ഡല്ഹി മദ്യനയവുമായി ബന്ധപ്പെട്ട് കള്ളപ്പണ ഇടപാട് ആരോപിച്ച് ഇ.ഡി അറസ്റ്റ് ചെയ്ത ഡല്ഹി മുഖ്യമന്ത്രി അരവിന്ദ് കെജ്രിവാളിനെ ഇന്ന് കോടതിയില് ഹാജരാക്കും
ഡല്ഹി മദ്യനയവുമായി ബന്ധപ്പെട്ട് കള്ളപ്പണ ഇടപാട് ആരോപിച്ച് ഇ.ഡി അറസ്റ്റ് ചെയ്ത ഡല്ഹി മുഖ്യമന്ത്രി അരവിന്ദ് കെജ്രിവാളിനെ ഇന്ന് കോടതിയില് ഹാജരാക്കും.
നേരത്തെ, മാര്ച്ച് 28 വരെയാണ് കോടതി കെജ്രിവാളിനെ ഇ.ഡി കസ്റ്റഡിയില് വിട്ടത്. ഇത് അവസാനിക്കുന്ന പശ്ചാത്തലത്തിലാണ് ഇന്ന് ഡല്ഹി റോസ് അവന്യൂ കോടതിയില് കെജ്രിവാളിനെ ഹാജരാക്കുക. കസ്റ്റഡി കാലാവധി നീട്ടിച്ചോദിക്കാനാണ് ഇ.ഡിയുടെ നീക്കം. ഇന്ന് ഉച്ചയോടെയാകും അരവിന്ദ് കെജ്രിവാളിനെ ഇ.ഡി ഡല്ഹി റോസ് അവന്യു കോടതിയില് ഹാജരാക്കുക.
മദ്യനയ കേസില് സത്യം ഇന്ന് കോടതിയില് വെളിപ്പെടുത്തുമെന്ന് കെജ്രിവാളിന്റെ ഭാര്യ സുനിത പറഞ്ഞത് പല അഭ്യൂഹങ്ങള്ക്കും കാരണമായിട്ടുണ്ട്. തെളിവ് സഹിതം കോടതിയില് കാര്യങ്ങള് വിശദീകരിക്കുമെന്ന് ഇന്നലെ സുനിത വ്യക്തമാക്കി.
അതേസമയം, അടിയന്തര മോചനത്തിനുള്ള കെജ്രിവാളിന്റെ ഇടക്കാല ആവശ്യം ഇന്നലെ ഡല്ഹി ഹൈക്കോടതി തള്ളിയിട്ടുണ്ടായിരുന്നു. കെജ്രിവാളിന്റെ അപേക്ഷയില് എന്ഫോഴ്സ്മെന്റ് ഡയറക്ടറേറ്റിന്റെ മറുപടി കിട്ടാതെ തീര്പ്പ് കല്പിക്കാനായി തയ്യാറല്ലെന്ന് വ്യക്തമാക്കിയാണ് ജസ്റ്റിസ് സ്വര്ണകാന്ത ശര്മയുടെ സിംഗിള് ബെഞ്ച് വിധി. ഇ.ഡി അറസ്റ്റിനും റിമാന്ഡിനുമെതിരെ കെജ്രിവാള് സമര്പ്പിച്ച ഹര്ജിയിലും ഇടക്കാല ആശ്വാസത്തിനുള്ള അപേക്ഷയിലും മറുപടി നല്കാന് ഇ.ഡിക്ക് ഡല്ഹി ഹൈക്കോടതി സമയം നല്കിയിരിക്കുകയാണ്.
അതേസമയം കെജ്രിവാളിനെ മുഖ്യമന്ത്രി സ്ഥാനത്തുനിന്ന് നീക്കണമെന്ന ഹര്ജി ഇന്ന് ഡല്ഹി ഹൈക്കോടതി പരിഗണിക്കും. സുര്ജിത് സിംഗ് യാദവാണ് ഡല്ഹി ഹൈക്കോടതിയില് പൊതുതാല്പര്യ ഹരജി നല്കിയിട്ടുള്ളത്.
https://www.facebook.com/Malayalivartha
