കേന്ദ്ര സര്‍വ്വകലാശാലയില്‍ ആത്മഹത്യ ചെയ്ത രോഹിത് വെമുലയെ പരിശോധിക്കാന്‍ ഡോക്ടര്‍മാരെ അനുവദിച്ചില്ലെന്ന മന്ത്രി സ്മൃതി ഇറാനിയുടെ വാദം പൊളിയുന്നു. രോഹിത് വെമുലയെ പരിശോധിക്കുന്നതിന് വിദ്യാര്‍ത്ഥികള്‍ തടസ്സം നിന്നില്ലെന്ന് രോഹിതിനെ പരിശോധിച്ച ഡോക്ടര്‍ വെളിപ്പെടുത്തി. വിദ്യാര്‍ത്ഥികള്‍ തന്നെ തടഞ്ഞിരുന്നില്ലെന്നും രോഹിതിനെ ഹോസ്റ്റല്‍ മുറിയില്‍ ചെന്ന് പരിശോധിച്ചിരുന്നെന്നും ഡോക്ടര്‍ പറഞ്ഞു.
ബുധനാഴ്ച്ച പാര്‍ലമെന്റില്‍ നടത്തിയ പ്രസംഗത്തിലാണ് രോഹിതിനെ പരിശോധിക്കാന്‍ വിദ്യാര്‍ത്ഥികള്‍ അനുവദിച്ചില്ലെന്നും കൃത്യ സമയത്ത് പരിശോധന നടത്താനായിരുന്നെങ്കില്‍ രോഹിതിന്റെ ജീവന്‍ രക്ഷിക്കാമായിരുന്നെന്നും മന്ത്രി പറഞ്ഞത്. എന്നാല്‍ വിദ്യാര്‍ത്ഥികളാണ് തന്നെ ഹോസ്റ്റല്‍ മുറിയില്‍ എത്തിച്ചതെന്നും എങ്ങനെയെങ്കിലും രോഹിതിനെ രക്ഷിക്കണമെന്ന് അവര്‍ തന്നോട് അപേക്ഷിച്ചിരുന്നതായും സര്‍വ്വകലാശാലയിലെ ചീഫ് മെഡിക്കല്‍ ഓഫീസര്‍ ഡോ. രാജശ്രീ മല്‍പാത്ത് പറഞ്ഞു. രോഹിതിന്റെ മരണം പ്രതിപക്ഷം രാഷ്ട്രീയ ആക്രമണമാക്കി മാറ്റുകയാണെന്നും തന്റെ മരണത്തിന് ആരും ഉത്തരവാദികളല്ലെന്ന രോഹിതിന്റെ ആത്മഹത്യാകുറിപ്പ് തെലുങ്കാന പോലീസിന്റെ കൈവശമുണ്ടെന്നും ഹോസ്റ്റല്‍ റൂമില്‍ രോഹിത് തൂങ്ങി നിന്നപ്പോള്‍ ഡോക്ടറെപോലും അനുവദിച്ചില്ലെന്നും സ്മൃതി ഇറാനി പാര്‍ലമെന്റില്‍ നടത്തിയ പ്രസംഗത്തില്‍ പറഞ്ഞിരുന്നു. രോഹിതിന്റെ ജീവന്‍ രക്ഷിക്കാന്‍ ശ്രമം നടന്നില്ലെന്നും മുദ്രാവാക്യം മുഴക്കുന്നവര്‍ക്ക് നീതിയല്ല വേണ്ടത് രാഷ്ട്രീയം കളിക്കലാണ്. അടുത്ത പുലര്‍ച്ചെ 6.30 വരെ രോഹിതിന് സമീപത്ത് പോലീസിനെ അനുവദിച്ചില്ല. അയാളുടെ ശരീരം രാഷ്ട്രീയത്തിനായി ഉപയോഗിക്കുകയാണ്. കൃത്യ സമയത്ത് വൈദ്യ പരിശോധന കിട്ടിയിരുന്നെങ്കില്‍ ഒരു പക്ഷേ ജീവന്‍ രക്ഷിക്കാമായിരുന്നെന്നും സ്മൃതി ഇറാനി പറഞ്ഞിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha