പാസ്പോര്‍ട്ടിന് അപേക്ഷിക്കുന്നതിന് സ്ത്രീകള്‍ക്ക് ഭര്‍ത്താവിന്റെ അനുമതിയും ഒപ്പും വാങ്ങേണ്ടതില്ലെന്ന് മദ്രാസ് ഹൈക്കോടതി. വിവാഹ ശേഷം ഭാര്യയുടെ വ്യക്തിത്വം നഷ്ടപ്പെടുന്നില്ലെന്നും ഭര്‍ത്താവിന്റെ അനുമതിയോ ഒപ്പോ ഇല്ലാതെ ഭാര്യക്ക് പാസ്പോര്‍ട്ടിന് അപേക്ഷിക്കാമെന്നും വ്യക്തമാക്കി ജസ്റ്റിസ് എന്‍ ആനന്ദ് വെങ്കിടേഷ് .

വിവാഹമോചന നടപടികള്‍ പൂര്‍ത്തിയാകാത്തതിനാല്‍ പാസ്പോര്‍ട്ട് അപേക്ഷയില്‍ ഭര്‍ത്താവിന്റെ ഒപ്പ് വേണമെന്ന് റീജണല്‍ പാസ്പോര്‍ട്ട് ഓഫീസ് ഉദ്യോഗസ്ഥര്‍ ആവശ്യപ്പെട്ടതിനെതിരെ രേവതിയെന്ന യുവതി സമര്‍പ്പിച്ച ഹര്‍ജിയിലാണ് വിധി. വിവാഹിതരായ സ്ത്രീകളെ ഭര്‍ത്താവിന്റെ സ്വത്തായി കാണുന്ന മനോഭാവമാണിതെന്നും ആധുനിക സമൂഹത്തിന് ചേരുന്ന നിലപാടല്ല ഇതെന്നും പറഞ്ഞ കോടതി 4 ആഴ്ചയ്ക്കുള്ളില്‍ പാസ്പോര്‍ട്ട് അനുവദിക്കാന്‍ ഉത്തരവിടുകയായിരുന്നു.