ബെംഗളൂരുവിലെ കെആര്‍ പുരം റെയില്‍വേ സ്റ്റേഷന് സമീപം ബീഹാര്‍ സ്വദേശിയായ യുവതി ലൈംഗികമായി പീഡിപ്പിക്കപ്പെട്ടു. ഏപ്രില്‍ 2 ന് പുലര്‍ച്ചെ 1.30 ഓടെ കേരളത്തില്‍ ജോലി ചെയ്ത് ബീഹാറിലെ സ്വന്തം നാട്ടിലേക്ക് മടങ്ങുന്നതിനിടെയാണ് സംഭവം നടന്നത്. ഇര സഹോദരനൊപ്പം സ്റ്റേഷനില്‍ എത്തിയിരുന്നു.

മഹാദേവപുരയിലേക്ക് ഭക്ഷണം കഴിക്കാന്‍ പോകുന്നതിനിടെ രണ്ട് പുരുഷന്മാര്‍ അവരെ സമീപിച്ചതായി റിപ്പോര്‍ട്ടുകള്‍ പറയുന്നു. ഒരു പ്രതി സ്ത്രീയുടെ സഹോദരനെ തടഞ്ഞുനിര്‍ത്തി, രണ്ടാമത്തെ പ്രതി ഇരയെ ഒറ്റപ്പെട്ട സ്ഥലത്തേക്ക് വലിച്ചിഴച്ച് കൊണ്ടുപോയി ആക്രമിച്ചു.

പോലീസ് പുറത്തിറക്കിയ പ്രസ്താവന പ്രകാരം, ഒരു ഓട്ടോയില്‍ ഇരുന്നിരുന്ന രണ്ട് ഓട്ടോറിക്ഷാ ഡ്രൈവര്‍മാര്‍ സ്ത്രീയുടെ സഹോദരനെ ആക്രമിച്ചു. തുടര്‍ന്ന് സ്ത്രീയെ കുറച്ചു ദൂരത്തേക്ക് വലിച്ചിഴച്ച് കൊണ്ടുപോയി ലൈംഗികമായി പീഡിപ്പിച്ചു.

സ്ത്രീയുടെ സഹായത്തിനായുള്ള നിലവിളി കേട്ട് നാട്ടുകാര്‍ ഓടിയെത്തി ഒരു പ്രതിയെ പിടികൂടി പോലീസിന് കൈമാറി. രാത്രി പട്രോളിങ്ങിലുണ്ടായിരുന്ന മഹാദേവപുര പോലീസ് ഉദ്യോഗസ്ഥര്‍ രണ്ട് ഓട്ടോറിക്ഷാ ഡ്രൈവര്‍മാരെ സംഭവസ്ഥലത്ത് വെച്ച് തന്നെ അറസ്റ്റ് ചെയ്തതായി പോലീസ് പറഞ്ഞു. മഹാദേവപുര പോലീസ് സ്റ്റേഷനില്‍ കേസ് രജിസ്റ്റര്‍ ചെയ്തിട്ടുണ്ട്.കര്‍ണാടകയിലെ കോലാറിലെ മുലബഗിലു എന്ന പട്ടണത്തില്‍ നിന്നുള്ള ആസിഫ്, സയ്യിദ് മുഷാര്‍ എന്നിവരാണ് അറസ്റ്റിലായത്.