വിമര്ശനങ്ങള്ക്കു മറുപടിയുമായി ശരദ് പവാറിന്റെ മകളും ലോക്സഭാംഗവുമായ സുപ്രിയ സുളെ
എന്സിപിയുടെ വര്ക്കിങ് പ്രസിഡന്റായി നിയമിച്ചത് സ്വജനപക്ഷപാതമാണെന്ന വിമര്ശനങ്ങള്ക്കു മറുപടിയുമായി ശരദ് പവാറിന്റെ മകളും ലോക്സഭാംഗവുമായ സുപ്രിയ സുളെ. ഏതു പാര്ട്ടിയിലാണു സ്വജനപക്ഷപാതമില്ലാത്തതെന്നു സുപ്രിയ മാധ്യമപ്രവര്ത്തകരോട് ചോദിച്ചു. സ്വജനപക്ഷപാതത്തെക്കുറിച്ചു സംസാരിക്കുമ്പോള് തന്നെ എന്തുകൊണ്ട് മികച്ച പ്രകടനത്തെക്കുറിച്ചു സംസാരിച്ചുകൂടായെന്നും സുപ്രിയ ചോദിച്ചു.
എന്സിപി വര്ക്കിങ് പ്രസിഡന്റുമാരായി രാജ്യസഭാംഗം പ്രഫുല് പട്ടേല്, സുപ്രിയ സുളെ എന്നിവരെ ശനിയാഴ്ചയാണ് പാര്ട്ടി അധ്യക്ഷന് ശരദ് പവാര് നിയമിച്ചത്. പാര്ട്ടിയുടെ 24–ാം സ്ഥാപകദിനത്തോടനുബന്ധിച്ചു നടന്ന ചടങ്ങില്, അജിത് പവാര് ഉള്പ്പടെയുള്ള മുതിര്ന്ന നേതാക്കളുടെ സാന്നിധ്യത്തിലായിരുന്നു പവാറിന്റെ അപ്രതീക്ഷിത പ്രഖ്യാപനം. പാര്ട്ടിയില് രണ്ടാമനാകാന് നീക്കം നടത്തിയിരുന്ന സഹോദരപുത്രന് അജിത് പവാറിനെ തഴഞ്ഞാണ് പവാറിന്റെ നടപടി. നിരാശനായി മാധ്യമങ്ങളോടു സംസാരിക്കാതെ സ്ഥലംവിട്ട അജിത്, പിന്നീട് ട്വിറ്ററിലൂടെ ഇരുവരെയും അഭിനന്ദിച്ചു.
മഹാരാഷ്ട്ര, ഹരിയാന, പഞ്ചാബ് എന്നീ സംസ്ഥാനങ്ങളുടെയും ലോക്സഭ, വനിത, യുവജന, വിദ്യാര്ഥി വിഭാഗങ്ങളുടെയും ചുതലയാണു പാര്ട്ടി സുപ്രിയയ്ക്കു നല്കിയിരിക്കുന്നത്. രാജ്യസഭയിലെ പാര്ട്ടി കാര്യങ്ങള്ക്കു പുറമെ മധ്യപ്രദേശ്, ഗുജറാത്ത്, രാജസ്ഥാന്, ജാര്ഖണ്ഡ്, ഗോവ എന്നീ സംസ്ഥാനങ്ങളുടെ ചുമതലയാണ് മറ്റൊരു വര്ക്കിങ് പ്രസിഡന്റായ പ്രഫുല് പട്ടേലിനു ലഭിച്ചത്.
മുതിര്ന്ന നേതാവ് പ്രഫുല് പട്ടേലിനൊപ്പം മകള് സുപ്രിയ സുളെയെ വര്ക്കിങ് പ്രസിഡന്റ് സ്ഥാനത്തേക്ക് ഉയര്ത്തിയ ശരദ് പവാര്, പാര്ട്ടിയില് തന്റെ പിന്ഗാമി സുപ്രിയ ആയിരിക്കുമെന്ന സൂചനയാണ് നല്കിയിരിക്കുന്നത്. ദേശീയതലത്തില് അനുഭവപരിചയമുള്ള, മുന് സിവില് വ്യോമയാന മന്ത്രി പ്രഫുല് പട്ടേലിനു വര്ക്കിങ് പ്രസിഡന്റ് സ്ഥാനം നല്കിയതിലൂടെ സീനിയോറിറ്റിയും മാനിച്ചിരിക്കുന്നു.
https://www.facebook.com/Malayalivartha
