ഇരുചക്രവാഹനങ്ങള്ക്ക് നിയന്ത്രണം വരുന്നു
വാഹനങ്ങള് പെരുകന്നതിനനുസരിച്ച് വായു മലിനീകരണവും വളരെ രൂക്ഷമാകുന്നുണ്ട്. വായു മലിനമാകുന്ന രാജ്യങ്ങളുടെ പട്ടികയില് ഇന്ത്യ മുകളില് തന്നെയാണ്. രാജ്യത്ത് ഏറ്റവും അധികം വിറ്റഴിക്കപ്പെടുന്നതും നിരത്തുകളില് ഓടുന്നതും ഇരുചക്ര വാഹനങ്ങളാണ്. വാതക പുറംതള്ളലില് യാതൊരു നിയന്ത്രണവുമില്ലാതെയാണ് ഇരുചക്ര വാഹനങ്ങള് ഇപ്പോള് പുറത്തിറങ്ങുന്നത്. ഈ സാഹചര്യത്തില് ഇവയ്ക്ക് കര്ശന നിയന്ത്രണം ഏര്പ്പെടുത്തി കാര്ബണ് പുറംതള്ളല് കുറയ്ക്കാനുള്ള തീവ്രശ്രമത്തിലാണ് കേന്ദ്രസര്ക്കാര്. ഈ ആഴ്ച്ചയില് തന്നെ ഇരുചക്ര വാഹന നിര്മ്മാതാക്കള്ക്കുള്ള നിര്ദ്ദേശങ്ങള് ഉത്തരവായി പുറത്തു വന്നേക്കും. ഇന്ത്യന് വിപണിയില് വിറ്റഴിക്കപ്പെടുന്ന വാഹനങ്ങളുടെ 80 ശതമാനവും ഇരുചക്ര വാഹനങ്ങളാണ്.
പെട്രോള് കാറുകള് പുറം തള്ളുന്ന നൈട്രജന് ഓക്സൈഡിനെക്കാള് നാല് മുതല് അഞ്ച് മടങ്ങ് വരെ അധികമാണ് ഇരുചക്ര വാഹനങ്ങള് പുറംതള്ളുന്നത്. ഇത് മലിനീകരണത്തിന്റെ തോത് വര്ദ്ധിപ്പിക്കുന്നുണ്ട്. നിലവിലെ സാഹചര്യത്തില് ഇത് നിയന്ത്രിക്കേണ്ടത് വളരെ അത്യാവശ്യവുമാണ്. ഈ മാസത്തിന്റെ തുടക്കത്തില് റോഡ് ട്രാന്സ്പോര്ട്ട് വകുപ്പിന്റെ ചുമതലയുള്ള കേന്ദ്രമന്ത്രി നിതിന് ഗഡ്ഗരി എല്ലാ വാഹനങ്ങള്ക്കും ബാധകമാകുന്ന തരത്തില് എമിഷന് നോംസ് (വാതക പുറംതള്ളല് നിയന്ത്രിക്കാനുള്ള നയം) പ്രഖ്യാപിക്കുമെന്ന് പറഞ്ഞിരുന്നു. ബിഎസ് സിക്സ് സ്റ്റാന്ഡേര്ഡില് വാഹനങ്ങള് നിര്മ്മിക്കണമെന്ന നിര്ദ്ദേശമാകും സര്ക്കാര് പുറപ്പെടുവിക്കുകക. ഇരുചക്ര വാഹനങ്ങള് ഉള്പ്പെടെ നിര്മ്മിക്കുമ്ബോള് ഈ മാദണ്ഡം പാലിക്കണമെന്ന് സര്ക്കാര് വാഹനനിര്മ്മാതാക്കളോട് നിഷ്കര്ഷിക്കും. ഇരുചക്ര മുചക്ര വാഹന നിര്മ്മാതാക്കള്ക്ക് ഇത്രയും കാലം കാര്യമായ പ്രതിബന്ധങ്ങള് ഇല്ലാതെ മുന്നോട്ടു പോകാന് സാധിക്കുമായിരുന്നു. എന്നാല് മലിനീകരണത്തിന്റെ തോത് കുറയ്ക്കേണ്ടതിന്റെ ആവശ്യകത വര്ദ്ധിച്ചു വരുന്ന സാഹചര്യത്തിലാണ് കേന്ദ്രം പുതിയ നിയന്ത്രണത്തെക്കുറിച്ച് ആലോചിക്കുന്നത്.
ഡല്ഹി പോലെ ജനസാന്ദ്രത കൂടിയ നഗരങ്ങളില് ഇരുചക്ര വാഹനങ്ങള് ഉണ്ടാക്കുന്ന മലിനീകരണത്തിന്റെ തോത് വളരെ കൂടുതലാണെന്ന് സര്ക്കാര് ഉദ്യോഗസ്ഥര് തന്നെ സാക്ഷ്യപ്പെടുത്തുന്നു. നേരത്തെ സമാനമായ രീതിയില് നിയന്ത്രണങ്ങള് ഏര്പ്പെടുത്താന് സര്ക്കാര് ശ്രമിച്ചപ്പോള് ഇരുചക്ര വാഹന നിര്മ്മാതാക്കള് അതിനെ എതിര്ത്തു. എമിഷന് സംബന്ധിച്ച് നിയന്ത്രണങ്ങള് ഏര്പ്പെടുത്തിയാല് അത് വാഹനത്തിന്റെ മൈലേജിനെ ബാധിക്കുമെന്നായിരുന്നു അവരുടെ വാദം. നിലവില് വിപണിയിലുള്ള വാഹനങ്ങളുടെ കാര്യത്തില് എന്ത് നയമായിരിക്കും സര്ക്കാര് സ്വീകരിക്കുക എന്ന ആശങ്ക ചില വാഹന ഉടമകള്ക്കെങ്കിലുമുണ്ട്. സാധാരണ ഗതിയില് എമിഷന് നിയമങ്ങളില് മാറ്റം വരുമ്പോള് അത് ബാധിക്കുക പുതുതായി പുറത്തിറങ്ങുന്ന വാഹനങ്ങളെയാണ്. എന്നാല്, ഡല്ഹിയില് 15 വര്ഷം പഴക്കമുള്ള കാറുകള് നിരത്തില് ഇറക്കരുതെന്ന നിയമമുണ്ട്. ഇത്തരത്തില് എന്തെങ്കിലും നിയമം സര്ക്കാര് കൊണ്ടു വരികയാണെങ്കില് അത് ഇരുചക്ര വാഹനങ്ങള് ഉപയോഗിക്കുന്നവര്ക്ക് തലവേദനയാകും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
