അയല്‍ക്കാര്‍ക്ക് അരോചകമാകുന്ന വിധം ഉച്ചത്തില്‍ പാട്ടുവെച്ചതു ചോദ്യം ചെയ്തതിന്  പോലീസുകാരനെ കുടുംബം കൊന്നു. വീട്ടുകാരുടെ ആക്രമണത്തില്‍ മറ്റൊരു പോലീസുകാരന് ഗുരുതരമായി പരിക്കേറ്റിട്ടുമുണ്ട്. ഉത്തര്‍പ്രദേശ് ബദുവാനിലെ ഗഥോലിയില്‍ നടന്ന ഈ സംഭവം പോലീസുകാരേയും നാട്ടുകാരെയും ഒരുപോലെ ഞെട്ടിച്ചിരിക്കുകയാണ്.

ഒരു കുടുംബത്തിലെ അഞ്ചു പേര്‍ ചേര്‍ന്ന് പാര്‍ട്ടിയുടെ ഭാഗമായി ഉച്ചത്തില്‍ പാട്ടു വെയ്ക്കുകയായിരുന്നു. കുട്ടികള്‍ക്ക് പഠിക്കാനും മറ്റും കഴിയുന്നില്ലെന്ന് കാണിച്ച് നാട്ടുകാര്‍ നല്‍കിയ പരാതിയില്‍ കോണ്‍സ്റ്റബിള്‍മാരായ സഹീംഖാനും ഭീംസെനും സംഭവം അന്വേഷിക്കാന്‍ എത്തുകയും ചെയ്തു.

ഇരുവരും ജഗത്പാല്‍ ശക്യ എന്നയാളുടെ വീട്ടിലെത്തി. അടുത്തു വരുന്ന യുപി ബോര്‍ഡ് പരീക്ഷക്കായി അയല്‍പക്കത്തെ വീട്ടിലെ കുട്ടികള്‍ തയ്യാറെടുക്കുകയാണെന്നും പാട്ടിന്റെ ശബ്ദം കുറച്ചുവയ്ക്കണമെന്നും ശക്യയോട് ഇരുവരും പറഞ്ഞു. എന്നാല്‍ പോലീസു കാരുടെ അഭ്യര്‍ത്ഥനയ്ക്ക് ചെവി കൊടുക്കാതെ ശക്യ സംഗീതം തുടര്‍ന്നത് ഇവര്‍ തമ്മില്‍ വാഗ്വാദത്തിന് കാരണമായി.

ഇതേ തുടര്‍ന്ന് ശക്യയുടെ ഭാര്യ, മകന്‍, രണ്ടു പെണ്‍മക്കള്‍ എന്നിവരെല്ലാം ചേര്‍ന്ന് പോലീസുകാരെ ആക്രമിക്കുകയും ഇതിനിടയില്‍ കുടുംബാംഗങ്ങള്‍ മഴുവും കത്തിയും ഉപയോഗിച്ച് ആക്രമിക്കുകയും ചെയ്തു.

തലയിലും ശരീരത്തും പലയിടത്തായി മുറിവേല്‍ക്കപ്പെട്ട് ഖാന്‍ കുഴഞ്ഞു വീഴുകയും പിന്നീട് മരണമടയുകയും ചെയ്തു. ഭീം സെന്നിനും കാര്യമായി പരിക്കേറ്റു.

ഇതേ തുടര്‍ച്ച് ശക്യ, ഭാര്യ കാന്ത, മകന്‍ പ്രവീണ്‍, പെണ്‍മക്കളായ ഛായ, സവിതാ എന്നിവര്‍ക്ക് എതിരേ കൊലപാതകം, വധശ്രമം, ലഹളയുണ്ടാക്കല്‍, മാരകമായ ആയുധങ്ങള്‍ കയ്യില്‍ സൂക്ഷിക്കല്‍, കൃത്യനിര്‍വ്വഹണം തടസ്സപ്പെടുത്തല്‍ തുടങ്ങി ഒട്ടേറെ കുറ്റങ്ങള്‍ക്കാണ് കേസെടുത്തിരിക്കുന്നത്. സംഭവത്തിന് പിന്നാലെ എല്ലാവരും മുങ്ങാനും ശ്രമിച്ചിരുന്നു. ഭീം സെന്‍ അത്യാസന്ന നിലയിലാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha