ഡല്‍ഹി മുഖ്യമന്ത്രി അരവിന്ദ് കെജ് രിവാളിന്റെ ഓഫീസ് റെയ്ഡ് ചെയ്‌തെന്ന ആരോപണം സിബിഐ നിഷേധിച്ചു. കഴിഞ്ഞ ആഴ്ച കൈക്കൂലി കേസില്‍ അറസ്റ്റിലായ ഉന്നത ഉദ്യോഗസ്ഥന്റെ ഓഫീസില്‍ മാത്രമാണ് പരിശോധന നടത്തിയതെന്ന് സിബിഐ വിശദീകരിച്ചു.

തന്റെ ഓഫീസ് സിബിഐ പരിശോധന നടത്തി സീല്‍ ചെയ്തതായി മുഖ്യമന്ത്രി അരവിന്ദ് കെജ് രിവാള്‍ ഇന്നു രാവിലെ ട്വിറ്ററിലൂടെ ആരോപിച്ചിരുന്നു. ഇതേ തുടര്‍ന്നാണ് സിബിഐയുടെ വിശദീകരണം. പ്രധാനമന്ത്രിയുടെ ഓഫീസാണ് റെയ്ഡിന് പിന്നിലെന്നും കെജ് രിവാള്‍ ആരോപിച്ചിരുന്നു.

തന്നെ രാഷ്ട്രീയമായി എതിരിടാനാവാത്തതിനാല്‍ പ്രധാനമന്ത്രി ഇത്തരം ഭീരുത്വം നിറഞ്ഞ വഴികള്‍ തെരഞ്ഞെടുക്കുകയാണെന്നും എന്ത് ഫയലുകളാണ് പ്രധാനമന്ത്രിക്ക് തന്റെ ഓഫീസില്‍ നിന്ന് വേണ്ടതെന്നും കെജ് രിവാള്‍ ചോദിച്ചിരുന്നു.

കെജ്‌രിവാളിന്റെ ആരോപണം നിഷേധിച്ച കേന്ദ്രമന്ത്രി വെങ്കയ്യ നായിഡു സിബിഐയെ നിയന്ത്രിക്കുന്നത് കേന്ദ്രസര്‍ക്കാരല്ലെന്നും വ്യക്തമാക്കിയിരുന്നു.

കഴിഞ്ഞ ആഴ്ച കൈക്കൂലി കേസില്‍ ഡല്‍ഹിയിലെ പട്ടികജാതി പട്ടികവര്‍ഗ ന്യൂനപക്ഷ ക്ഷേമ വിഭാഗം പ്രിന്‍സിപ്പല്‍ സെക്രട്ടറി സഞ്ജയ് പ്രതാപ് സിംഗിനെ സിബിഐ അറസ്റ്റ് ചെയ്തിരുന്നു. ഒരു റിക്രൂട്ട്‌മെന്റ് ഏജന്‍സിയില്‍ നിന്നും 2.2 ലക്ഷം രൂപ കൈക്കൂലി വാങ്ങുന്നതിനിടെ ആയിരുന്നു ഇയാളെയും പേഴ്‌സണല്‍ അസിസ്റ്റന്റിനെയും അറസ്റ്റ് ചെയ്തത്.

തന്റെ ഡിപ്പാര്‍ട്ട്‌മെന്റിലേക്ക് കരാര്‍ അടിസ്ഥാനത്തില്‍ പീയൂണ്‍മാരെയും സെക്യൂരിറ്റി ജീവനക്കാരെയും നല്‍കുന്ന സ്ഥാപനത്തില്‍ നിന്നായിരുന്നു ഇയാള്‍ കൈക്കൂലി വാങ്ങിയത്. പരാതിയെ തുടര്‍ന്നായിരന്നു സിബിഐയുടെ നടപടി. ഈ കേസിന്റെ തുടരന്വേഷണത്തിന്റെ ഭാഗമായാണ് റെയ്ഡ് നടത്തിയതെന്നാണ് സിബിഐ കേന്ദ്രങ്ങള്‍ പറയുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha