തുടരെ തുടരെ സാങ്കേതിക തകരാറുകൾ മൂലം എയർ ഇന്ത്യ വിമാനങ്ങളുടെ സർവ്വീസ് മാറ്റി വയ്ക്കുകയാണ്. ഇപ്പോൾ ഏറ്റവും അടുത്ത മണിക്കൂറിൽ പുറത്ത് വന്നിരിക്കുന്ന റിപ്പോർട്ട് പ്രകാരം  ഡൽഹിയിൽ നിന്ന് പാരീസിലേക്കുള്ള എയർ ഇന്ത്യ വിമാനം റദ്ദാക്കിയിരിക്കുകയാണ്. ഇന്നൊരു ദിവസം തന്നെ നിരവധി സർവ്വീസുകളാണ് ഇത്തരത്തിൽ നിർത്തലാക്കിയിരിക്കുന്നത്.

വിമാനം പുറപ്പെടുന്നതിന് മുമ്പുള്ള പരിശോധനയിൽ വിമാനത്തിൽ ചില പ്രശ്നങ്ങൾ കണ്ടെത്തുകയും ഇത് കാരണം ഡൽഹിയിൽ നിന്ന് പാരീസിലേക്കുള്ള AI 143 വിമാനം റദ്ദാക്കിക്കുകയുമാണ് ഉണ്ടായതെന്നാണ് അധികൃതർ വ്യക്തമാക്കുന്നത്. പ്രശ്നം പരിഹരിച്ച് വരുകയാണ്.

എങ്കിലും യാത്രക്കാർക്കുണ്ടായിരിക്കുന്ന അസൗകര്യം കണക്കിലെടുത്ത് റീഫണ്ട് നൽകാൻ തയ്യാറാണെന്ന് കമ്പനി വ്യക്തമാക്കി. അതേ സമയം  ഇന്ന് മാത്രം  അഞ്ച് രാജ്യാന്തര സർവീസുകളാണ് ഇത്തരത്തിൽ സാങ്കേതിക തകരാർ കണ്ടെത്തിയതിന്റെ ഭാ​ഗമായി എയർ ഇന്ത്യ  റദ്ദാക്കിയത്.