ഇന്ത്യ പാക് അതിര്‍ത്തിയില്‍ സംഘര്‍ഷം പുകയുമ്പോള്‍ പാക് സ്വദേശിനിയുമായി വിവാഹത്തിനൊരുങ്ങിയ യുവാവിന്റെ വിവാഹം മുടങ്ങില്ല. യുവാവിന് സഹായവുമായി വിദേശകാര്യമന്ത്രി സുഷമാ സ്വരാജ്. യുവാവിന്റെ വിവാഹം മുടങ്ങുന്ന സംഭവം വിദേശകാര്യ മന്ത്രിയുടെ ശ്രദ്ധയില്‍പ്പെടുത്തിയതോടെ പ്രശ്‌നപരിഹാരം കണ്ടതിന്റെ ആശ്വാസത്തിലാണ് ജോധ്പുര്‍ സ്വദേശിയായ വരനും കുടുംബവും.
പാക്കിസ്ഥാനുമായുള്ള പ്രശ്‌നങ്ങള്‍ പരകോടിയിലെത്തുംമുമ്പേ നരേഷ് തെവാനിയും കറാച്ചി സ്വദേശിനി പ്രിയ ബച്ചാനിയും തമ്മിലുള്ള വിവാഹം ഉറപ്പിച്ചിരുന്നു. അടുത്തമാസം വിവാഹിതരാകാനുള്ള തയ്യാറെടുപ്പുകള്‍ പുരോഗമിക്കുന്നതിനിടെയാണ് വധുവിനും ബന്ധുക്കള്‍ക്കും ഇന്ത്യന്‍ എംബസി വിസ അനുവദിക്കാതിരുന്നത.് ഇതോടെ രണ്ടു കുടുംബങ്ങളും നിരാശയിലായി. 
വിസ വിഷയത്തില്‍ത്തട്ടി വിവാഹം നടക്കുമോ എന്നുപോലും ആശങ്ക ഉയര്‍ന്നു. ഒടുവില്‍ പ്രശ്‌നം കേന്ദ്രമന്ത്രി സുഷമാ സ്വരാജിന്റെ ശ്രദ്ധയില്‍പ്പെടുത്താനുള്ള വരന്റെ തീരുമാനമാണ് പ്രശ്‌നപരിഹാരത്തിനു വഴിതെളിച്ചത്. 
ട്വിറ്ററിലൂടെ വിഷയം അവതരിപ്പിച്ചതിനു പിന്നാലെ വിസ ഉടന്‍ അനുവദിക്കാമെന്ന് കേന്ദ്രമന്ത്രി വാക്കു നല്‍കി. ഇതോടെ വിവാഹ ഒരുക്കങ്ങള്‍ വേഗത്തിലാക്കി. വധുവിനും ബന്ധുക്കള്‍ക്കും കറാച്ചിയിലെ ഇന്ത്യന്‍ എംബസി വീസ നിഷേധിച്ചതോടെ നരേഷ് വിദേശകാര്യമന്ത്രി സുഷമ സ്വരാജിനു ട്വിറ്ററില്‍ പരാതി നല്‍കുകയായിരുന്നു. വിഷമിക്കേണ്ട, വേഗം വീസ അനുവദിക്കാമെന്നു മന്ത്രി ഉറപ്പുനല്‍കിയതോടെ എല്ലാവര്‍ക്കും ആശ്വാസമായി. എല്ലാ നടപടിക്രമങ്ങളും പാലിച്ചു മൂന്നുമാസം മുന്‍പേ വധുവിന്റെ കുടുംബം വീസക്ക് അപേക്ഷിച്ചതാണെങ്കിലും ഇരുരാജ്യങ്ങള്‍ക്കിടയില്‍ സംഘര്‍ഷം കനത്തതോടെ ഇന്ത്യന്‍ എംബസി വീസ നല്‍കല്‍ നിര്‍ത്തിവയ്ക്കുകയായിരുന്നു