താമസസ്ഥലത്തെ ബാല്‍ക്കണിയില്‍ നിന്ന് വീണ് മുന്‍ ഇന്ത്യന്‍ ക്രിക്കറ്റ് താരം ഡേവിഡ് ജോണ്‍സണ്‍ അന്തരിച്ചു. 52 വയസായിരുന്നു. കര്‍ണാടകത്തിന്റെ ഓപ്പണിംഗ് പേസ് ബൗളറായി ദീര്‍ഘകാലംകളിച്ച ജോണ്‍സണ്‍ 1996-ല്‍ ഇന്ത്യന്‍ കുപ്പായത്തില്‍ രണ്ട് ടെസ്റ്റിലും കളിച്ചിട്ടുണ്ട്.

ഓസ്ട്രേലിയയ്ക്കെതിരെ അരങ്ങേറ്റ മത്സരത്തില്‍ മണിക്കൂറില്‍ 157.8 കിലോമീറ്റര്‍ വേഗതയില്‍ പന്തെറിഞ്ഞത് ഏറെ ശ്രദ്ധിക്കപ്പട്ടിരുന്നു. എന്നാല്‍ ഫിറ്റ്നസ് പ്രശ്നങ്ങള്‍ പതിവായതോടെ ദക്ഷിണാഫ്രിക്കയ്ക്കെതിരെയുള്ള ടെസ്റ്റിലൂടെ അന്താരാഷ്ട്ര കരിയര്‍ അവസാനിച്ചു. 1995-96 രഞ്ജി ട്രോഫി സീസണില്‍ കേരളത്തിനെതിരേ പത്ത് വിക്കറ്റെടുത്തതാണ് മികച്ച പ്രകടനം.2001-02 സീസണ്‍ വരെ കര്‍ണാടകയ്ക്കായി കളിച്ചിരുന്നു.

ഭാര്യയ്ക്കും മൂന്നു കുട്ടികള്‍ക്കുമൊപ്പമാണ് ബെംഗളുരുവിലെ അപ്പാര്‍ട്ട്‌മെന്റില്‍ ഡേവിഡ് ജോണ്‍സണ്‍ താമസിച്ചിരുന്നത്. ആരോഗ്യ പ്രശ്‌നങ്ങളെ തുടര്‍ന്ന് കഴിഞ്ഞ ആഴ്ച ആശുപത്രിയിലേക്കു പോയ ഇദ്ദേഹം മൂന്നു ദിവസം മുന്‍പാണ് ഡിസ്ചാര്‍ജ് ചെയ്ത് വീട്ടിലെത്തിയത്. താരത്തിന് സാമ്പത്തിക പ്രയാസങ്ങളുണ്ടായിരുന്നതായും വിവരമുണ്ട്.