രാജ്യത്തു വില്‍ക്കുന്ന ശീതളപാനീയ ഉല്‍പ്പന്നങ്ങളില്‍ മാരക വിഷാംശമുള്ളതായി കേന്ദ്ര സര്‍ക്കാരിന്റെ പരിശോധനാഫലം. രാജ്യാന്തര ശീതളപാനീയ കുത്തകകളായ പെപ്‌സികോയുടെയും കൊക്കകോളയുടെയും ഇന്ത്യയിലെ ഉല്‍പ്പന്നങ്ങളിലാണ് മാരക വിഷാംശം അടങ്ങിയിരിക്കുന്നത്.
അതീവ ഹാനികരമായ അഞ്ചുതരത്തിലുള്ള ലോഹങ്ങള്‍/ വിഷാംശങ്ങള്‍ ഇതിലുള്ളതായാണു കണ്ടെത്തല്‍. സ്‌െ്രെപറ്റ്, പെപ്‌സി, കൊക്കക്കോള, മൗണ്ടന്‍ ഡ്യു, സെവനപ്പ് തുടങ്ങിയ ശീതളപാനീയങ്ങളിലാണ് വിഷാംശം. ലെഡ്(ഈയം), ക്രോമിയം, കാഡ്മിയം, ഡി.ഇ.എച്ച്.പി, ഫത്താലേറ്റ് എന്നിവയാണ് ഇവയില്‍ കണ്ടെത്തിയത്. 
കേന്ദ്ര ആരോഗ്യമന്ത്രാലയത്തിന്റെ കീഴിലുള്ള ഡ്രഗ് ടെക്‌നിക്കല്‍ അഡൈ്വസറി ബോര്‍ഡിന്റെ നിര്‍ദേശപ്രകാരം കൊല്‍ക്കത്തയിെല ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് ഹൈജീന്‍ ആന്‍ഡ് പബ്ലിക് ഹെല്‍ത്തിലാണ് പരിശോധന നടത്തിയത്. 
പരിശോധനാ ഫലം ഡ്രഗ് ടെക്‌നിക്കല്‍ അഡൈ്വസറി ബോര്‍ഡ് ഡയറക്ടര്‍ ജനറല്‍ ജഗദീഷ് പ്രസാദിനു കൈമാറി. കഴിഞ്ഞ ഫെബ്രുവരിമാര്‍ച്ച് മാസങ്ങളിലായിരുന്നു പരിശോധന. മൗണ്ടന്‍ ഡ്യൂവും സെവനപ്പും പെപ്‌സികോയുടെയും സ്‌െ്രെപറ്റ് കൊക്കക്കോളയുടെയും ഉല്‍പ്പന്നങ്ങളാണ്. 
ഓരോ ബ്രാന്‍ഡ് ശീതളപാനീയത്തിന്റെയും നാലു ബോട്ടിലുകള്‍ വീതമെടുത്താണ് പരിശോധന നടത്തിയത്. 
ശീതളപാനീയങ്ങളില്‍ ലോഹങ്ങള്‍ക്ക് അനുവദനീയമായ അളവില്ല. ലിറ്ററില്‍ 0.029, 0.011, 0.0026, 0.009 എന്നിങ്ങനെയാണ് ലോഹങ്ങളുടെ സാന്നിധ്യം കണ്ടെത്തിയത്. ഇത് കുപ്പിയിലടയ്ക്കുമ്പോള്‍ തോത് ഉയരും. മുറിയിലെ ചൂടു കൂടുന്നതിനനുസരിച്ച് വിഷാംശത്തിന്റെ അളവ് കൂടുന്നതായും കണ്ടെത്തി. ലെഡ്, കാഡ്മിയം എന്നിവയെ ഗുരുതര ആരോഗ്യപ്രശ്‌നങ്ങളുണ്ടാക്കുന്ന 10 രാസവസ്തുക്കളിലാണ് ലോകാരോഗ്യസംഘടന ഉള്‍പ്പെടുത്തിയിട്ടുള്ളത്. 
ലെഡിന്റെ അംശം ശരീരത്തില്‍ പ്രവേശിക്കുന്നത് കുട്ടികളെയാണ് വേഗത്തില്‍ ബാധിക്കുക. ഇത് തലച്ചോറിനെ ബാധിക്കുന്ന ലെഡ് മാനസിക പ്രശ്‌നങ്ങള്‍ക്കും കാരണമാകും. കാഡ്മിയം പ്രധാനമായും വൃക്കകളെയാണ് ബാധിക്കുക. 
പ്ലാസ്റ്റിക് കുപ്പിയിലുള്ള മരുന്നുകളില്‍ അപകടമുണ്ടാക്കുന്ന രാസവസ്തുക്കളുടെ സാന്നിധ്യമുണ്ടെന്നും നേരത്തെ ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് ഹൈജീന്‍ ആന്‍ഡ് പബ്ലിക് ഹെല്‍ത്തിലെ പരിശോധനയില്‍ കണ്ടെത്തിയിരുന്നു. ഇതിന്റെ റിപ്പോര്‍ട്ടും ഡ്രഗ് ടെക്‌നിക്കല്‍ അഡൈ്വസറി ബോര്‍ഡിനു കൈമാറിയിരുന്നു.