ഇന്ത്യ സ്വതന്ത്രമായി ഡ്രോണ്‍ വികസിപ്പിക്കുന്ന (ആളില്ലാ യുദ്ധ നിരീക്ഷണ ചെറു വിമാനം) പദ്ധതിക്ക് കേന്ദ്ര മന്ത്രിസഭ ഉടന്‍ അംഗീകാരം നല്‍കും. ശത്രുക്കളുടെ മിസൈലുകളെ വെടിവച്ചു തകര്‍ക്കാന്‍ ശേഷിയുള്ള 2650 കോടി രൂപയുടെ \'ഘാതക് \' പദ്ധതിക്ക് പ്രതിരോധ വകുപ്പ് നേരത്തെ അംഗീകാരം നല്‍കിയിരുന്നു.
പദ്ധതിക്ക് അനുകൂലമായ റിപ്പോര്‍ട്ടാണ് ധനകാര്യ മന്ത്രാലയത്തിന് കീഴിലുള്ള വിദഗ്ദ്ധ സമിതിയും തയ്യാറാക്കിയിട്ടുള്ളതെന്നാണ് സൂചന. ധനകാര്യമന്ത്രാലയത്തിന്റെ അംഗീകാരം ലഭിച്ചാലുടന്‍ പദ്ധതി കേന്ദ്ര മന്ത്രിസഭയുടെ മുന്നിലെത്തും. ഡ്രോണുകളുടെ നിര്‍മ്മാണം പഠിക്കുന്നതിനായി 2009-ല്‍ കേന്ദ്രം കൊണ്ടുവന്ന ആട്ടോണോമസ് അണ്‍മാന്‍ഡ് റിസര്‍ച്ച് എയര്‍ക്രാഫ്റ്റ് (ഔറ) പദ്ധതി നേരത്തെ വിജയകരമായി ഗവേഷണം നടത്തിയിരുന്നു. ഇതിന്റെ ഭാഗമായിട്ടാണ് ഘാതക് വരുന്നത്.
പത്ത് വര്‍ഷത്തിനകം സ്വന്തം ഡ്രോണുകളെ രംഗത്തിറക്കാനാണ് ഇന്ത്യയുടെ ആലോചന. റഡാര്‍ കണ്ണുകളെ കബളിപ്പിച്ച് പറന്ന് മിസൈലുകളെ തകര്‍ക്കാന്‍ കഴിവുള്ള ഡ്രോണുകളാണ് ഇന്ത്യ വികസിപ്പിക്കുക. ബോംബിംഗ് നടത്തുന്നതിന് ഫൈ്ലറ്റുകളെ ഒഴിവാക്കാനും കഴിയും.
1999-ലെ കാര്‍ഗില്‍ യുദ്ധത്തിന് ശേഷം ഇസ്രയേലില്‍ നിന്ന് വാങ്ങിയ 200 ഡ്രോണുകളാണ് ഇപ്പോള്‍ ഇന്ത്യയുടെ പക്കലുള്ളത്. ദീര്‍ഘദൂര നിരീക്ഷണത്തിനുള്ള ഇസ്രയേലി ഹെറോണ്‍ ആന്‍ഡ് സര്‍ച്ചര്‍ രണ്ട് ഡ്രോണ്‍, ഇസ്രയേലിന്റെ തന്നെ ഹറോപ് കില്ലര്‍ ഡ്രോണുകളും ഇന്ത്യയുടെ കൈവശമുണ്ട്.
ഇന്ത്യ നേരത്തെ മരവിപ്പിച്ചു വച്ചിരുന്ന കാവേരി യുദ്ധവിമാന എന്‍ജിന്‍ പദ്ധതിയുടെ പരിഷ്‌കരിച്ച പതിപ്പായിരിക്കും ഘാതകിനായി ഉപയോഗിക്കുക. 1989-ല്‍ തുടങ്ങിയ കാവേരി പദ്ധതിയുടെ കീഴില്‍ വികസിപ്പിച്ച എന്‍ജിനുകള്‍ യുദ്ധവിമാനങ്ങള്‍ക്ക് ഉപയോഗിക്കാന്‍ കഴിയാതെ വന്നിരുന്നു. ഇവയാണ് ഘാതകിനായി ഉപയോഗിക്കുകയെന്ന് അറിയുന്നു. ഇതോടെ കാവേരിക്കായി ചെലവഴിച്ച 2839 കോടി രൂപ പാഴാവില്ലെന്നാണ് കണക്കുകൂട്ടല്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha