ചന്ദ്രനിലേക്കുള്ള യാത്ര ആരംഭിച്ച് നാസയുടെ നോവ-സി. നാസയ്ക്ക് വേണ്ടി സ്പേസ് എക്സാണ് നോവ-സിയുടെ വിക്ഷേപണം നടത്തിയത്. വ്യാഴാഴ്ച ഫാല്‍ക്കല്‍ 9 റോക്കറ്റിലായിരുന്നു വിക്ഷേപണം. ഇന്നലെ നടത്താനിരുന്ന വിക്ഷേപണം ഇന്നത്തേക്ക് മാറ്റിവെയ്ക്കുകയായിരുന്നു. ഫ്ളോറിഡയിലെ കെന്നഡി ബഹിരാകാശ കേന്ദ്രത്തിലെ 39 എം ലോഞ്ച് കോംപ്ലക്സില്‍ വെച്ചാണ് വിക്ഷേപണം നടന്നത്.

നാസയുടെ കൊമേര്‍ഷ്യല്‍ ലൂണാര്‍ പേലോഡ് സര്‍വീസസ് സംരംഭത്തിന്റെ ഭാഗമായാണ് ദൗത്യം ഒരുക്കിയിരിക്കുന്നത്. ഓഡീസിയസ് എന്ന് പേരിട്ടിരിക്കുന്ന നോവ-സി ലാന്ററില്‍ 12 പേലോഡുകളാണുള്ളത്. നാസയ്ക്കായി ആറ് പേലോഡുകളുടെ ഒരു സ്യൂട്ട് ലാന്‍ഡര്‍ വഹിക്കുന്നു. എട്ട് ദിവസത്തിനുള്ളില്‍ ഒഡീസിയസ് ചന്ദ്രനില്‍ എത്തുമെന്നാണ് പ്രതീക്ഷിക്കുന്നത്. ബഹിരാകാശ സഞ്ചാരിയായ നീല്‍ ആംസ്ട്രോങ്ങിന്റെ സഞ്ചാര പാതയിലൂടെ പേടകം സഞ്ചരിക്കും.

പ്രിസിഷന്‍ ലാന്‍ഡിങ് സാങ്കേതിക വിദ്യ, ബഹിരാകാശ കാലാവസ്ഥ, റേഡിയോ ആസ്‌ട്രോണമി, ആശയവിനിമയം, ഗതിനിര്‍ണയം തുടങ്ങി വിവിധ ആവശ്യങ്ങള്‍ക്കുള്ളൊ ശാസ്ത്ര-സാങ്കേതിക ഉപകരണങ്ങള്‍ ചന്ദ്രനിലെത്തിക്കുകയാണ് ദൗത്യത്തിന്റെ ലക്ഷ്യം. ഫെബ്രുവരി 22 ന് പേടകം ചന്ദ്രന്റെ ദക്ഷിണ ധ്രുവത്തില്‍ ഇറങ്ങും. ചന്ദ്രനില്‍ വിജയകരമായി ഇറക്കുന്ന ആദ്യ സ്വകാര്യ പേടകമെന്ന നേട്ടവും നോവ-സി ലാന്റര്‍ ലക്ഷ്യമിടുന്നു. ഇത് രണ്ടാം തവണയാണ് നാസ ഒരു സ്വകാര്യ ചാന്ദ്രപേടകം ചന്ദ്രനില്‍ ഇറക്കാന്‍ ശ്രമിക്കുന്നത്. നേരത്തെ പെരെഗ്രിന്‍ ലാന്‍ഡര്‍ ദൗത്യം പരാജയപ്പെട്ടിരുന്നു.