മോഷണം ആരോപിച്ച് യുവാക്കളെ നഗ്നരാക്കി കെട്ടിയിട്ട് മര്ദിച്ച് ആള്ക്കൂട്ടം
മൊബൈല് ഫോണ് മോഷ്ടിച്ചെന്ന് ആരോപിച്ച് രണ്ട് യുവാക്കളെ കയറുകൊണ്ട് കെട്ടിയിട്ട് ക്രൂരമായി മര്ദ്ദിച്ച് ആള്ക്കൂട്ടം. ദലിതരായ യുവാക്കളെ ഗ്രാമത്തിലൂടെ നഗ്നരായി നടത്തിച്ചായിരുന്നു ശിക്ഷ. പഞ്ചാബിലെ ശ്രീ മുക്തസര് സാഹിബ് ജില്ലയിലാണ് സംഭവം. ദൃശ്യങ്ങള് സമൂഹമാധ്യമങ്ങളില് വ്യാപകമായി പ്രചരിച്ചതോടെ വലിയ രീതിയിലുള്ള പ്രതിഷേധം ഉയര്ന്നു.
ഗ്രാമത്തിലെ ഇതര സംസ്ഥാന തൊഴിലാളികളില് നിന്ന് യുവാക്കള് മൊബൈല് ഫോണ് മോഷ്ടിച്ചെന്ന സംശയത്തെ തുടര്ന്നാണ് സംഭവം അരങ്ങേറിയത്. ആരോപണത്തിന്റെ അടിസ്ഥാനത്തില് ചില ഗ്രാമവാസികള് യുവാക്കളെ വീട്ടില് നിന്ന് പിടിച്ചിറക്കി കയറുകൊണ്ട് കെട്ടിയിട്ട് ക്രൂരമായി മര്ദ്ദിക്കുകയായിരുന്നു. പിന്നാലെ ഇവരെ നഗ്നരാക്കി പരസ്യമായി ഗ്രാമത്തിലൂടെ നടത്തിച്ചു. മര്ദ്ദനത്തിനിടയില് യുവാക്കള്ക്കെതിരെ ജാതീയമായ അധിക്ഷേപങ്ങള് ഉണ്ടായതായും ഇരുവരുടെയും കുടുംബങ്ങള് ആരോപിച്ചു.
അതേസമയം, യുവാക്കള് പ്രദേശത്ത് മൊബൈല് തട്ടിപ്പുകേസുകളില് സ്ഥിരമായി ഉള്പ്പെടുന്നവരാണെന്നാണ് ഗ്രാമവാസികളുടെ വാദം. സംഭവത്തില് രണ്ട് യുവാക്കളെയും പൊലീസ് കസ്റ്റഡിയിലെടുത്ത് കേസ് റജിസ്റ്റര് ചെയ്തിട്ടുണ്ട്. ഇവരെ വൈദ്യപരിശോധനയ്ക്ക് വിധേയരാക്കി. നിയമം കൈയിലെടുത്ത് മര്ദിച്ച ഗ്രാമവാസികള്ക്കെതിരെയും ശക്തമായ നടപടിയുണ്ടാകുമെന്ന് പൊലീസ് അറിയിച്ചു. യുവാക്കള് തെറ്റ് ചെയ്തിട്ടുണ്ടെങ്കില് പോലും ഗ്രാമവാസികള് പൊലീസിനെ അറിയിക്കുകയായിരുന്നു വേണ്ടതെന്ന് മലോട്ട് ഡപ്യൂട്ടി സൂപ്രണ്ട് ജസ്പാല് സിങ് ധലിവാല് പറഞ്ഞു. സംഭവത്തില് പൊലീസ് സീനിയര് സൂപ്രണ്ടിനോട് ചൊവ്വാഴ്ചയ്ക്കകം വിശദമായ റിപ്പോര്ട്ട് സമര്പ്പിക്കാന് പഞ്ചാബ് പട്ടികജാതി കമ്മിഷന് ചെയര്മാന് ജസ്വിര് സിങ് നിര്ദേശം നല്കി.
https://www.facebook.com/Malayalivartha
