വീടിനുള്ളില്‍ നിന്ന് ദുര്‍ഗന്ധം വമിക്കുന്നതായി അയല്‍വാസികള്‍ പരാതി പെട്ടതിനെ തുടര്‍ന്നാണ് പൊലീസ് പരിശോധനയ്‌ക്കെത്തിയത്. വീടിനകത്ത് കയറി പരിശോധന നടത്തിയ പൊലീസുകാരെ പോലും ഞെട്ടിച്ചതായിരുന്നു ആ കാഴ്ച. മരിച്ച നിലയില്‍ കിടക്കുന്ന യുവ ദമ്പതികളുടെ അരികില്‍ നവജാത ശിശു ജീവനോടെ ഇരിക്കുന്നു.

ഉത്തര്‍പ്രദേശിലെ സഹാറന്‍പൂര്‍ സ്വദേശികളാണ് ഇരുവരും. കാഷിഫ്, ഭാര്യ അനം എന്നിവര്‍ക്കാണ് ജൂണ്‍ എട്ടിനാണ് ആണ്‍കുഞ്ഞ് ജനിച്ചത്. നാലുമാസം മുമ്പായിരുന്നു ദമ്പതികള്‍ ടര്‍ണര്‍ റോഡില്‍ വാടകയ്ക്ക് താമസം തുടങ്ങിയത്. ഇയാള്‍ ഈ പ്രദേശത്ത് ക്രെയിന്‍ ഓപ്പറേറ്ററായി ജോലി ചെയ്ത് വരികയായിരുന്നു. അനം ജോലിക്കൊന്നും പോയിരുന്നില്ല. ഒരു വര്‍ഷം മുമ്പാണ് ഇവര്‍ വിവാഹിതരായത്. സാമ്പത്തിക പ്രശ്‌നമാകാം ഇരുവരുടെയും ആത്മഹത്യക്ക് കാരണമായതെന്ന് പൊലീസ് പറഞ്ഞു. അവര്‍ വളരെയധികം സാമ്പത്തിക ബുദ്ധിമുട്ടിലായിരുന്നുവെന്ന് നാട്ടുകാര്‍ പറഞ്ഞതായും പൊലീസ് അറിയിച്ചു.

25 ഉം 22 ഉം വയസ് പ്രായമുള്ള യുവാവിന്റെയും യുവതിയുടെയും മൃതദേഹത്തിന് മൂന്ന് ദിവസമെങ്കിലും പഴക്കമുണ്ടെന്നാണ് പൊലീസ് പറയുന്നത്. ആറ് ദിവസം മാത്രമായിരുന്നു കുട്ടിക്ക് പ്രായം. നിര്‍ജലീകരണം മൂലം അവശനായിരുന്നു കുട്ടി. ഉടന്‍ മെഡിക്കല്‍ കോളേജിലെത്തിച്ച കുട്ടിക്ക് ചികിത്സ നല്‍കി ജീവന്‍ നിലനിര്‍ത്തി.

കുട്ടി സുരക്ഷിതനാണെന്ന് ഡോക്ടര്‍മാര്‍ അറിയിച്ചു. കുഞ്ഞിനെ നിര്‍ജലീകരണം സംഭവിച്ച അവസ്ഥയിലായിരുന്നു ഇവിടെ എത്തിച്ചത്. ഉടന്‍ ആവശ്യമായ ദ്രാവകം നല്‍കി. ഇപ്പോ അവന്റെ ആരോഗ്യ നില മികച്ചതാണ്. പരിക്കുകളൊന്നും അവന് സംഭവിച്ചിട്ടില്ലെന്നും ഐസിയുവില്‍ നിരീക്ഷണത്തിലാണെന്നും മെഡിക്കല്‍ കോളേജ് ചീഫ് മെഡിക്കല്‍ സൂപ്രണ്ട് ഡോ. യൂസഫ് റിസ്വി പറഞ്ഞു.