പൊലീസ് ക്വാര്‍ട്ടേഴ്‌സില്‍ കോണ്‍സ്റ്റബിളിന്റെ ഭാര്യയെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. ബെംഗളൂരു കെ.ആര്‍.പുരത്താണ് സംഭവം. ലക്ഷ്മി പ്രിയ (26) എന്ന യുവതിയാണ് മരിച്ചത്. ഭര്‍ത്താവിനും ഭര്‍തൃവീട്ടുകാര്‍ക്കുമെതിരെ സ്ത്രീധന പീഡന ആരോപണവുമായി പെണ്‍കുട്ടിയുടെ കുടുംബം രംഗത്തെത്തി. എച്ച്എഎല്‍ പൊലീസ് സ്‌റ്റേഷനിലെ കോണ്‍സ്റ്റബിളായ രാജേഷ് ആരാധ്യയുമായി 2023 മേയ് 11നായിരുന്നു ലക്ഷ്മി പ്രിയയുടെ വിവാഹം. വിവാഹത്തിനു പിന്നാലെ ഭര്‍ത്താവ് രാജേഷ്, ഭര്‍തൃപിതാവ് പാലാക്ഷാരാധ്യ, ഭര്‍തൃമാതാവ് ഭാഗ്യമ്മ എന്നിവര്‍ ലക്ഷ്മിയെ നിരന്തരം മാനസികമായും ശാരീരികമായും പീഡിപ്പിച്ചിരുന്നതായി പിതാവ് പൊലീസില്‍ നല്‍കിയ പരാതിയില്‍ പറയുന്നു.

എട്ട് മാസം പ്രായമുള്ള പെണ്‍കുഞ്ഞിന്റെ അമ്മയായ ലക്ഷ്മി പ്രിയ, പ്രസവത്തെ തുടര്‍ന്ന് ആറ് മാസത്തോളം സ്വന്തം വീട്ടിലായിരുന്നു താമസം. മേയ് 22ന് ഉച്ചയ്ക്ക് 2.30 ഓടെ ലക്ഷ്മി പ്രിയ തന്റെ മൊബൈല്‍ ഫോണിന്റെ പാസ്‌വേഡ് സഹോദരി ജയശ്രീക്ക് വാട്‌സാപ്പില്‍ അയച്ചിരുന്നു. ഇതില്‍ സംശയം തോന്നി സഹോദരി ഉടന്‍ തിരിച്ചുവിളിച്ചെങ്കിലും ലക്ഷ്മി ഫോണ്‍ എടുത്തില്ല. തുടര്‍ന്ന് ഭര്‍ത്താവ് രാജേഷിനെ ബന്ധപ്പെട്ടപ്പോഴാണ് ലക്ഷ്മി പ്രിയ ക്വാര്‍ട്ടേഴ്‌സില്‍ തൂങ്ങിമരിച്ച വിവരം പുറത്തറിയുന്നത്.

വൈകിട്ട് ഡ്യൂട്ടി കഴിഞ്ഞ് രാജേഷ് വീട്ടിലെത്തിയപ്പോഴാണ് സംഭവം ശ്രദ്ധയില്‍പ്പെട്ടതെന്നും ഉടന്‍ പൊലീസില്‍ വിവരമറിയിക്കുകയായിരുന്നു എന്നുമാണു പൊലീസ് പറയുന്നത്. ഭര്‍ത്താവിനും കുടുംബത്തിനുമെതിരെ ഭാരതീയ ന്യായ സംഹിത സെക്ഷന്‍ 80(2) (സ്ത്രീധന മരണം), സെക്ഷന്‍ 85 (ഗാര്‍ഹിക പീഡനം), സ്ത്രീധന നിരോധന നിയമം എന്നിവ പ്രകാരം പൊലീസ് കേസ് റജിസ്റ്റര്‍ ചെയ്തു.