മദ്യനയക്കേസുമായി ബന്ധപ്പെട്ട് ഡല്‍ഹി മുഖ്യമന്ത്രി അരവിന്ദ് കേജ്രിവാളിനെ മൂന്നു ദിവസത്തെ സി.ബി.ഐ കസ്റ്റഡിയില്‍ വിട്ട്‌റോസ് അവന്യു കോടതി. അഞ്ചുദിവസത്തെ കസ്റ്റഡിയാണ് സി.ബി.ഐ ആവശ്യപ്പെട്ടത്. ഇന്നലെ അവധിക്കാല ജഡ്ജി അമിതാഭ് റാവത്തിന്റെ അനുമതി വാങ്ങി ചോദ്യം ചെയ്തശേഷം കേജ്രിവാളിന്റെ അറസ്റ്റ് സി.ബി.ഐ രേഖപ്പെടുത്തി. രാവിലെ ഇ.ഡി കേസുമായി ബന്ധപ്പെട്ട കേജ്രിവാളിന്റെ ഹര്‍ജി സുപ്രീംകോടതി പരിഗണിക്കാനിരിക്കെയായിരുന്നു സി.ബി.ഐയുടെ നാടകീയ നീക്കം.

ചൊവ്വാഴ്ച രാത്രി തീഹാര്‍ ജയിലിലെത്തി സി.ബി.ഐ സംഘം കേജ്രിവാളിന്റെ മൊഴിയെടുത്തിരുന്നു. ഔപചാരികമായി അറസ്റ്റ് രേഖപ്പെടുത്തുന്നതുമായി ബന്ധപ്പെട്ട് ഇന്നലെ രാവിലെ റോസ് അവന്യു കോടതിയില്‍ അപേക്ഷയും നല്‍കി. കേജ്രിവാളിനെ കോടതിയില്‍ ഹാജരാക്കണമെന്ന അപേക്ഷയെ അഭിഭാഷകന്‍ അതിശക്തമായി എതിര്‍ത്തു. സി.ബി.ഐ നീക്കങ്ങള്‍ മാദ്ധ്യമങ്ങളിലൂടെയാണ് അറിയുന്നതെന്നും അപേക്ഷയുടെ പകര്‍പ്പ് പോലും കൈമാറിയിട്ടില്ലെന്നും കേജ്രിവാളിന്റെ അഭിഭാഷകന്‍ വിവേക് ജെയ്ന്‍ പരാതിപ്പെട്ടു. എന്നാല്‍, അന്വേഷണവിവരങ്ങള്‍ പ്രതിയെ അറിയിക്കണമെന്ന് വ്യവസ്ഥയില്ലെന്ന് സി.ബി.ഐ വാദിച്ചു. മാര്‍ച്ച് 21നാണ് കേജ്രിവാളിനെ ഇ.ഡി അറസ്റ്റ് ചെയ്തത്.

ഇ.ഡി കേസില്‍ കേജ്രിവാളിന് ഡല്‍ഹി റോസ് അവന്യു കോടതി അനുവദിച്ച ജാമ്യം ഡല്‍ഹി ഹൈക്കോടതി സ്റ്റേ ചെയ്തിരിക്കുകയാണ്. ജാമ്യം തടഞ്ഞുകൊണ്ട് കഴിഞ്ഞ 21ന് ഇടക്കാല സ്റ്റേ ഉത്തരവിട്ട ഹൈക്കോടതി, 25ന് അന്തിമ ഉത്തരവും പുറപ്പെടുവിക്കുകയായിരുന്നു. ഇതോടെ, 21ാം തീയതിയിലെ ഇടക്കാല സ്റ്റേയ്ക്കെതിരെ സുപ്രീംകോടതിയില്‍ സമര്‍പ്പിച്ച ഹര്‍ജി കേജ്രിവാള്‍ ഇന്നലെ പിന്‍വലിച്ചു. 21, 25 തീയതികളിലായുള്ള രണ്ട് ഉത്തരവുകളും ചോദ്യം ചെയ്ത് പുതിയ ഹര്‍ജി നല്‍കുമെന്ന് അഡ്വ. അഭിഷേക് മനു സിംഗ്വി കോടതിയെ അറിയിച്ചു. ഇ.ഡി കേസില്‍ വിചാരണക്കോടതി അനുവദിച്ച ജാമ്യം സുപ്രീംകോടതി അംഗീകരിക്കുമോയെന്നത് നിര്‍ണായകമാണ്. ഇപ്പോള്‍ സി.ബി.ഐ കേസിലും കൂടി പ്രതിയായതോടെ അതിലും ജാമ്യം നേടിയാല്‍ മാത്രമേ ഡല്‍ഹി മുഖ്യമന്ത്രിക്ക് ജയില്‍മോചിതനാകാന്‍ കഴിയുകയുള്ളു.

അതേസമയം സി.ബി.ഐ കേസിലെ അറസ്റ്റിനെയും കസ്റ്റഡി അപേക്ഷയെയും കേജ്രിവാള്‍ നേരിട്ട് എതിര്‍ത്തു. ഇന്നലെ റോസ് അവന്യു കോടതിയില്‍ ഹാജരാക്കിയപ്പോള്‍, സി.ബി.ഐ വ്യാജവാര്‍ത്തകള്‍ പ്രചരിപ്പിക്കുകയാണെന്ന് ആരോപിച്ചു. ഡല്‍ഹി മുന്‍ ഉപമുഖ്യമന്ത്രിയും ആം ആദ്മി നേതാവുമായ മനീഷ് സിസോദിയയ്ക്ക് മേല്‍ മദ്യനയത്തിന്റെ പാപഭാരം താന്‍ കെട്ടിവയ്ക്കാന്‍ ശ്രമിക്കുകയാണെന്ന് കള്ളക്കഥ മെനയുന്നു. സിസോദിയ കുറ്റം ചെയ്തുവെന്ന് താന്‍ മൊഴി നല്‍കിയിട്ടില്ല. എന്നാല്‍, അത്തരത്തില്‍ തലക്കെട്ടുകള്‍ വരുത്താനാണ് ശ്രമം. താനും മറ്റ് ആംആദ്മി നേതാക്കളും നിരപരാധികളാണ്. മാദ്ധ്യമങ്ങളിലൂടെ അപകീര്‍ത്തിപ്പെടുത്താനാണ് ശ്രമമെന്നും കൂട്ടിച്ചേര്‍ത്തു.