ദേശീയ ഗതാഗത ശൃംഖലയെ ഹരിതാഭമാക്കുന്നതിനുള്ള ഒരു പ്രധാന പദ്ധതിയുടെ ഭാഗമായി രാജ്യത്ത് ഹൈഡ്രജൻ ട്രെയിനുകൾ വരാൻ ഒരുങ്ങുകയാണ്. പൊതുഗതാഗത മേഖലയെ ഹരിതവത്കരിക്കുന്നതിന്റെ ഭാഗമായി ഇന്ത്യൻ റെയിൽവേയുടെ ആദ്യ ഹൈഡ്രജൻ ട്രെയിൻ വൈകാതെ ഓടിത്തുടങ്ങുമെന്നാണ് റിപ്പോർട്ട്. ഹരിയാനയിലെ ജിന്ദ് ജില്ലയിലൂടെയാവും ആദ്യത്തെ ഹൈഡ്രജൻ ട്രെയിൻ ഓടുക.

ഈ വർഷം അവസാനത്തോടെ ഹൈഡ്രജൻ പവർ തീവണ്ടികൾ ഓടിത്തുടമെന്നും ഉറപ്പ് ലഭിച്ചിട്ടുണ്ട്. ജിൻഡിൽ നിന്ന് സോനി പട്ടിലേക്കാണ് ട്രെയിൻ ഓടിക്കുക. ഇതിനായുള്ള രാജ്യത്തെ ആദ്യത്തെ ഹൈഡ്രജൻ പവർ പ്ലാന്റ് ജിന്ദിൽ ആരംഭിക്കുമെന്നും റെയിൽവേ വക്താക്കളെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്തു. ട്രാക്ക് പരിസ്ഥിതി സൗഹൃദമാക്കാൻ ലക്ഷ്യമിട്ടാണ് ഹൈഡ്രജൻ ട്രെയിൻ അവതരിപ്പിക്കുന്നത്.

നോർത്തേൺ റെയിൽവേ ജനറൽ മാനേജർ ശോഭൻ ചൗധരി കഴിഞ്ഞ ദിവസം ഹരിയാനയിലെ ജിന്ദ് ജില്ലയിൽ നടത്തിയ സന്ദർശനത്തിലാണ് ഇത് സംബന്ധിച്ച് സൂചനകൾ നൽകിയത്. നിലവിൽ ജർമ്മനിയിൽ മാത്രമാണ് ഹൈഡ്രജൻ ട്രെയിനുകൾ ഓടുന്നതെന്നും ഇന്ത്യ എങ്ങനെയാണ് ഇത്തരം ട്രെയിനുകൾ ആരംഭിക്കുന്നത് എന്നറിയാൻ ലോകം മുഴുവൻ പദ്ധതി ഉറ്റുനോക്കുകയാണെന്നും അദ്ദേഹം പറഞ്ഞു.

ഇന്ത്യയിലെ ആദ്യത്തെ ഹൈഡ്രജൻ പ്ലാന്റ് ജിന്ദ് ജില്ലയിലെ റെയിൽവേ ജംഗ്ഷനു സമീപം സ്ഥാപിക്കും. ആദ്യത്തെ ട്രെയിനിന് എട്ട് ബോഗികളാണ് ഉണ്ടാവുക. പ്ലാന്റിന്റെ വികസനം അവസാന ഘട്ടത്തിലെത്തിയതായും ജലത്തിൽ നിന്ന് ഹൈഡ്രജൻ ഉൽപാദിപ്പിക്കുമെന്നും റെയിൽവേ അധികൃതർ പറഞ്ഞു.

ഹൈഡ്രജൻ ട്രെയിനുകൾ പ്രവർത്തിക്കുന്നത് ഫ്യൂവൽ സെല്ലുകളിലാണ്. ഇതിനുള്ളിൽ ഹൈഡ്രജനും ഓക്സിജനും രാസസംയോജനം നടത്തിയ വൈദ്യുതി ഉത്പാദിപ്പിക്കുകയാണ് ചെയ്യുന്നത്. ഇങ്ങനെയുണ്ടാകുന്ന വൈദ്യുതിയിലാണ് ട്രെയിൻ പ്രവർത്തിക്കുന്നത്. രാസപ്രവർത്തനത്തിന്റെ അവശിഷ്ടമായ വെള്ളം നീരാവി രൂപത്തിലായിരിക്കും അന്തരീക്ഷത്തിലേക്ക് പുറത്തുവിടുക. ട്രെയിൻ ഉപയോഗിക്കേണ്ടതിനേക്കാൾ അധികം ഊർജം ഉത്പാദിപ്പിച്ചാൽ അത് ട്രെയിനിനുള്ളിലെ പ്രത്യേക ലിഥിയം ബാറ്ററിയിലേക്ക് ശേഖരിക്കാൻ കഴിയും.

എട്ട് ബോഗികളുള്ള ഹൈഡ്രജൻ ഇന്ധന അധിഷ്ഠിത ട്രെയിൻ പരിസ്ഥിതി സൗഹൃദമായിരിക്കും. ഹൈഡ്രജൻ ട്രെയിനുകൾ ഡീസൽ എഞ്ചിനുകൾക്ക് പകരം ഹൈഡ്രജൻ ഇന്ധന സെല്ലുകളാണ് ഉപയോഗിക്കുന്നത്. ഈ സെല്ലുകൾ ഹൈഡ്രജനും ഓക്‌സിജനും സംയോജിപ്പിച്ച് വൈദ്യുതി ഉത്പാദിപ്പിക്കുന്നു. ഇത് ട്രെയിനിന്റെ മോട്ടോറുകൾ പ്രവർത്തിപ്പിക്കുന്നു.

2023-2024 സാമ്പത്തിക വർഷത്തിൽ ജിന്ദ്-സോനിപത് സെക്ഷനുമിടയിൽ എട്ട് ബോഗികളുള്ള ഹൈഡ്രജൻ ഇന്ധന അധിഷ്ഠിത ട്രെയിനിന്റെ ആദ്യ പ്രോട്ടോടൈപ്പ് വിക്ഷേപിക്കാൻ നോർത്തേൺ റെയിൽവേ ലക്ഷ്യമിടുന്നു. നിലവിൽ ഡീസലും വൈദ്യുതിയും ഉപയോഗിച്ചാണ് ട്രെയിനുകൾ ഓടുന്നത് എന്നതിനാൽ രാജ്യത്തിന് ഒരു തകർപ്പൻ പദ്ധതിയായിരിക്കും ഇത്. ഹൈഡ്രജനിൽ പ്രവർത്തിക്കുന്ന ട്രെയിനുകൾ അവതരിപ്പിക്കുന്നത് കാർബൺ ബഹിർഗമനം കുറയ്ക്കുക മാത്രമല്ല, വൃത്തിയുള്ളതും ഹരിതവുമായ ഭാവിക്ക് വഴിയൊരുക്കാനും സഹായിക്കും.

അതേസമയം, ഹൈഡ്രജൻ ട്രെയിനുകളുടെ ഉയർന്ന നിർമാണ ചെലവ് ഇത്തരം ട്രെയിനുകളുടെ വ്യാപക ഉപയോഗത്തിന് വെല്ലുവിളിയാണ്. ഗ്രീൻ ഹൈഡ്രജന് കിലോയ്ക്ക് 492 രൂപയാണ് ഇന്ത്യയിൽ വില. ഡീസൽ എഞ്ചിനുകളുടെ പ്രവർത്തനച്ചെലവിനേക്കാൾ 27 ശതമാനം അധികമാണിത്. മാത്രമല്ല ഹൈഡ്രജൻ ട്രെയിനുകളുടെ സുരക്ഷാ പ്രശ്നങ്ങളും കണക്കിലെടുക്കേണ്ടതുണ്ട്.