ബിപാര്‍ജോയ് ചുഴലിക്കൊടുങ്കാറ്റ് ഇന്ന് വൈകിട്ടോടെ ഗുജറാത്തിലെ ജഖൗ തീരത്തെത്തും... മണിക്കൂറില്‍ 150 കിലോമീറ്റര്‍ വേഗതയില്‍ എത്തുന്ന ചുഴലി തീരത്ത് കനത്ത നാശം വിതയ്ക്കുമെന്നാണ് ആശങ്കയേറുന്നു. ശക്തമായ കാറ്റിനും കനത്ത മഴയ്ക്കും ഒപ്പം തീരത്തോടു ചേര്‍ന്ന് കടല്‍ക്ഷോഭത്തിനും സാധ്യത്.

കേരളമടക്കം എട്ട് സംസ്ഥാനങ്ങള്‍ക്ക് ജാഗ്രത നിര്‍ദ്ദേശമുണ്ട്. ഗുജറാത്ത്, തമിഴ്‌നാട്, കര്‍ണാടക, മഹാരാഷ്ട്ര, ഗോവ, രാജസ്ഥാന്‍, മദ്ധ്യപ്രദേശ് തുടങ്ങിയ സംസ്ഥാനങ്ങള്‍ക്കൊപ്പം കേന്ദ്ര ഭരണ പ്രദേശമായ ലക്ഷദ്വീപിലും ജനങ്ങള്‍ ജാഗ്രത പാലിക്കണമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പുണ്ട്. ചുഴലിക്കാറ്റ് ഏറ്റവും നാശം വിതയ്ക്കാന്‍ സാധ്യത ഗുജറാത്തിലാണ്.

ജനസാന്ദ്രത കൂടുതലുള്ള പ്രദേശങ്ങള്‍ ചുഴലിക്കാറ്റിന്റെ പ്രഹരപരിധിയിലുണ്ട്. ഭുജ് വിമാനത്താവളം നാളെ വരെ അടച്ചു. കച്ചിലെ ആശുപത്രികളില്‍ അടിയന്തര സാഹചര്യം നേരിടാന്‍ തയ്യാറെടുപ്പുകള്‍ പൂര്‍ത്തിയായി.

47,000 പേരെ മാറ്റിപ്പാര്‍പ്പിച്ചു. സൈന്യവും രക്ഷാപ്രവര്‍ത്തനത്തിന് തയ്യാറായി നില്‍ക്കുന്നുണ്ട്. മോശം കാലാവസ്ഥയെ തുടര്‍ന്ന് രണ്ട് ദിവസത്തേക്ക് ഗുജറാത്തില്‍ നിന്നുള്ള 67 ട്രെയിനുകള്‍ റദ്ദാക്കി.

തെക്കന്‍ പാകിസ്ഥാനും ബിപാര്‍ജോയ് ഭീഷണിയാണ്. സിന്ധ് പ്രവിശ്യയില്‍ 60,000 പേരെ ഒഴിപ്പിച്ചിട്ടുണ്ട്. ശക്തമായ കാറ്റില്‍ പല പ്രദേശങ്ങളിലും കാഴ്ച മറയ്ക്കും വിധം പൊടിപടലം മൂടി. പ്രവിശ്യാ തലസ്ഥാനവും പാകിസ്ഥാനിലെ ഏറ്റവും വലിയ നഗരവുമായ കറാച്ചിയില്‍ തീരത്തെ ബിസിനസ് സ്ഥാപനങ്ങളെല്ലാം അടച്ചിരിക്കുകയാണ്.

അറബിക്കടലില്‍ ഈ വര്‍ഷം ആദ്യമാണ് ബിപാര്‍ജോയ് ചുഴലിക്കാറ്റ് രൂപപ്പെട്ടത്. ബംഗ്ലാദേശാണ് ഈ പേര് നല്‍കിയത്. ദുരന്തം എന്നാണ് വാക്കിനര്‍ത്ഥം. ബംഗാള്‍ ഉള്‍ക്കടലില്‍ രൂപംകൊണ്ട മോച്ച ചുഴലിക്കാറ്റ് ബംഗ്ലാദേശിലും മ്യാന്‍മറിലും വന്‍ നാശം വിതച്ചിരുന്നു. അതിന് പിന്നാലെയാണ് ബിപോര്‍ജോയ് ആശങ്കയാകുന്നത്.