയാണ്. ഇതാണോ പാകിസ്ഥാനുമായി ഇന്ത്യ നടത്തുന്ന ചര്‍ച്ചകളുടെ ഫലമെന്ന് കോണ്‍ഗ്രസ് നേതാവ് പ്രമോദ് തിവാരി ചോദിച്ചു. പാകിസ്ഥാന്‍ ആദ്യം ഹാഫിസിനെ വിചാരണയ്ക്കായി ഇന്ത്യയ്ക്ക് വിട്ടുതരുകയും ഭീകരപ്രവര്‍ത്തനം അവസാനിപ്പിയ്ക്കുകയും വേണമെന്ന് തിവാരി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക