24 വയസുകാരിയായ ദളിത് പെണ്‍കുട്ടിയെ പഞ്ചാബിലെ മുക്തസറില്‍ തട്ടിക്കൊണ്ടുപോയി പീഡിപ്പിച്ചയാള്‍ കീഴടങ്ങി. മാര്‍ച്ച് 24-ന് ഓഫീസില്‍ നിന്ന് പെണ്‍കുട്ടിയെ വലിച്ചിഴച്ച് കൊണ്ടുപോകുന്നത് സിസിടിവിയില്‍ പതിഞ്ഞിരുന്നു.

ഈ ദൃശ്യങ്ങള്‍ വൈറലായതോടെയാണ് ഒരു മാസത്തിന് ശേഷം പ്രതി മുക്തസര്‍ പൊലീസ് സ്‌റ്റേഷനില്‍ കീഴടങ്ങിയത്. ഗുര്‍ജിന്ദര്‍ സിംഗ് എന്നാണ് പ്രതിയുടെ പേര്.
പെണ്‍കുട്ടി ജോലി ചെയ്യുന്ന സ്ഥാപനത്തില്‍ നിന്നും പകല്‍ സമയത്താണ് പ്രതി യുവതിയെ വലിച്ചിറക്കി കൊണ്ടു പോയത്. ഗുര്‍ജിന്ദര്‍ സിംഗിന്റെ പിടിയില്‍ നിന്നും കുതറി മാറാന്‍ പെണ്‍കുട്ടി ശ്രമിച്ചെങ്കിലും സാധിച്ചില്ല.

നടു റോഡില്‍ 100 മീറ്ററോളം പെണ്‍കുട്ടിയെ വലിച്ചിഴച്ചു. സഹായത്തിനായി പെണ്‍കുട്ടി അലറി വിളിച്ചെങ്കിലും വഴിയിലൂടെ പോയ വാഹനങ്ങളിലുള്ളവര്‍ രക്ഷിക്കാന്‍ ശ്രമിച്ചില്ല. അടുത്തുള്ള ഒരു ഫാം ഹൗസിലെത്തിച്ച് പീഡിപ്പിച്ച ശേഷം പിറ്റേ ദിവസം വിട്ടയക്കുകയായിരുന്നുവെന്ന് പെണ്‍കുട്ടി പൊലീസില്‍ അറിയിച്ചു.

സംഭവം നടന്ന് അഞ്ച് ദിവസങ്ങള്‍ക്ക് ശേഷമാണ് പൊലീസ് കേസെടുത്തത്. പെണ്‍കുട്ടിയുടെ ഗ്രാമത്തില്‍ തന്നെയുള്ളയാളാണ് പ്രതിയായ ഗുര്‍ജീന്ദര്‍ സിംഗ്. എന്നാല്‍ പൊലീസ് അറസ്റ്റ് വൈകിക്കുകയായിരുന്നുവെന്നും ആക്ഷേപമുണ്ട്.

ദേശീയ പട്ടിക ജാതി വികസന കമ്മീഷനില്‍ പെണ്‍കുട്ടി പരാതി നല്‍കിയതോടെയാണ് പൊലീസ് കേസില്‍ താല്‍പര്യമെടുത്തത്. തട്ടികൊണ്ടുപോകല്‍ സിസിടിവി ദൃശ്യങ്ങള്‍ ഇന്റര്‍നെറ്റില്‍ പ്രചരിച്ചതോടെയാണ് പ്രതി കീഴടങ്ങിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha