ഹിമാചല്‍ പ്രദേശിലെ ലാഹൗള്‍, സ്പിതി ജില്ലകളിലെ അപ്പര്‍ ഹിമാലയത്തില്‍ നിന്നു ഉത്ഭവിച്ച് ജമ്മു കശ്മീരിലൂടെയും പിന്നീട് പാക് പഞ്ചാബിലൂടെയും ഒഴുകുന്ന ചെനാബ് നദിക്കു കുറുകെ ലോകത്തിലെ ഏറ്റവും ഉയരത്തിലുള്ള റെയില്‍പാലം യാഥാര്‍ഥ്യമായിരിക്കുകയാണ്. ജമ്മു കശ്മീരില്‍ നിര്‍മ്മാണം പൂര്‍ത്തിയായ, ലോകത്തിലെ ഏറ്റവും ഉയരം കൂടിയ റെയില്‍വേ പാലത്തില്‍ ഇന്ത്യന്‍ റെയില്‍വേ വിജയകരമായി ട്രയല്‍ റണ്‍ നടത്തി. റംബാന്‍ ജില്ലയിലെ സംഗല്‍ദാനിനും റിയാസിക്കും ഇടയിലാണ് ചെനാബ് റെയില്‍വേ പാലം നിര്‍മ്മിച്ചിരിക്കുന്നത്. പാലത്തിലൂടെയുള്ള റെയില്‍ ഗതാഗതം ഉത്തര റെയില്‍വേ ഉടന്‍ ആരംഭിക്കുമെന്ന് അധികൃതര്‍ അറിയിച്ചു.

പരീക്ഷണയോട്ടത്തില്‍ മണിക്കൂറില്‍ 40 കിലോമീറ്റര്‍ വേഗതയിലാണ് ട്രെയിന്‍ പാലത്തിലൂടെ കടന്നുപോയത്. ഇതോടെ പാലത്തിലുള്ള എല്ലാ സുരക്ഷ പരിശോധനകളും പൂര്‍ത്തിയായി. രംബാനില്‍ നിന്ന് ബാരാമുള്ളയിലേക്കുള്ള ട്രെയിന്‍ സര്‍വീസാണ് ലോകത്തിലെ എട്ടാമത്തെ അത്ഭുതമെന്നറിയപ്പെടുന്ന ഈ റെയില്‍പ്പാലത്തിലൂടെ കടന്നുപോകുക. 1.3 കിലോമീറ്റര്‍ നീളമുള്ള പാലം പുഴയില്‍ നിന്ന് 359 മീറ്റര്‍ ഉയരത്തിലാണ് സ്ഥിതി ചെയ്യുന്നത്. പാരീസിലെ ഈഫല്‍ ടവറിനേക്കാള്‍ 35 മീറ്റര്‍ ഉയരത്തിലാണ് ഈ പാലം . ഉധംപുര്‍ശ്രീനഗര്‍ബാരാമുള്ള റെയില്‍വെ ലിങ്ക് പദ്ധതിയുടെ ഭാഗമായ കത്ര മുതല്‍ ബനിഹാല്‍ വരെയുള്ള 111 കിലോമീറ്റര്‍ റെയില്‍വെ പാതയില്‍ ഈ പാലം നിര്‍ണായക സ്ഥാനം വഹിക്കുന്നു.

സോണ്‍V ഭൂകമ്പങ്ങള്‍, മണിക്കൂറില്‍ 266 കി.മീ വേഗതയുള്ള കാറ്റിന്റെ വേഗത, ഉയര്‍ന്ന തീവ്രതയുള്ള സ്‌ഫോടനങ്ങള്‍ എന്നിവയെ ചെറുക്കുന്ന തരത്തിലാണ് ചെനാബ് റെയില്‍പ്പാലം രൂപകല്‍പ്പന ചെയ്തിരിക്കുന്നത്. 1,486 കോടി രൂപ (190 ദശലക്ഷം യുഎസ് ഡോളര്‍) ചെലവില്‍ നിര്‍മ്മിച്ച പാലത്തിന് 120 വര്‍ഷത്തെ ആയുസ്സുണ്ടാകും. 300 സിവില്‍ എഞ്ചിനീയര്‍മാരും 1,300 ലധികം തൊഴിലാളികളും 24 മണിക്കൂറും പണിയെടുത്താണ് ജമ്മു കശ്മീരിലെ റിയാസി ജില്ലയില്‍ ബക്കലിനും കൗരിക്കും ഇടയില്‍ ചെനാബ് നദിക്കു കുറുകെ ആര്‍ച്ച് ബ്രിഡ്ജ് പൂര്‍ത്തിയാക്കിയത്. 28,000 കോടി ചെലവില്‍ പണിയുന്ന ജമ്മു ഉധംപുര്‍ ശ്രീനഗര്‍ ബാരാമുള്ള റെയില്‍ ലിങ്ക് പദ്ധതിയുടെ ഭാഗമായി ഉത്തര റെയില്‍വേയ്ക്ക് വേണ്ടി അഫ്‌കോണ്‍സ് എന്ന മുംബൈ ആസ്ഥാനമായ കമ്പനിയാണ് പാലം പണിതത് . , കാശ്മീരിന്റെ ഭൂഘടനാപ്രകാരം പുതിയ റെയില്‍ എക്സ്റ്റന്‍ഷന്‍ ലൈനിന് ധാരാളം തുരങ്കങ്ങളിലൂടെയും പാലങ്ങളിലൂടെയും കടന്നുപോകേണ്ടിവന്നു. അതിലുമുപരി, അത്യന്തം ദുര്‍ഘടമായ ഹിമാലയന്‍ ഭൂപ്രദേശം മറ്റൊരു വെല്ലുവിളിയായിരുന്നു. ചെനാബ് നദിയുടെ ആഴത്തിലുള്ള മലയിടുക്കുള്ളതിനാല്‍ യാത്ര ചെയ്യുന്നതിന് ഒരു നീണ്ട പാലം ആവശ്യമാണ്. അതിനാല്‍, ചെനാബ് നദി പാലത്തിന്റെ നിര്‍മ്മാണം 2003 ല്‍ നിര്‍ദ്ദേശിക്കുകയും അംഗീകരിക്കുകയും ചെയ്തു. എന്നാല്‍ പലവട്ടം ഈ റെയില്‍ പാലത്തിന്റെ പണി മുടങ്ങിയിട്ടുണ്ട്.

2009ഓടെ പാലം നിര്‍മ്മിക്കാനാണ് ആദ്യം തീരുമാനിച്ചിരുന്നത്, എന്നാല്‍ നിരവധി തടസ്സങ്ങള്‍ നേരിട്ടതിനെ തുടര്‍ന്ന് 2008ല്‍ പാലം താല്‍ക്കാലികമായി നിര്‍ത്തിവയ്ക്കാന്‍ നിര്‍ബന്ധിതരായി. മുഴുവന്‍ JUSBRL പ്രോജക്റ്റും പുതുതായി അവലോകനം ചെയ്യുകയും ഡിസൈന്‍ പരിഷ്‌കരിക്കുകയും ചെയ്തു. 2009ല്‍ റെയില്‍വേ ഉദ്യോഗസ്ഥര്‍ ഡിസൈന്‍ അംഗീകരിച്ചു. 2012ല്‍ ചെനാബ് പാലത്തിന്റെ പണി ആരംഭിച്ചു, പാലത്തിന്റെ പ്രധാന സ്പാന്‍ 467 മീറ്ററായി പരിഷ്‌കരിച്ചു. പുതിയ റെയില്‍വേ ലൈന്‍ വടക്കന്‍ റെയില്‍വേയുടെ ഭരണത്തിന്‍ കീഴിലാണെങ്കിലും, കൊങ്കണ്‍ റെയില്‍വേ കോര്‍പ്പറേഷന്‍ ലിമിറ്റഡിനെ എക്‌സിക്യൂട്ടീവ് ഏജന്‍സിയായും ഡിസൈന്‍ കണ്‍സള്‍ട്ടന്റായും തിരഞ്ഞെടുത്തു. കൊങ്കണ്‍ റെയില്‍വേ കോര്‍പ്പറേഷന്‍ ലിമിറ്റഡ് മുമ്പ് പശ്ചിമ ഇന്ത്യയിലെ കൊങ്കണ്‍ മേഖലയിലെ പ്രയാസമേറിയ ഭൂപ്രദേശങ്ങളില്‍ നിരവധി റെയില്‍വേ പദ്ധതികള്‍ നിര്‍മ്മിച്ചിട്ടുണ്ട് എന്നതിന്റെ പശ്ചാത്തലത്തില്‍ ആണ് ഈ പദ്ധതിയും കൊങ്കണ്‍ റെയില്‍വേയെ തന്നെ ഏല്‍പ്പിച്ചത്.

പുതുതായി പണിത ചെനാബ് റെയില്‍വേ പാലത്തിലൂടെ ഇന്ത്യന്‍ റെയില്‍വേയുടെ മെമു ട്രെയിന്‍ കടന്നു പോകുന്ന ദൃശ്യം കേന്ദ്ര റെയില്‍വേ മന്ത്രി അശ്വിനി വൈഷ്ണവ് തന്റെ എക്‌സ് അക്കൗണ്ടില്‍ പങ്കുവച്ചു. കശ്മീര്‍ താഴ്വരയെക്കൂടി ഇന്ത്യന്‍ റെയില്‍വേ നെറ്റ് വര്‍ക്കിന്റെ ഭാഗമാക്കാന്‍ ഉദ്ദേശിച്ചുളള പദ്ധതിയുടെ ഭാഗമായാണ് പാലം പണിതിരിക്കുന്നത്. നിലവില്‍ കന്യാകുമാരി മുതല്‍ കത്ര വരെയാണ് റെയില്‍പ്പാതയുള്ളത്.
ജമ്മു കശ്മീരിലെ മനോഹരമായ പര്‍വത നിരകള്‍ക്കിടയിലൂടെ ട്രെയിന്‍ സഞ്ചരിക്കുന്ന വീഡിയോ എഎന്‍ഐ സോഷ്യല്‍ മീഡിയയില്‍ പങ്കുവച്ചിട്ടുണ്ട്. ചെനാബ് നദിക്ക് കുറുകെയാണ് റെയില്‍വേ പാലം നിര്‍മ്മിച്ചിരിക്കുന്നത്.