ജനിച്ചത് പെണ്‍കുഞ്ഞല്ലെന്ന കാരണത്താല്‍ മാതാവ് നവജാതശിശുവിനെ കഴുത്തറുത്ത് കൊന്നു. ഹൈദരാബാദില്‍ ചൊവ്വാഴ്ച നടന്ന സംഭവത്തില്‍ പൂര്‍ണ്ണിമ എന്ന സ്ത്രീയാണ് ഈ ക്രൂരകൃത്യം കാട്ടിയത്. 24 ദിവസം പ്രായമുള്ള കുഞ്ഞിനെ ഷേവിംഗ് ബ്‌ളേഡ് ഉപയോഗിച്ച് കഴുത്തു കണ്ടിച്ച് മരിക്കാനായി തെരുവില്‍ ഇട്ടു.
നഗരത്തിലെ ഒരു കടയുടമയുടെ ഭാര്യയാണ് 30 കാരിയായ പൂര്‍ണ്ണിമ. ഇവരുടെ ആദ്യ കുഞ്ഞ് ആണ്‍കുട്ടിയായിരുന്നു. അഞ്ചു വര്‍ഷം മുമ്പ് രണ്ടാമത്തെ പ്രസവത്തിലും പിറന്നത് ആണ്‍കുഞ്ഞായിരുന്നു. മൂന്നാമത്തെ കുട്ടി പെണ്‍കുട്ടിയായിരിക്കുമെന്ന അമിത പ്രതീക്ഷയിലായിരുന്നു പൂര്‍ണ്ണിമ. എന്നാല്‍ മൂന്നാഴ്ച മുമ്പ് ഇവര്‍ക്ക് പിറന്നതും ആണ്‍കുട്ടിയായതോടെ കുഞ്ഞിനെ കുട്ടികളില്ലാത്തവര്‍ക്കോ ബന്ധുക്കള്‍ക്കോ കൊണ്ടുപോയി കൊടുക്കാന്‍ പൂര്‍ണ്ണിമ ഭര്‍ത്താവിനോട് ആവശ്യപ്പെട്ടു.
എന്നാല്‍ കുടുംബം ഇതിന് എതിരായതോടെ ഇവര്‍ കടുത്ത വിഷാദത്തിലായി. കുഞ്ഞിനെ ഇഷ്ടമില്ലാതിരുന്ന ഇവര്‍ അതിനെ തന്റെ അടുത്ത് കൊണ്ടുവരാന്‍ പോലും സമ്മതിക്കുകയും ചെയ്തിരുന്നില്ല. കാര്യങ്ങള്‍ അപകടകരമാം വിധത്തിലേക്ക് മാറിയത് ചൊവ്വാഴ്ച രാത്രിയിലായിരുന്നു. ചൊവ്വാഴ്ച രാത്രിയില്‍ കുഞ്ഞിനെ ഒരു കൂട്ടം കള്ളന്മാര്‍ ആക്രമിച്ചെന്നും തന്റെ മംഗല്യസൂത്രം തട്ടിപ്പറിച്ച് കൊണ്ടുപോകുകയും ചെയ്തതായി നേരേഡ്‌മെറ്റില്‍ കോസ്‌മെറ്റിക് സ്‌റ്റോര്‍ നടത്തുന്ന ഭര്‍ത്താവ് ശ്രീധര്‍ രാജുവിന് പൂര്‍ണ്ണിമ ഫോണ്‍ ചെയ്തു.
ഓടിപ്പാഞ്ഞെത്തിയ ശ്രീധര്‍ അബോധാവസ്ഥയിലായ കുട്ടിയുമായി പൂര്‍ണ്ണിമ വീട്ടില്‍ നിന്നും ഒരു കിലോമീറ്റര്‍ അകലത്തില്‍ കാത്തു നില്‍ക്കുന്നത് കണ്ടു. ബൈക്കിലെത്തിയ രണ്ടുപേര്‍ മുഖത്ത് എന്തോ സ്‌പ്രേ ചെയ്ത് ബോധം കെടുത്തി മംഗല്യസൂത്രവുമായി കടന്നെന്നും കുഞ്ഞിനെ തെരുവില്‍ കിടക്കുന്ന നിലയില്‍ കണ്ടെത്തിയെന്നും ഇവര്‍ പറഞ്ഞു. ഇതിനിടയില്‍ കുഞ്ഞിന്റെ കഴുത്ത് മുറിഞ്ഞതായി കണ്ടെത്തിയ ശ്രീധര്‍ അതിനെ തര്‍ണാകയിലെ സുരക്ഷാ ഹോസ്പിറ്റലില്‍ കാണിച്ചു. തുടര്‍ന്ന് ഗാന്ധി ഹോസ്പിറ്റലിലേക്ക് കുഞ്ഞിനെ കൊണ്ടുപോകാന്‍ ഇവര്‍ നിര്‍ദേശിക്കുകയും അവിടെ എത്തിച്ചപ്പോള്‍ കുഞ്ഞ് മരിക്കുകയുമായിരുന്നു.
പോലീസ് നടത്തിയ ചോദ്യം ചെയ്യലില്‍ പൂര്‍ണ്ണിമയുടെ പെരുമാറ്റം സംശയാസ്പദമായി തോന്നുകയും പരസ്പര വിരുദ്ധമായ മൊഴി നല്‍കുകയും ആയിരുന്നു. ഒരിക്കല്‍ പോലും ഇവര്‍ കുഞ്ഞ് മരിച്ചതില്‍ ദു:ഖിച്ചില്ല. കുഞ്ഞ് കിടന്നെന്ന് പറഞ്ഞ സ്ഥലത്ത് രക്തവും കണ്ടില്ല. തുടര്‍ന്ന് ഫോറന്‍സിക് വിദഗ്ദ്ധര്‍ നടത്തിയ പരിശോധനയില്‍ മൂര്‍ച്ചയേറിയ ഏതോ ആയുധം ഉപയോഗിച്ച് കുഞ്ഞിന്റെ കഴുത്തു മുറിച്ചതാണ് മരണകാരണമെന്നും കണ്ടെത്തി. പിന്നീട് പൂര്‍ണ്ണയെ വീണ്ടും ചോദ്യം ചെയ്തതോടെ സത്യം പുറത്തുവരികയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha