മെഡിക്കല്‍ പ്രവേശനത്തിന് ഏകീകൃത പ്രവേശന പരീക്ഷ ഏര്‍പ്പെടുത്തിയ ഉത്തരവില്‍ ഭേദഗതി വേണമെന്ന ആവശ്യം സുപ്രീം കോടതി തള്ളി. ഒരുകൂട്ടം വിദ്യാര്‍ഥികളാണ് ഭേദഗതി ആവശ്യപ്പെട്ട് സുപ്രീം കോടതിയെ സമീപിച്ചത്. ഹര്‍ജിയില്‍ ഇടപെടാന്‍ ചീഫ് ജസ്റ്റീസ് ടി.എസ്.ഠാക്കൂര്‍ അധ്യക്ഷനായ ബെഞ്ച് വിസമ്മതിച്ചു.
എംബിബിഎസ്, ബിഡിഎസ് പ്രവേശനത്തിനായി രാജ്യവ്യാപകമായി ഏകീകൃത പ്രവേശന പരീക്ഷ (നാഷണല്‍ എലിജിബിലിറ്റി എന്‍ട്രന്‍സ് ടെസ്റ്റ്- നീറ്റ്) രണ്ടു ഘട്ടമായി നടത്തണമെന്ന് സുപ്രീം കോടതി കഴിഞ്ഞ ദിവസം ഉത്തരവിട്ടിരുന്നു.
സിബിഎസ്ഇ നാളെ നടത്തുന്ന ഓള്‍ ഇന്ത്യ പ്രീമെഡിക്കല്‍ എന്‍ട്രന്‍സ് ടെസ്റ്റ് (എഐപിഎംടി) സുപ്രീംകോടതി നിര്‍ദേശിച്ച നാഷണല്‍ എലിജിബിലിറ്റി എന്‍ട്രന്‍സ് ടെസ്റ്റ് (നീറ്റ്) ആയി പരിഗണിക്കും.
അതായത് എംബിബിഎസിനും ബിഡിഎസിനുമുള്ള 15 ശതമാനം കേന്ദ്ര ക്വോട്ടയിലേക്കായി നടത്തുന്ന പരീക്ഷ നീറ്റിന്റെ ഒന്നാം പരീക്ഷയാകും. ഈ പരീക്ഷയ്ക്ക് അപേക്ഷിക്കാത്തവര്‍ക്ക് ജൂലൈ 24-ലെ പരീക്ഷയ്ക്ക് അപേക്ഷിക്കാം. അതുകൂടി കഴിഞ്ഞ് ഓഗസ്റ്റ് 17-നാണ് ഫലംവരുക.

രാവിലെ പത്തുമുതല്‍

നാളെ രാവിലെ പത്തിനാണ് പരീക്ഷ. 6.5 ലക്ഷം പേര്‍ പരീക്ഷയ്ക്ക് രജിസ്റ്റര്‍ ചെയ്തിട്ടുണ്ട്.
ഇംഗ്ലീഷിലും ഹിന്ദിയിലുമാണ് നാളത്തെ പരീക്ഷ. പ്രാദേശിക ഭാഷകളില്‍ ഇല്ല.

മേയ് 21 മുതല്‍ അപേക്ഷിക്കാം

ജൂലൈ 24-ലെ നീറ്റ് പരീക്ഷയ്ക്കുള്ള അപേക്ഷ മേയ് 21 മുതല്‍ ഓണ്‍ലൈനായി നല്‍കാം. ജൂലൈ ഒന്നിനകം അപേക്ഷയിലെ തിരുത്തലിന് അവസരമുണ്ടാകും. ജൂലൈ എട്ടു മുതല്‍ അഡ്മിറ്റ് കാര്‍ഡ് ലഭിക്കും.

എഴുതിയ പരീക്ഷയുടെ ഗതി

സുപ്രീംകോടതി വിധി പുനഃപരിശോധിച്ചു തിരുത്തുന്നില്ലെങ്കില്‍ കേരളത്തിന്റേതടക്കം ഇതുവരെ നടന്ന പരീക്ഷകളൊന്നും ഇക്കൊല്ലത്തെ എംബിബിഎസ്, ബിഡിഎസ് പ്രവേശനത്തിനു പ്രസക്തമല്ല. എന്നാല്‍ ആയുര്‍വേദ, ഹോമിയോ, യുനാനി, അഗ്രികള്‍ച്ചര്‍, വെറ്ററിനറി, ഫിഷറീസ് തുടങ്ങിയവയ്ക്കുള്ള പ്രവേശനത്തിന് കഴിഞ്ഞദിവസം നടത്തിയ പ്രവേശനപരീക്ഷയുടെ അടിസ്ഥാനത്തിലാകും പ്രവേശനം. ആ കോഴ്‌സുകള്‍ സുപ്രീംകോടതി ഉത്തരവിന്റെ പരിധിയില്‍ വരുന്നില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha