എറണാകുളം കലൂരില്‍ പെണ്‍കുട്ടികളെ ആക്രമിച്ച സംഭവത്തില്‍ മുഖ്യപ്രതി അക്ബര്‍ പിടിയില്‍. പാലക്കാട് നിന്നാണ് പ്രതിയെ പൊലീസ് കസ്റ്റഡിയില്‍ എടുത്തത്. അക്ബര്‍ മുന്‍പും ക്രിമിനല്‍ കേസുകളില്‍ പ്രതിയായിട്ടുണ്ട്. സെക്‌സ് റാക്കറ്റ് കണ്ണിയാണ് ഇയാള്‍. ഹോട്ടല്‍ നടത്തിപ്പിന്റെ മറവിലാണ് സെക്‌സ് റാക്കറ്റിന്റെ പ്രവര്‍ത്തനങ്ങള്‍. സംഭവം നടന്ന് അഞ്ച് ദിവസത്തിന് ശേഷമാണ് പ്രതിയെ പിടികൂടാനായത്.റിക്രൂട്ട്‌മെന്റ് പരീക്ഷക്ക് തയ്യാറെടുക്കുന്ന പെണ്‍കുട്ടികളാണ് ആക്രമണത്തിന് ഇരയായത്.

പാര്‍ടൈം ജോലി കഴിഞ്ഞ് റോഡിലുടെ നടന്നു പോകുകയായിരുന്ന രണ്ട് പെണ്‍കുട്ടിളെ എട്ടു പേരടങ്ങുന്ന സംഘമാണ് ആക്രമിച്ചത്. ഇക്കഴിഞ്ഞ ചൊവ്വ പുലര്‍ച്ചെ 4.30ഓടെ ആയിരുന്നു സംഭവം നടന്നത്. കലൂര്‍ ജങ്ഷനടുത്ത് ചക്കാലപ്പാടം റോഡിലാണ് വിദ്യാര്‍ഥിനികള്‍ ആക്രമിക്കപ്പെട്ടത്. അക്രമി സംഘത്തിലെ യുവതികളുമായാണ് തര്‍ക്കം തുടങ്ങിയത്. പിന്നലെ അക്ബര്‍ മര്‍ദിക്കുകയായിരുന്നു.

പെണ്‍കുട്ടികളില്‍ ഒരാളെ ക്രൂരമായി മര്‍ദിച്ചു. നിലത്തിട്ട് ചവിട്ടുകയും കൈള്‍ പിടിച്ച് തിരിക്കുകയും ചെയ്തു. നെഞ്ചിലും കഴുത്തിലും പെണ്‍കുട്ടിയ്ക്ക് പരിക്കേറ്റു. ലഹരിപ്പുറത്താണ് യുവതിയെ ആക്രമിച്ചത് എന്നാണ് കണ്ടെത്തല്‍. യുവതികള്‍ അടക്കം ആറ് പ്രതികള്‍ക്കായുള്ള അന്വേഷണം തുടരുന്നുണ്ട്. ആല്‍വിന്‍, അരുണ്‍, സാബിത്ത് എന്നിവരെ പിടികൂടിയിരുന്നു.