സിക്കിമിൽ കനത്ത മഴയും മണ്ണിടിച്ചിലും . സിക്കിമിലെ അപ്പർ റിംബി പ്രദേശത്ത് കനത്ത മഴയെ തുടർന്നുണ്ടായ വൻ മണ്ണിടിച്ചിലിൽ കുറഞ്ഞത് നാല് പേർ മരിച്ചു, മൂന്ന് പേരെ ഇതുവരെ കണ്ടെത്താനായിട്ടില്ല. മൂന്ന് പേർ സംഭവസ്ഥലത്ത് വെച്ചുതന്നെ മരിച്ചതായും നാലാമൻ ആശുപത്രിയിൽ വെച്ചാണ് മരിച്ചതെന്നും പോലീസ് പറഞ്ഞു. ഉത്തരാഖണ്ഡിലും പഞ്ചാബിലും പ്രളയം തുടരുകയാണ്.വെള്ളിയാഴ്ച പുലർച്ചെ യാങ്താങ് ഗ്രാമത്തിൽ മണ്ണിടിച്ചിലുണ്ടായി, വീടിനുള്ളിൽ ചെളിയും പാറകളും വീണു,

ഇരകൾ ഉറങ്ങിക്കിടക്കുകയായിരുന്നു.കരകവിഞ്ഞൊഴുകുന്ന ഹ്യൂം നദിക്ക് കുറുകെ താൽക്കാലിക തടി പാലം നിർമ്മിച്ച് പരിക്കേറ്റ രണ്ട് പേരെ ദുരിതബാധിത പ്രദേശത്ത് നിന്ന് ഒഴിപ്പിച്ചതായി മുതിർന്ന പോലീസ് ഉദ്യോഗസ്ഥൻ ഷെറിംഗ് ഷെർപ അറിയിച്ചു "വിജയകരമായി രക്ഷാപ്രവർത്തനം നടത്തുകയും ജില്ലാ ആശുപത്രിയിലേക്ക് അവരെ ഉടൻ മാറ്റുകയും ചെയ്തിട്ടും, ചികിത്സയ്ക്കിടെ ഒരു സ്ത്രീ മരിച്ചു. മറ്റേയാളുടെ നില ഗുരുതരമായി തുടരുന്നു, മൂന്ന് പേരെ ഇപ്പോഴും കാണാനില്ല," അദ്ദേഹം പറഞ്ഞു,

"ദുർഘടമായ ഭൂപ്രകൃതിയും പ്രതികൂല കാലാവസ്ഥയും രക്ഷാപ്രവർത്തനം വളരെ ദുഷ്കരമാക്കി" എന്നും അദ്ദേഹം കൂട്ടിച്ചേർത്തു. അതേസമയം, കാണാതായവർക്കായുള്ള തിരച്ചിൽ, രക്ഷാപ്രവർത്തനങ്ങൾ പുരോഗമിക്കുകയാണ്. ഉത്തരാഖണ്ഡിൽ അടുത്തിടെയുണ്ടായ വെള്ളപ്പൊക്കത്തിലും കനത്ത മഴയിലും ഉണ്ടായ നാശനഷ്ടങ്ങൾ വിലയിരുത്താൻ പ്രധാനമന്ത്രി നരേന്ദ്ര മോദി വ്യാഴാഴ്ച ഡെറാഡൂൺ സന്ദർശിച്ചു.

സന്ദർശന വേളയിൽ അദ്ദേഹം ഉദ്യോഗസ്ഥരുമായി അവലോകന യോഗം നടത്തുകയും വെള്ളപ്പൊക്ക ബാധിത കുടുംബങ്ങളുമായി സംവദിക്കുകയും ചെയ്തു.വെള്ളപ്പൊക്ക ബാധിത പ്രദേശങ്ങൾക്ക് 1,200 കോടി രൂപയുടെ ധനസഹായം പ്രധാനമന്ത്രി പ്രഖ്യാപിച്ചു. മരിച്ചവരുടെ കുടുംബങ്ങൾക്ക് 2 ലക്ഷം രൂപയും പരിക്കേറ്റവർക്ക് 50,000 രൂപയും അദ്ദേഹം പ്രഖ്യാപിച്ചു.