കുറച്ചു കാലങ്ങളായി ഐ എസ് ആർ ഓയിൽ വിക്ഷേപണങ്ങൾ ഒന്നും നടക്കാത്തത് വലിയ ചർച്ചയായിരുന്നു. തുടർച്ചയായ പരാജയങ്ങളെ തുടർന്നാണ് കേന്ദ്രം വിക്ഷേപണം നിർത്തി വച്ചത്. സൈനിക ആവശ്യങ്ങൾക്കും കപ്പൽ, വിമാന ഗതാഗതത്തിനും ഇന്ത്യ സ്വന്തമായി ഉപയോഗിക്കുന്ന ജി.പി.എസ് സംവിധാനം "നാവിക്" പ്രതിസന്ധിയിലായതോടെ പുതിയ ഉപഗ്രഹം വിക്ഷേപിക്കാൻ തിരക്കിട്ട നീക്കം. നാവിക് നിലച്ചാൽ പ്രതിരോധ രംഗത്തെയും ബാധിക്കും.അടിയന്തര സാഹചര്യം പരിഗണിച്ച്, ഗഗൻയാനിന്റെ ആളില്ലാ വിക്ഷേപണം മാറ്റിവച്ച് ഉടൻ നാവിക് ഉപഗ്രഹം വിക്ഷേപിക്കാൻ ഐ.എസ്.ആർ.ഒയ്ക്ക് കേന്ദ്രസർക്കാർ നിർദ്ദേശം നൽകി.

നാല് ഉപഗ്രഹങ്ങൾ ഒരേസമയം ബഹിരാകാശത്ത് സജ്ജമാക്കിയാണ് ജി.പി.എസ് പ്രവർത്തിക്കുന്നത്. രണ്ട് ഉപഗ്രഹങ്ങൾ കാലാവധി കഴിഞ്ഞ് പ്രവർത്തന രഹിതമായതാണ് പ്രതിസന്ധിക്ക് പിന്നിൽ. ആഴ്ചകൾക്കുള്ളിൽ നാവികിന്റെ പുതിയ ഉപഗ്രഹമായ എൻ.വി.എസ്-03 വിക്ഷേപിക്കാൻ തിരക്കിട്ട നീക്കം തുടങ്ങി. ജി.എസ്.എൽ.വി എം.കെ.2 പതിപ്പിന്റെ എഫ് -18 റോക്കറ്റ് ശ്രീഹരിക്കോട്ടയിൽ സജ്ജമാക്കി. ഉപഗ്രഹനിർമ്മാണം അന്ത്യഘട്ടത്തിലാണ്. പിന്നാലെ എൻ.വി.എസ്-04, എൻ.വി.എസ് -05 എന്നിവയും വിക്ഷേപിക്കുന്നതോടെ നാവിക് പൂർണസജ്ജമാവും. 2.2ടൺ ഭാരമുള്ള ഉപഗ്രഹം പത്തുവർഷം പ്രവർത്തിക്കും.

വെറുമൊരു നാവിഗേഷൻ സംവിധാനം എന്നതിലുപരി ഇന്ത്യയുടെ സുരക്ഷാ കാര്യങ്ങളിൽ നാവിക് വലിയ പങ്ക് വഹിക്കുന്നുണ്ട്. മിസൈൽ ഗൈഡൻസ്, നാവിക പ്രവർത്തനങ്ങൾ, സുരക്ഷിതമായ സൈനിക ആശയവിനിമയം, ദുരന്ത നിവാരണം എന്നിവയ്ക്ക് നാവിക് അത്യന്താപേക്ഷിതമാണ്. നിലവിലെ തിരിച്ചടികൾക്കിടയിലും ഐ.എസ്.ആർ.ഒ. രണ്ടാം തലമുറ നാവിക് ഉപഗ്രഹങ്ങളുടെ വിക്ഷേപണത്തിനായുള്ള തയ്യാറെടുപ്പിലാണ്. സ്മാർട്ട്‌ഫോണുകളിൽ നാവിക് കൂടുതൽ ലഭ്യമാക്കുന്നതിനായി L1-ബാൻഡ് സിഗ്നലുകൾ കൂടി ഇതിൽ ഉൾപ്പെടുത്തുന്നുണ്ട്. പാകിസ്താൻ ബഹിരാകാശത്ത് തങ്ങളുടെ നിരീക്ഷണ കണ്ണുകൾ ശക്തമാക്കുമ്പോൾ,

ഇന്ത്യയുടെ സ്വന്തം നാവിഗേഷൻ സംവിധാനം എത്രയും വേഗം പൂർണസജ്ജമാക്കേണ്ടത് രാജ്യത്തിന്റെ സുരക്ഷയ്ക്ക് അത്യന്താപേക്ഷിതമാണ്.അമേരിക്കയുടെ ജി.പി.എസ്, റഷ്യയുടെ ഗ്ളാനോസ്, യൂറോപ്പിന്റെ ഗലീലിയോ, ചെെനയുടെ ബെയ്ദു തുടങ്ങിയവയ്ക്ക് പകരമാണ് ഗതിനിർണയ സംവിധാനമായ നാവിക്. 2013ലാണ് തുടങ്ങിയത്. 11 ഉപഗ്രഹങ്ങൾ വിക്ഷേപിച്ചെങ്കിലും അറ്റോമിക് ക്ളോക്കിലെ പാകപ്പിഴ മൂലം 7 ഉപഗ്രഹങ്ങൾ പ്രവർത്തനരഹിതമായി.