ബംഗാളില് സ്ട്രോങ് റൂമിലെ വോട്ടിങ് യന്ത്രങ്ങള് അനുവാദമില്ലാതെ തുറന്നുവെന്നും അതില് കൃത്രിമം നടന്നുവെന്നും ആരോപിച്ച് ഭരണകക്ഷിയായ തൃണമൂല് കോണ്ഗ്രസ്
നിയമസഭാ തിരഞ്ഞെടുപ്പിന്റെ വോട്ടെണ്ണലിനു നാലു രാത്രികള് ബാക്കിനില്ക്കെ കൊല്ക്കത്തയില് നാടകീയ രംഗങ്ങള്. ഇവിഎം സൂക്ഷിച്ചിരിക്കുന്ന സ്ട്രോങ് റൂമിലെ വോട്ടിങ് യന്ത്രങ്ങള് അനുവാദമില്ലാതെ തുറന്നുവെന്നും അതില് കൃത്രിമം നടന്നുവെന്നും ആരോപിച്ച് ഭരണകക്ഷിയായ തൃണമൂല് കോണ്ഗ്രസ് രംഗത്തെത്തി. താന് മത്സരിക്കുന്ന ഭവാനിപുര് മണ്ഡലത്തിലെ വോട്ടെണ്ണല് കേന്ദ്രത്തിലെത്തി മുഖ്യമന്ത്രി മമത ബാനര്ജി നേരിട്ട് പ്രതിഷേധത്തിന് നേതൃത്വം നല്കി. സൗത്ത് കൊല്ക്കത്തയിലെ സഖാവത്ത് മെമ്മോറിയല് സ്കൂളിലെ സ്ട്രോങ് റൂമിലാണ് മമത എത്തിയത്.
തൃണമൂല് നേതാക്കളും പ്രവര്ത്തകരും വിവിധ സ്ട്രോങ് റൂമുകള്ക്കു മുന്പില് കൂട്ടത്തോടെ എത്തിയതോടെ കൂടുതല് കേന്ദ്രസേനയെ വിന്യസിച്ചിട്ടുണ്ട്. തൃണമൂല് കോണ്ഗ്രസിന്റെ ആരോപണം തിരഞ്ഞെടുപ്പ് കമ്മിഷന് നിഷേധിച്ചു. പോസ്റ്റല് ബാലറ്റുകള് തരംതിരിക്കുന്നതിനായി എല്ലാ രാഷ്ട്രീയപാര്ട്ടി പ്രതിനിധികളും എത്തണമെന്ന് ബന്ധപ്പെട്ടവര്ക്ക് ഇമെയില് അയച്ചിരുന്നുവെന്ന് തിരഞ്ഞെടുപ്പു കമ്മിഷന് വിശദീകരിച്ചു. ഇവിഎം മെഷീനുകള് സൂക്ഷിച്ച സ്ട്രോങ് റൂമുകള് സീല് ചെയ്തിട്ടുണ്ടെങ്കിലും പോസ്റ്റല് ബാലറ്റുകള്ക്കായുള്ള സ്ട്രോങ് റൂം ആണ് തുറന്നതെന്നും കമ്മിഷന് പറഞ്ഞു. സ്ട്രോങ് റൂമിന്റെ വരാന്തയിലാണ് തരംതിരിക്കല് നടന്നതെന്നും കമ്മിഷന് ചൂണ്ടിക്കാട്ടി. തൃണമൂല് കോണ്ഗ്രസും മമത ബാനര്ജിയും തോല്വി സമ്മതിച്ചെന്ന് ബിജെപി സംസ്ഥാന അധ്യക്ഷന് ഷമിക് ഭട്ടാചാര്യ പറഞ്ഞു.
ബെലേഘട്ട മണ്ഡലത്തിലെ തൃണമൂല് സ്ഥാനാര്ഥി കുനാല് ഘോഷും പാര്ട്ടി നേതാവ് ശശി പഞ്ജയും കൊല്ക്കത്തയിലെ നേതാജി ഇന്ഡോര് സ്റ്റേഡിയത്തിനു പുറത്ത് ധര്ണ ആരംഭിച്ചതോടെയാണ് തര്ക്കം രൂക്ഷമായത്. രാഷ്ട്രീയ പാര്ട്ടികളുടെ പ്രതിനിധികളുടെ സാന്നിധ്യമില്ലാതെ തിരഞ്ഞെടുപ്പ് കമ്മിഷനും ബിജെപിയും ചേര്ന്ന് സ്ട്രോങ് റൂം തുറന്നുവെന്നാണ് ഇവരുടെ ആരോപണം.!
''വൈകിട്ട് 3.30 വരെ ഞങ്ങളുടെ പ്രവര്ത്തകര് ഇവിടെയുണ്ടായിരുന്നു. പെട്ടെന്ന് 4 മണിക്ക് സ്ട്രോങ് റൂം വീണ്ടും തുറക്കുമെന്ന് കാണിച്ച് ഒരു ഇമെയില് വന്നു. പ്രവര്ത്തകര് മടങ്ങിയതിനു പിന്നാലെയായിരുന്നു ഇത്. ഞങ്ങള് ഉടന് സ്ഥലത്തെത്തിയെങ്കിലും അകത്തേക്ക് കടത്തിവിട്ടില്ല. എന്നാല് ബിജെപി പ്രതിനിധികളെ അകത്തേക്ക് ക്ഷണിക്കുന്നുമുണ്ടായിരുന്നു''– കുനാല് ഘോഷ് പറഞ്ഞു. സ്ട്രോങ് റൂമിനുള്ളില് ബാലറ്റ് പേപ്പറുകള് നീക്കം ചെയ്യുന്നുണ്ടെന്നും അദ്ദേഹം ആരോപിച്ചു.
സൂക്ഷിച്ചിരിക്കുന്ന വോട്ടിങ് യന്ത്രങ്ങള് മാറ്റാന് ബിജെപി പദ്ധതിയിടുന്നതായി മമത ബാനര്ജി നേരത്തെ ആരോപിച്ചിരുന്നു. സ്ട്രോങ് റൂമുകള്ക്ക് കാവലിരിക്കാന് പ്രവര്ത്തകര്ക്ക് നിര്ദേശം നല്കിയ മമത, ആവശ്യമെങ്കില് താന് നേരിട്ട് കാവലിരിക്കുമെന്നും വോട്ടെണ്ണല് ഹാളിലേക്ക് നേരിട്ട് പോകുമെന്നും വ്യക്തമാക്കി. കംപ്യൂട്ടറിലെ ഡാറ്റ മാറ്റിമറിക്കാന് സാധ്യതയുണ്ടെന്നും വിജയം ഉറപ്പിക്കുന്നത് വരെ വോട്ടെണ്ണല് കേന്ദ്രങ്ങള് വിടരുതെന്നും അവര് പ്രവര്ത്തകര്ക്ക് മുന്നറിയിപ്പ് നല്കി.
ബംഗാളില് ബിജെപിയും തൃണമൂലും തമ്മില് കടുത്ത പോരാട്ടമാണ് എക്സിറ്റ് പോളുകള് പ്രവചിക്കുന്നത്. മാട്രിസ്, പിമാര്ക്ക് തുടങ്ങിയ ഏജന്സികള് ബിജെപിക്ക് മുന്തൂക്കം നല്കുമ്പോള്, ബിജെപി 192 സീറ്റുകള് വരെ നേടി വന് വിജയം കൊയ്യുമെന്ന് ടുഡേയ്സ് ചാണക്യ പ്രവചിക്കുന്നു. എന്നാല് തൃണമൂല് കോണ്ഗ്രസ് അധികാരം നിലനിര്ത്തുമെന്നാണ് പീപ്പിള്സ് പള്സ് നല്കുന്ന സൂചന.
https://www.facebook.com/Malayalivartha
