ഇന്ദിരാഗാന്ധിയുടെ വധത്തെ തുടര്‍ന്ന് രാജ്യത്ത് ഖാലിസ്ഥാന്‍ ഭീകരര്‍ക്ക് പിന്തുണ നല്‍കിയിരുന്ന ബ്രിട്ടനെതിരെ നിലനിന്നിരുന്ന ശക്തമായ ജനവികാരം 1986ല്‍ ഹെലികോപ്റ്റര്‍ കരാറില്‍ നിന്ന് പിന്മാറാന്‍ രാജീവ്ഗാന്ധി സര്‍ക്കാരിനെ പ്രേരിപ്പിച്ചതായി റിപ്പോര്‍ട്ട്. വെസ്റ്റ്‌ലാന്റ് കമ്പനിയില്‍ നിന്ന് 27 ഹെലികോപ്റ്ററുകളാണ് ഇന്ത്യ വാങ്ങാനിരുന്നത്. ലണ്ടനിലെ ബ്രിട്ടീഷ് നാഷണല്‍ ആര്‍കൈവ്‌സാണ് ഇത് സംബന്ധിച്ച രേഖകള്‍ പുറത്തുവിട്ടത്.
ഇന്ത്യ കരാറില്‍ നിന്ന് പിന്മാറിയേക്കുമെന്നും അത് അക്കാലത്ത് സാമ്പത്തിക പ്രതിസന്ധിയിലായിരുന്ന വെസ്റ്റ്ലാന്റ് കമ്പനിയെ കൂടുതല്‍ പ്രതിസന്ധിയിലാക്കുമെന്നും മാര്‍ഗരറ്റ് താച്ചറിന്റെ നേതൃത്വത്തിലുള്ള ബ്രിട്ടീഷ് ഗവണ്‍മെന്റ് ആശങ്കപ്പെട്ടിരുന്നതായും രേഖകളില്‍ പറയുന്നു. ഇത് സംബന്ധിച്ച് പ്രതിരോധമന്ത്രാലയം കാബിനറ്റ് ഓഫീസിന് അയച്ച കുറിപ്പ് രേഖകളുടെ കൂട്ടത്തിലുണ്ട്. 643കോടി രൂപയുടെ കരാറാണ് ഒപ്പുവയ്ക്കാനിരുന്നത്.
പ്രധാനമന്ത്രിയായിരുന്ന രാജീവ് ഗാന്ധി 1985 ഒക്‌ടോബറില്‍ യു.കെ സന്ദര്‍ശിച്ചപ്പോള്‍ ഇത് സംബന്ധിച്ച് ചര്‍ച്ചകളും നടത്തിയിരുന്നു. എന്നാല്‍ പിന്നീട് താരതമ്യേന ചിലവ് കുറഞ്ഞ ഫ്രഞ്ച് ഹെലികോപ്റ്റര്‍ വാങ്ങാന്‍ തീരുമാനിയ്ക്കുകയായിരുന്നു. സാങ്കേതിക പ്രശ്‌നങ്ങളും രാജീവ് ഗാന്ധി ചൂണ്ടിക്കാട്ടിയിരുന്നു. വെസ്റ്റ്‌ലാന്റ് ഹെലികോപ്റ്ററിന് കൂടുതല്‍ വലിപ്പമുള്ളതാണെന്നും കൂടുതല്‍ ഇന്ധനം ആവശ്യമായി വരുമെന്നും ഒരു പ്രശ്‌നമായി ചൂണ്ടിക്കാട്ടിയിരുന്നു. പിന്നീട് 21 ഹെലികോപ്റ്ററുകള്‍ വാങ്ങിയെങ്കിലും ഒട്ടും സുരക്ഷിതത്വമില്ലാതെ അനുഭവപ്പെട്ടതിനെ തുടര്‍ന്ന് മുഴുവന്‍ ഹെലികോപ്റ്ററുകളും തിരിച്ച് നല്‍കുകയായിരുന്നു. എന്നാല്‍ ബ്രിട്ടീഷ് വിരുദ്ധവികാരം കൂടി ഈ നടപടിയ്ക്ക് പിന്നിലുണ്ടെന്നാണ് ആരോപണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha