കാണാതായ യുവതിയും യുവാവും ഗസ്റ്റ് ഹൗസ് മുറിയില് മരിച്ച നിലയില്
ഗസ്റ്റ് ഹൗസില് യുവാവിനെയും യുവതിയെയും മരിച്ചനിലയില് കണ്ടെത്തി. ഉത്തര്പ്രദേശിലെ ലക്നൗവില് 20കാരനായ അമിത് കുമാര്, 19കാരിയായ നര്ഗീസ് എന്നിവരാണ് മരിച്ചത്. ചിന്ഹട്ട് പൊലീസ് സ്റ്റേഷന് പരിധിയിലെ ഗസ്റ്റ് ഹൗസില് ഇന്നലെയാണ് ഇരുവരെയും മരിച്ചനിലയില് കണ്ടെത്തിയത്.
ചിന്ഹട്ടിലെ റെഡ് ബില്ഡിംഗ് ഗസ്റ്റ് ഹൗസിലെ 101ാം നമ്പര് മുറിയില് ഇരുവരും ഓഗസ്റ്റ് 23 മുതല് താമസിച്ചുവരികയായിരുന്നു. 20 ദിവസത്തോളമായി ഇവര് ഇവിടെയാണ് കഴിഞ്ഞിരുന്നതെന്ന് പൊലീസ് പറയുന്നു. ഗസ്റ്റ് ഹൗസ് നടത്തിപ്പുകാരനായ രാകേഷ് യാദവാണ് ഇരുവരെയും മരിച്ചനിലയില് കണ്ടെത്തിയ കാര്യം പൊലീസിനെ അറിയിച്ചത്. പൊലീസ് സ്ഥലത്തെത്തിയപ്പോള് ഫാനില് തൂങ്ങിനില്ക്കുന്ന രീതിയിലായിരുന്നു മൃതദേഹങ്ങള്.
ഇന്ക്വസ്റ്റ് നടപടികള് പൂര്ത്തിയാക്കിയ ശേഷം മൃതദേഹങ്ങള് പോസ്റ്റ്മോര്ട്ടത്തിനായി ലോഹിയ ആശുപത്രിയിലേക്ക് മാറ്റി. തുടര്ന്ന് ഇരുവരുടെയും വീട്ടുകാരെ ബന്ധപ്പെടാന് ശ്രമിച്ചപ്പോഴാണ് നര്ഗീസിനെ കാണാതായെന്ന പേരില് ഹര്പാല്പുര് പൊലീസ് സ്റ്റേഷനില് കേസ് രജിസ്റ്റര് ചെയ്തിട്ടുണ്ടെന്ന് മനസിലായത്. ഇരുവരും എവിടെയാണെന്നതിനെക്കുറിച്ച് വീട്ടുകാര്ക്ക് അറിവില്ലായിരുന്നെന്നും അന്വേഷണ ഉദ്യോഗസ്ഥര്ക്ക് മനസിലായി.
മുറിയില്നിന്ന് ആര്യസമാജ് ക്ഷേത്രത്തില് ഇരുവരും വിവാഹിതരായതിന്റെ സര്ട്ടിഫിക്കറ്റും ആത്മഹത്യാക്കുറിപ്പും പൊലീസ് കണ്ടെത്തി. നര്ഗീസ് എന്ന പൂജ എന്ന പേരിലാണ് വിവാഹം രജിസ്റ്റര് ചെയ്തിരിക്കുന്നത്. ഫോറന്സിക് സംഘമുള്പ്പടെയെത്തി സംഭവസ്ഥലത്തുനിന്ന് തെളിവുകള് ശേഖരിച്ചിട്ടുണ്ട്. ഇരുവരും ജീവനൊടുക്കാന് ഇടയായ സാഹചര്യം ഉള്പ്പെടെയുള്ള കാര്യങ്ങളില് പൊലീസ് അന്വേഷണം ആരംഭിച്ചു.
https://www.facebook.com/Malayalivartha
