വിവാഹമോചന നോട്ടീസ് അയച്ചതിന് ബാങ്ക് ഉദ്യോഗസ്ഥയായ ഭാര്യയെ യുവാവ് വെടിവച്ച് കൊന്നു. യൂണിയന്‍ ബാങ്ക് ഓഫ് ഇന്ത്യയില്‍ അസിസ്റ്റന്റ് മാനേജരായ ഭുവനേശ്വരി (39) ആണ് കൊല്ലപ്പെട്ടത്. ബംഗളൂരുവിലാണ് സംഭവം നടന്നത്. യുവതിയുടെ ഭര്‍ത്താവായ ബാലമുരുകന്‍ (40) കൊലപാതകത്തിന് ശേഷം പൊലീസ് സ്‌റ്റേഷനിലെത്തി കീഴടങ്ങി.

ജോലി കഴിഞ്ഞ് വീട്ടിലേക്ക് വരുകയായിരുന്ന ഭുവനേശ്വരിക്ക് നേരെ അഞ്ച് റൗണ്ടാണ് ബാലമുരുകന്‍ വെടിവച്ചതെന്ന് പൊലീസ് പറയുന്നു. സോഫ്റ്റ്‌വെയര്‍ എന്‍ജീനിയറായിരുന്ന ബാലമുരുകന്‍ നാല് വര്‍ഷം മുന്‍പാണ് ജോലി ഉപേക്ഷിച്ചത്. 2011ലാണ് ഇരുവരും വിവാഹിതരായത്. 2018 ദമ്പതികള്‍ ബംഗളൂരുവിലേക്ക് താമസം മാറി. ഇരുവരും തമിഴ്‌നാട് സേലം സ്വദേശികളാണ്.

ഇവര്‍ക്ക് രണ്ട് കുട്ടികളുണ്ട്. പ്രതിക്ക് ഭാര്യയെ സംശയമായിരുന്നുവെന്നാണ് പൊലീസ് പറയുന്നത്. ഇതിനെ തുടര്‍ന്ന് ഒരു വര്‍ഷത്തിലേറെയായി ഇരുവരും വേര്‍പിരിഞ്ഞാണ് താമസിക്കുന്നത്. യുവതി കുട്ടികളോടൊപ്പം രാജാജിനഗറിലായിരുന്നു താമസിച്ചിരുന്നത്. ഒരാഴ്ച മുന്‍പ് ഭുവനേശ്വരി ഭര്‍ത്താവിന് വിവാഹമോചന നോട്ടീസ് അയച്ചിരുന്നു.