വനങ്ങളിലൂടെയും വന്യ ജീവി സംരക്ഷണ കേന്ദ്രങ്ങളിലൂടെയും കടന്നു പോകുന്ന നാഷണല്‍ ഹൈവേയില്‍ കൂടി അണ്ടര്‍പാസസ് പണിയാന്‍ നാഷണല്‍ ഹൈവേ അതോറിറ്റി ഓഫ് ഇന്ത്യ (എന്‍എച്ച് എ ഐ)ആലോചിക്കുന്നു. സംരക്ഷിത മേഖലയിലെ മൃഗങ്ങളുടെ സഞ്ചാരം സുഗമമാക്കാനായാണ് ഈ നടപടി.

ഉത്തരാഖണ്ഡിലെ രാജാജി നാഷണല്‍ പാര്‍ക്ക്, അസമിലെ വനമേഖലകള്‍, ചമ്പല്‍, കാന്‍ഹാ,പെഞ്ച് കടുവ സംരക്ഷണ കേന്ദ്രം എന്നിവിടങ്ങളിലാണ് ആദ്യഘട്ടത്തില്‍ അത്തരത്തിലുള്ള 25 അണ്ടര്‍പാസുകള്‍ നിര്‍മ്മിക്കാന്‍ ഉദ്ദേശിച്ചിരിക്കുന്നത്. ഇത്തരം അണ്ടര്‍പാസുകള്‍ നിര്‍മ്മിക്കുന്നത് ജനങ്ങളും മൃഗങ്ങളും തമ്മിലുള്ള പ്രശ്‌നങ്ങള്‍ കുറയ്ക്കുമെന്ന് മാത്രമല്ല മറ്റു അധികൃതരില്‍ നിന്നും ഹൈവേ പ്രോജക്ടിനായുള്ള അനുമതി ലഭിക്കാനും സഹായിക്കുമെന്നാണ് എന്‍എച്ച് എ ഐ കരുതുന്നത്. തടസങ്ങളൊന്നും കൂടാതെ വലിയ മൃഗങ്ങളായ ആനയ്ക്ക് വരെ സഞ്ചരിക്കാന്‍ കഴിയുന്ന രീതിയില്‍ ആറു മുതല്‍ എട്ട് മീറ്റര്‍ നീളത്തിലുള്ള അണ്ടര്‍പാസുകള്‍ ആയിരിക്കും നിര്‍മ്മിക്കുക.

മൃഗങ്ങളുടെ സഞ്ചാരം സുഗമമാക്കാന്‍ പദ്ധതിയിട്ട് നടത്തുന്ന പുതിയ പ്രോജക്ട,് വൈല്‍ഡ് ലൈഫ് ഇന്‍സ്റ്റിറ്റിയൂട്ട് ഓഫ് ഇന്ത്യയും നാഷണല്‍ ടൈഗര്‍ കണ്‍സര്‍വേഷന്‍ അതോറിറ്റിയുമായി ചേര്‍ന്നാണ് റോഡ്-ഗതാഗത ഹൈവേ മന്ത്രാലയം നടപ്പാക്കാന്‍ ഉദ്ദേശിക്കുന്നത്. ഹൈവേയുടെ ഇരുവശങ്ങളിലും വാഹനങ്ങള്‍ കടക്കുന്നത് തടയാനായി വേലികെട്ടി തിരിക്കുമെന്നും അധികൃതര്‍ വ്യക്തമാക്കി. മനുഷ്യരും മൃഗങ്ങളുമായിട്ടുള്ള സംഘര്‍ഷം ഉണ്ടാകാതിരിക്കാന്‍ അത്തരം പ്രശ്‌നങ്ങള്‍ ഉണ്ടാക്കുന്ന മൃഗങ്ങളെ തിരിച്ചറിഞ്ഞ് പട്ടിക തയ്യാറാക്കാനും, ദേശീയ തലത്തിലും പ്രാദേശിക തലത്തിലും മനുഷ്യ വാസമുള്ളിടത്ത് സ്ഥിരം എത്തുന്ന മൃഗങ്ങളെ തിരിച്ചറിയാനായി സര്‍വേ നടത്താനും പരിസ്ഥിതി മന്ത്രാലയം നിശ്ചയിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha