തിരഞ്ഞെടുപ്പു സീസണിലെ ആദ്യ ജനവിധി ഇന്നു ബംഗാളിലും അസമിലും കുറിക്കപ്പെടും. ബംഗാളില്‍ 18 മണ്ഡലങ്ങളിലും അസമില്‍ 65 മണ്ഡലങ്ങളിലുമാണ് ഇന്നു വോട്ടെടുപ്പ് നടക്കുന്നത്. കേരളം, തമിഴ്‌നാട്, പുതുച്ചേരി, ബംഗാള്‍, അസം എന്നീ അഞ്ചു സംസ്ഥാനങ്ങളിലെ 45 ദിവസം നീളുന്ന തിരഞ്ഞെടുപ്പു പ്രക്രിയയ്ക്കാണ് ഇതോടെ തുടക്കമാകുന്നത്. 

ബംഗാളില്‍ നക്‌സല്‍ ബാധിത പ്രദേശങ്ങളായ മൂന്നു ജില്ലകളിലാണ് ഇന്നു വോട്ടെടുപ്പ്. സായുധസേനകള്‍, എയര്‍ ആംബുലന്‍സ് തുടങ്ങി വന്‍ സുരക്ഷാ സംവിധാനമാണ് ഏര്‍പ്പെടുത്തിയിട്ടുള്ളത്. 13 മണ്ഡലങ്ങള്‍ അതീവ സുരക്ഷാ പ്രശ്‌നങ്ങളുള്ളതാണ്. ഇവിടെ വൈകിട്ട് നാലുമണി വരെയേ പോളിങ് ഉള്ളൂ. തൃണമൂല്‍ കോണ്‍ഗ്രസ് സിപിഎം കോണ്‍ഗ്രസ് സഖ്യം ബിജെപി ത്രികോണ മല്‍സരമാണ് മിക്ക മണ്ഡലങ്ങളിലും. അഭിപ്രായ സര്‍വേകളില്‍ തൃണമൂലിനാണ് മുന്‍തൂക്കം പ്രവചിക്കപ്പെടുന്നത്. ആകെ ആറു ഘട്ടങ്ങളിലായാണ് ബംഗാളില്‍ തിരഞ്ഞെടുപ്പ്. 
അസമില്‍ 40,000 സുരക്ഷാഭടന്മാരെ സുരക്ഷാജോലികള്‍ക്കായി നിയോഗിച്ചിട്ടുണ്ട്. ഇന്ത്യാബംഗ്ലദേശ് അതിര്‍ത്തിയില്‍ വന്‍ സുരക്ഷയൊരുക്കിയിട്ടുണ്ട്. കോണ്‍ഗ്രസും ബിജെപി എജിപി സഖ്യവും നേ!ര്‍ക്കുനേര്‍ പോരാട്ടമാണ് 65 മണ്ഡലങ്ങളില്‍. 27 ഇടത്ത് എഐയുഡിഎഫും മല്‍സരിക്കുന്നു. 15 വര്‍ഷത്തെ കോണ്‍ഗ്രസ് ഭരണത്തിന് അന്ത്യം കുറിക്കുന്നതിനായി വന്‍ പ്രചാരണമാണ് പ്രധാനമന്ത്രി നരേന്ദ്ര മോദിയുടെയും ബിജെപി അധ്യക്ഷന്‍ അമിത് ഷായുടെയും നേതൃത്വത്തില്‍ അസമില്‍ നടന്നത്. അനധികൃത ബംഗ്ലദേശ് കുടിയേറ്റക്കാരെ പുറത്താക്കുമെന്നും ഇന്ത്യാബംഗ്ലദേശ് അതിര്‍ത്തി അടച്ചുകെട്ടുമെന്നും സംസ്ഥാനത്ത് വന്‍വികസനം കൊണ്ടുവരുമെന്നും ബിജെപി വാഗ്ദാനം ചെയ്തിട്ടുണ്ട്. രണ്ടുഘട്ടമായാണ് അസമില്‍ തിരഞ്ഞെടുപ്പ്. 11ന് ആണ് രണ്ടാം ഘട്ടം. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha