ഞാന്‍ ഒരു ഭീകരവാദിയല്ല, ആയുധങ്ങള്‍ കൈയ്യില്‍ വച്ചതിനാണ് താന്‍ ശിക്ഷിക്കപ്പെട്ടത്. എന്നെ 1993 ലെ മുംബൈ ഭീകരാക്രമണക്കേസ് പ്രതിയെന്നു മാത്രം വിളിക്കരുതെന്നും ബോളിവുഡ് താരം സഞ്ജയ് ദത്ത്. മുംബൈ ഭീകരാക്രമണക്കേസില്‍ ശിക്ഷിക്കപ്പെട്ട് ജയിലിലായിരുന്ന താരം പുറത്തെത്തി മാധ്യമങ്ങളോട് സംസാരിക്കുകയായിരുന്നു. ഇന്ത്യക്കാരനാണെന്നതില്‍ ഞാന്‍ അഭിമാനിക്കുന്നു. അതിനാലാണ് ജയിലില്‍ നിന്ന് മോചിതനായപ്പോള്‍ ഭൂമിയില്‍ തൊട്ടു വന്ദിച്ചതും ദേശീയപതാകയെ സല്യൂട്ട് ചെയ്തതും.

കഴിഞ്ഞ 23 വര്‍ഷമായി സ്വാതന്ത്ര്യത്തിന്റെ ഈ ദിവസത്തിനായി കാത്തിരിക്കുകയായിരുന്നു. സ്വാതന്ത്യത്തിലേക്ക് നടന്നടുക്കുകയെന്നത് അത്ര എളുപ്പമുള്ള ഒന്നല്ല. നിങ്ങള്‍ ഭീകരവാദിയല്ലെന്ന് കോടതി പറഞ്ഞതാണ് എനിക്ക് വലിയ ആശ്വാസമായത്. ആ വാക്കുകള്‍ കേള്‍ക്കുന്നതിനു കാത്തിരുന്ന എന്റെ പിതാവിനെയാണ് ഞാന്‍ ഈസമയം ഏറ്റവുമധികം ഓര്‍ക്കുന്നത്.

സല്‍മാന്‍ ഖാന്‍ എനിക്ക് എന്റെ സഹോദരനെ പോലെയാണ്. ഇനിയെന്നും അങ്ങനെ തന്നെയായിരിക്കുകയും ചെയ്യും. ഭാര്യ മാന്യതയായിരുന്നു എന്റെ ശക്തി. ജയിലില്‍ ജോലി ചെയ്ത് ലഭിച്ച 440 രൂപ ഭാര്യയ്ക്കാണ് നല്‍കിയതെന്നും ദത്ത് പറഞ്ഞു.

മുംബൈ സ്‌ഫോടന പരമ്പരയുടെ സമയത്ത് അനധികൃതമായി ആയുധം കൈവശം വച്ച കുറ്റത്തിന് അഞ്ചു വര്‍ഷം തടവിനു ശിക്ഷിക്കപ്പെട്ട സഞ്ജയ് ദത്ത് യേര്‍വാഡ സെന്‍ട്രല്‍ ജയിലില്‍ കഴിയുകയായിരുന്നു. ഒക്ടോബര്‍ വരെ ജയിലില്‍ കഴിയേണ്ടിയിരുന്ന ബോളിവുഡ് താരത്തെ നല്ലനടപ്പിന്റെ പേരിലാണ് നേരത്തേ മോചിപ്പിക്കുന്നത്. ജയിലിലെ നല്ലനടപ്പിനെ തുടര്‍ന്ന് ഒരോ മാസവും ഏഴു ദിവസം വീതം ശിക്ഷയില്‍ ഇളവു ലഭിച്ചിരുന്നു. നേരത്തേ വിചാരണ നടക്കുന്ന സമയത്ത് 18 മാസം ജയിലിലായിരുന്നതിനാല്‍ അവശേഷിക്കുന്ന കാലാവധിയാണ് പിന്നീട് പൂര്‍ത്തിയായത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha