വിമത കോണ്‍ഗ്രസ് എം.എല്‍.എമാര്‍ക്ക് പണം വാഗ്ദാനം ചെയ്യുന്ന ഒളിക്യാമറാ ദൃശ്യത്തിലുളളത് താന്‍ തന്നെയാണെന്ന് ഉത്തരാഖണ്ഡ് മുന്‍ മുഖ്യമന്ത്രി ഹരീഷ് റാവത്ത് സമ്മതിച്ചു. വീഡിയോ വ്യാജമാണെന്നായിരുന്നു റാവത്തിന്റെ ഇതുവരെയുള്ള നിലപാട്.

എന്നാല്‍ താന്‍ കോഴ വാഗ്ദാനം ചെയ്തുവെന്ന ആരോപണം റാവത്ത് നിഷേധിച്ചു. കോഴ ആരോപണത്തിന് തെളിവുണ്ടെങ്കില്‍ തന്നെ നഗരത്തിലെ ക്ലോക്ക് ടവറില്‍ പരസ്യമായി തൂക്കിലേറ്റണമെന്നും റാവത്ത് വശ്യപ്പെട്ടു.

ഒരു മാധ്യമപ്രവര്‍ത്തകനുമായി കൂടിക്കാഴ്ച നടത്തിയാല്‍ അതെങ്ങനെ തെറ്റാകുമെന്ന് റാവത്ത് ചോദിച്ചു. സാങ്കേതികമായി പുറത്താക്കപ്പെട്ടിട്ടില്ലാത്ത ഒരു എം.എല്‍.എ തന്നോട് സംസാരിച്ചാല്‍ അതെങ്ങനെയാണ് തെറ്റാവുക. എല്ലാ ദിവസവും പല മാധ്യപ്രവര്‍ത്തകരേയും കാണാറുണ്ട്. അദ്ദേഹം ചോദിച്ചു.

കോണ്‍ഗ്രസ് വിമത എം.എല്‍.എമാരായ കണ്‍വര്‍ പ്രണവ് സിങും സാകേത് ബഹുഗുണയുമാണ് മുമ്പ് ദൃശ്യങ്ങള്‍ അടങ്ങുന്ന സീഡി പുറത്തുവിട്ടത്. സര്‍ക്കാറിനെ പിന്തുണയ്ക്കുന്ന വിമതഎം.എല്‍.എമാര്‍ക്ക് അഞ്ചുകോടി രൂപ വാഗ്ദാനം ചെയ്യുന്നതും രണ്ട് വിമത എം.എല്‍.എമാര്‍ക്ക് മന്ത്രിസ്ഥാനവും വാഗ്ദാനം ചെയ്യുന്നതുമായിരുന്നു ദൃശ്യത്തിലുണ്ടായിരുന്നത്. ഉത്തരാഖണ്ഡിലെ ജോളി ഗ്രാന്റ് വിമാനത്താവളത്തില്‍ മാര്‍ച്ച് 23ന് ചിത്രീകരിച്ച ദൃശ്യങ്ങളാണെന്നായിരുന്നു ആരോപണം.

തുടര്‍ന്ന് കേന്ദ്രസര്‍ക്കാര്‍ ഉത്തരാഖണ്ഡില്‍ രാഷ്രപതി ഭരണം ഏര്‍പ്പെടുത്തി. എന്നാല്‍ ഉത്തരാഖണ്ഡ് ഹൈക്കോടതി രാഷ്ട്രപതി ഭരണം റദ്ദാക്കി. ഇതിനെതിരെ കേന്ദ്രസര്‍ക്കാര്‍ സുപ്രീം കോടതിയില്‍ നിന്ന് സ്‌റ്റേ വാങ്ങുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha